Capítulo 26

Masturbacion​—con mi por resisti contra e impulso?

“ESEI ta un adiccion mashá fuerte,” segun un homber hoven cu a lucha contra masturbacion pa mas cu 15 aña. “Bo por bira adicto na dje mescos cu na cualkier droga of bebida alcohólico.”

Sin embargo, apóstol Pablo no a laga su deseonan bira manera un doño severo. Al contrario, el a skirbi: “Mi ta domina mi curpa [deseo carnal] i ta hibé como esclabo.” (1 Corintio 9:27) El a bira estricto cu su mes! Esfuerzo similar por haci posibel pa cualkier hende líbranan for di masturbacion.

“Prepara boso mente pa accion”

Hopi hende ta masturba pa alivia tension i ansiedad. Pero, masturbacion ta un manera infantil pa reacciona na problema. (Compara cu 1 Corintio 13:11.) Mihor demonstra e “capacidad di pensa” i ataca e problema mes. (Proverbio 1:4) Ora problema i frustracion ta parce invencible, “tira tur bo ansiedad riba [Dios].”​—1 Pedro 5:​6, 7.

Supongamos cu pa casualidad bo ta mira of ta tende algo cu ta sexualmente estimulante? E Bijbel ta recomenda: “Prepara boso mente pa accion; eherce dominio propio.” (1 Pedro 1:​13, New International Version) Eherce bo mente i rechaza e idea inmoral. Pronto e estimulacion lo pasa.

Sin embargo, ta specialmente dificultoso pa rechaza mal pensamento ora bo ta so anochi. Un jufrow ta conseha: “E mihor cos pa haci ta di baha directamente for di cama i ocupábo cu un clase di trabao, of kizás tuma un snack, di manera cu bo mente ta pensa riba otro cos.” Sí, forza bo mes di ‘considera loke ta di interés serio, husto, decente, amable, di bon fama.’​—Filipense 4:8.

Ora bo tin dificultad pa pega soño, haci esfuerzo pa imita fiel rey David, cu a skirbi: “Ora mi ta cordábo [Dios] riba mi cama, durante warda djanochi, mi ta medita riba bo.” (Salmo 63:6) Hopi bez forzamento di bo mente pa medita riba Dios i su calidadnan por kibra e atake. Ta yuda també si bo ta sigi pensa di con Dios ta considera tal costumber impuro.​—Salmo 97:10.

Tuma medida preventiva

“Sabí ta hende cu a mira e calamidad i ta procede di sconde, pero hende sin experencia ta sigi numa i mester sufri dje castigo,” e homber sabí inspirá a skirbi. (Proverbio 22:3) Bo por mustra cu bo ta sabí, eherciendo prudencia. Por ehempel, si bo ta haya cu participacion den cierto actividad, bistimento di paña pretá, of comimento di cierto cuminda ta estimulábo sexualmente, anto di tur manera evita esei. Por ehempel, bebida alcohólico por swak bo resistencia i haci dominio propio mas dificultoso. Además, evita manera un plaga cualkier buki, programa di TV, of cine cu tema sexual. “Haci mi wowo pasa numa pa nan no mira loke ta inútil,” ta loke e salmista a pidi.​—Salmo 119:37

Bo por tuma medida preventiva també preparando pe tempo ora bo ta specialmente swak. Mucha muher por haya cu deseo sexual ta bira mas intenso durante cierto dianan di luna. Of bo por hayábo emocionalmente ofendí of den depresion. “Bo a mustrábo desanimá den e dia di afliccion? Bo poder lo ser scars,” ta e spiertamento di Proverbio 24:10. Pues, evita di keda so pa periodo largu di tempo. Planea actividad edificante cu por tene bo mente ocupá cu proyecto desafiador, permitiendo menos oportunidad pa rebahábo den pensamento inmoral.

Haci atake spiritual

Un homber di 27 aña di edad cu a lucha contra e costumber desde cu e tabatin 11 aña, por fin a gana e victoria. El a splica cu esei “tabata un asunto di haci atake. Mi a leza Bijbel, por lo menos dos capítulo tur dia sin falta.” El a haci esei sin falta pa tres aña. Un otro cristian ainda ta conseha: “Promé cu bo ta bai drumi, leza algo relacioná cu cosnan spiritual. Ta mashá importante pe último pensamento dje dia ser pensamento spiritual. Oracion ne tempo ei també ta mashá útil.”

“Tene basta pa haci den e trabao di Señor,” tal como e trabao di siña otro hende e Bijbel, també ta yuda. (1 Corintio 15:58) Un hermana cu a vence masturbacion a bisa: “Un cos cu realmente ta yudámi evita e costumber ta como un evangelizador di tempo completo mi mente i energía ta totalmente dedicá pa yuda otronan alcanza un relacion aprobá cu Dios.”

Cu oracion di curazón, abo també por pidi Dios dunábo “poder mas ayá cu loke ta normal.” (2 Corintio 4:7) “Drama boso curazón dilanti [Dios].” (Salmo 62:8) Un mucha muher a bisa: “Oracion ta un toren di fortaleza instantáneo. Oracion ne tempo cu e deseo ta presenta definitivamente ta yuda.” Además, ora bo ta lanta i durante e dia, expresa bo determinacion na Dios i pidi su spiritu santo fortalecedor.​—Lucas 11:13.

Yudanza di otro hende

Si bo esfuerzo personal no ta logra, anto papia cu un persona cu por yuda, tal como bo mayornan of un anciano cristian. Mucha muher por haya cu ta yuda pa papia cu confianza cu un hermana cristian maduro. (Tito 2:​3-5) Un hoven cu tabata ne punto di desespera a bisa: “Un anochi mi a papia na privá cu mi tata tocante dje.” El a admiti: “Mi tabatin cu eherce tur mi esfuerzo pa bisé. Mi a yora ora mi a bisé, mi a sinti tanto bergüenza. Pero lo mi nunca lubida loke el a bisámi. Cu un sonrisa di siguranza riba su cara, el a bisa: ‘Bo ta hacími tanto orguyoso di bo.’ E tabata sa cuanto esfuerzo mi tabatin cu haci pa bisé. Ningun palabra por a hiza mi spiritu i determinacion mas.”

E hoven a sigi, “Anto mi tata a mustrámi algun texto pa yudámi mira cu mi no a ‘bai mucho leu,’ anto algun texto mas pa keda sigur cu mi a comprende e seriedad di mi mal camina. El a bisa ‘hiba un bida limpi’ te na un cierto tempo, anto nos lo papia riba dje atrobé. El a bisámi pa no laga recaída aplastámi, solamente laga mas tempo pasa cada bez sin entrega.” Despues di a vence e problema cabalmente, e hoven a bisa: “Lagando otro hende sa di mi problema i dunámi yudanza tabata e beneficio mayor.”

Tratando cu recaída

Despues di a traha duro pa vence e costumber, un hoven a sufri di un recaída. El a admiti: “Esei tabata manera un peso aplastante riba mi. Mi a sintími asina indigno. Anto mi a razona: ‘Mi a bai mucho leu. Mi no tin e fabor di Jehova toch, pues, pakico mi mester keda estricto cu mi mes?’ ” Sin embargo, un recaída no kier men cu bo a perde e bataya. Un mucha muher di 19 aña di edad a corda: “Na principio esei a sosode casi tur anochi, anto mi a cuminza depende mas riba Jehova, i cu e yudanza di su spiritu awor mi ta faya kizás seis bez pa aña. Mi ta sintími mashá malu despues, pero cada bez cu mi ta faya, ora e sigiente tentacion ta yega, mi ta hopi mas fuerte.” Pues, gradualmente e ta gana e bataya.

Ora un recaída ta sosode, analiza loke a resulta den esei. Un hoven a bisa: “Mi ta repasa loke mi tabata leza of tabata pensa. Casi semper mi por yega ne motibo di pakico mi a slip. Asina mi ta evita esei i ta corrigié.”

E recompensa pa un bon lucha

Segun un hoven cu a vence masturbacion: “Desde cu mi a vence e problema, mi ta mantene un concenshi limpi dilanti Jehova, i esei ta algo cu lo mi no cambia pa ningun otro cos.”

Sí, un bon concenshi, un sintimento di balor personal mas halto, mas fortaleza moral, i un relacion mas estrecha cu Dios, tur esei ta recompensa di un bon lucha contra masturbacion. Segun un mucha muher cu por fin a vence masturbacion: “Kerémi, e victoria riba e costumber a wel bal tur esfuerzo cu mi a haci.”

Pregunta pa consideracion Capítulo 26

◻ Pakico ta peligroso pa pensa pensamento erótico? Kico un hoven por haci pa pone nan mente pensa riba otro cos?

◻ Hovenan por dal cua paso preventivo pa swak e tentacion di comete masturbacion?

◻ Pakico hacimento di atake spiritual ta útil?

◻ Ki papel oracion ta hunga pa vence e costumber?

◻ Pakico ta útil pa papia cu confianza cu otro hende si bo tin un problema asina?

[Kuadro/Plachi na páginas 208, 209]

Pornografía​—un bicio i peligroso!

“Pornografía ta na tur parti: bo ta camna na caya​—até ei desplegá abiertamente den showcase,” segun e memoria di Ronald di 19 aña di edad. “Algun maestro a hibé scol, i a lezé sintá na nan lesenar mientras cu nan a spera e sigiente klas.” Sí, hopi hende di varios edad, pasado, i nivel di educacion ta lector intenso di pornografía. Un hoven yamá Marco a bisa: “Ora mi a leza revista pornográfico i a wak portret, esei tabata excitante! . . . Mi a spera número nobo dje revista pasobra repasamento di esnan cu mi a mira caba no a dunámi e mesun impulso di excitacion. Esei ta bira un bicio.” Pero esei ta un bon costumber?

Pornografía tin un mensahe predominante: “Sexo ta solamente pa satisfaccion propio.” Hopi di dje ta yen di violacion di hende muher i violencia sadística. Hopi televidente pronto ta descubri cu forma “mas suave” (papa) no ta stimulánan mas i p’sei nan ta busca portret of película cu ta asta mas grosero! Manera Ernest van den Haag, profesor asistente den Universidad di New York a bisa: “Pornografía ta invitános pa mira hende solamente como pida di carni, como obheto pa explota pa satisface nos mes sintimento di placer.”

Pornografía també ta presenta un punto di bista di sexo trocí i idólatra cu hopi bez ta resulta den problema matrimonial. Segun un esposa hoven: “Lezamento di pornografía a hacími deseá for di mi casá cos abnormal pintá den buki. Esei a resulta den frustracion constante i desilusion sexual.” Na 1981 den un encuesta hací di varios cien hende muher tocante efecto di pornografía riba nan relacion cu nan esposo cu a leza pornografía durante nan bida. Casi mitá di nan a informa di cu esei a causa problema serio. En realidad el a destrui algun matrimonio of compromiso pa casa. Un esposa a lamenta: “Mi por solamente sopone cu mi ta inadecuado den bista dje necesidad i deseo di [mi esposo] pa satisfaccion sexual cu pornografía a duné . . . Ohalá cu mi ta un muher cu por satisfacele, pero e ta prefera plástic i papel i su necesidad a destrui un parti di mi. . . . Pornografía ta . . . contra amor . . . ta mahós, cruel i destructivo.”

Sin embargo, di mayor interés pa hovenan cristian ta e echo cu pornografía ta traha directamente contrario cu bo esfuerzo pa keda limpi den bista di Dios. (2 Corintio 6:17–7:1) E Bijbel ta mustra cu “debí na nan curazón sin gevoel” algun hende di tempo di antigua “a yega di ser mas ayá cu tur sintimento moral” i “a entregánan na conducta inmoral pa obra tur clase di impureza cu golosidad.” (Efesio 4:​18, 19) Bo kier experimenta tal corrupcion? No lubida, asta wakmento de bez en cuando di pornografía por tene efecto di haci bo concenshi dof. Esei ta hiba algun cristian hoven na masturbacion i, pior ainda, inmoralidad sexual. Pues, e cos sabí ta di traha duro pa keda liber di pornografía.

“Hopi bez pornografía ta net dilanti mi wowo,” segun e hoven yamá Daniel. “Pues mi ta keda obligá di miré ora mi hiza mi wowo; pero mi no tin cu fiha riba dje.” Sí, nenga di wak unda e ta ser desplega abiertamente, i nenga di laga compañé di scol tentábo pa waké. Manera Karen di 18 aña di edad a bisa: “Como un hende imperfecto ta basta difícil pa purba di tene mi mente fihá riba loke ta decente i digno di alabanza. Lo no ta tanto mas dificultoso si mi expresamente a leza pornografía?”

[Plachi na página 206]

“Oracion ta un toren di fortaleza instantáneo. Oracion ne momento cu e deseo ta presenta definitivamente ta yuda”