Capítulo 38
Kico tin den futuro pa mi?
“MI tin miedu di futuro, un futuro den un mundo yen di peliger di gera nuclear.” Esei ta loke un hoven alemán a bisa den un discurso dirigí ne oficial político di mas halto di su nacion.
Kizás e nachtmerrie di muri den un bola di candela nuclear ta daña bo bista di futuro també. Un hoven a puntra: “Pakico mi mester traha pa haya un bon raport? Mundo lo explota toch.” En berdad, den un encuesta di mucha di scol, mucha homber a menciona gera nuclear como e miedu di mas grandi cu nan tabatin. Mucha muher a poné como número dos, despues di miedu di “morto di mi mayornan.”
Sin embargo, un nubia nuclear den forma di padestoel, no ta e único nubia scur riba horizonte. E peliger di “demasiado hende, cabamento di material prima, contaminacion di ambiente,” i otro desaster binidero a hiba B. F. Skinner, e famoso sicólogo, pa conclui: “Ta parce awor cu e raza humano ta den peliger.” El a admiti despues: “Mi ta keda mashá pesimista. Nos realmente no ta bai resolve nos problema.”
Siendo cu asta observador studiá ta wak e futuro cu miedu, no ta straño mes cu hopi hoven ta desplega e actitud: “Bam come i bebe, pasobra mañan nos lo muri.” (1 Corintio 15:32) En berdad, si bo futuro ta depende di poder di homber político i científico, ta parce horrible en berdad. Pasobra Jeremías 10:23 ta bisa: “E camina di hende terrenal no ta pertenece na dje. No ta pertenece na hende cu sa camna di sikiera dirigi su paso.”
No ta e asunto so di cu hende no ta capaz pa goberna nan mes. Ripara cu no ta “pertenece” na hende pa haci esei—hende no tin derecho di dirigi e futuro dje tera. Pues, nan esfuerzo ta condená na fracaso. P’sei mes, Jeremías a pidi Dios interveni: “Corrigími, O Jehova, toch cu huicio.” (Jeremías 10:24) Esei kier men cu nos Creador lo determina nos futuro. Pero, ki futuro tini?
E propósito di Dios pe tera—i bo futuro
Poco despues dje creacion di hende, Dios a bisa e promé pareha humano: “Sea fructífero i bira hopi i yena e tera i dominé, i tene dominio riba piscá di lamá i di bestia bulador di cielo i di tur bestia bibiente cu ta move riba tera.” (Génesis 1:28) Asina hende a wordu presentá cu e prospecto di biba den un paradijs mundial.
Sin embargo, e promé pareha a rebela contra e gobernacion di Dios. Manera Salomón a skirbi despues: “E Dios berdadero a traha hende recto, pero nan mes a busca hopi plan.” (Eclesiastés 7:29) Plan di hende a resulta di ser desastroso, lagando e generacion actual un herencia di miseria i prospecto di futuro di mas deplorable.
Esei kier men cu Dios a bandona e tera pe bira un bola contaminá i radioactivo—i kizás sin bida? Imposible! Dios ta “Formador dje tera i Creador di dje, Esun cu a establecele firmemente, cu no a creé simplemente por nada, cu a formé asta pa ser habitá.” E propósito cu el a declara pe tera, pues, siguramente lo ser cumplí!—Isaías 45:18; 55:10, 11.
Pero, na ki tempo—i di ki manera? Leza pa bo mes Lucas capítulo 21. Jesús a profetiza ei net e problemanan cu a plaga humanidad durante e siglo aki: gera internacional, temblor, maleza, scarcidad di cuminda, crimen na tur parti. Kico tal sosodimento kier men? Jesús mes a splica: “Ora e cosnan ei ta cuminza sosode, stret boso curpa i hiza boso cabez, pasobra boso liberacion ta yegando cerca . . . . Ora boso ta mira e cosnan ei sosode, boso sa cu e reino di Dios ta cerca.”—Lucas 21:10, 11, 28, 31.
E Reino ta clave pa bo futuro. Bisá senciyamente, e Reino ta un gobierno, e gobierno di Dios pa goberna e tera. E gobierno real lo usa forza pa kita dominio di mundo for di man di hende. (Daniel 2:44) Net e hendenan “cu ta ruina e tera” tin cu enfrenta ruina den man di Dios ora e ta salba e tera—i humanidad—for di destruccion di abuso humano.—Revelacion 11:18; Eclesiastés 1:4.
Den siguridad bao di Reino di Dios, e tera gradualmente lo bira un paradijs mundial. (Lucas 23:43) Asina un balanza ecológico perfecto lo bolbe. Sí, asta lo tin armonía entre hende i bestia. (Isaías 11:6-9) Gera i arma di gera lo desparce. (Salmo 46:8, 9) Tur crimen, hamber, scarcidad di cas, maleza—asta morto mes—lo ser eliminá. Habitante di tera “en berdad lo haya nan gozo exquisito den e abundancia di paz.”—Salmo 37:10, 11; 72:16; Isaías 65:21, 22; Revelacion 21:3, 4.
Poniendo promesa di Dios na ‘prueba’
Bida eterna den un paradijs—esei por ta bo futuro! Pero aunque e idea por parce atractivo, kizás bo tin dificultad di bandona e kerimento di cu tur bon hende ta bai cielo, of kizás bo tin duda tocante e Bijbel mes. Asta algun hoven di Testigo di Jehova aveces ta haya nan fe alarmamente swak. Por ehempel, e mayornan di Michelle ta Testigo di Jehova i a crié den e berdad. Su aceptacion di cu e Bijbel ta berdad tabata mescos cu acepta e idea di cu dia ta sigi anochi. Pero, un dia el a realiza cu e no tabata sa pakico el a kere e Bijbel. El a bisa, “Mi ta sopone cu mi a keré pasobra mi mama i tata a keré.”
“Sin fe ta imposibel pa agrada Dios bon,” segun e Bijbel. (Hebreo 11:6) Pero, fe no ta algo cu bo ta haya door cu bo mama i tata tiné. Pa bo futuro ser sigur, bo tin cu edifica un fe fundá ariba evidencia sólido—un “anticipacion sigur di cosnan sperá.” (Hebreo 11:1) Manera e Bijbel ta bisa, bo tin cu “haci sigur di tur cos,” of segun un Bijbel menos literal, “pone na prueba tur loke ta wordu bisá pa keda sigur cu e ta berdad.”—1 Tesalonicense 5:21.
Convence bo mes cu e Bijbel ta berdad
Kizás bo tin cu haci prueba promé pa mira si e Bijbel berdaderamente ta “inspirá di Dios.” (2 Timoteo 3:16) Con bo por haci esei? Wel, Dios Todopoderoso so sin hera por ‘bisa e fin desde e principio.’ (Isaías 43:9; 46:10) I e ta haci esei bez tras bez den e Bijbel. Leza profecía skirbí den Lucas 19:41-44 i 21:20, 21 tocante e caimento di Jerusalem. Of profecía di Isaías 44:27, 28 i 45:1-4 tocante e caimento di Babilonia. Historia seglar ta confirma ki exacto e Bijbel a profetiza di tal sosodimento! Segun Janine di 14 aña di edad: “Despues di a examina algun profecía di dje, mi a keda asombrá pa mira con el a profetiza tur e cosnan ei.”
E exactitud histórico, onradez, franqueza, i falta di contradiccion di Bijbel ta otro motibo pa hende pone fe den e Bijbel.a Pero con bo por sa cu e manera cu Testigo di Jehova ta comprende e Bijbel ta correcto? Habitante dje stad di Berea di antigua no a acepta e splicacion di Bijbel cu apóstol Pablo a duna sin haci investigacion. Mas bien, nan a ‘examina e Scritura diariamente pa mira si e cosnan ei tabata asina.’—Echo 17:11.
Nos ta consehábo també pa haci un estudio di siñanza bíblico a fondo. E buki Kiko Beibel Ta Siña Realmente? (publicá dor di Testigonan di Jehova) ta publica tal siñanza di manera claro. Si bo mayornan ta Testigo di Jehova, sin duda nan por yudábo cu cualkier pregunta cu bo por tin. “Sea onrado cu bo mayornan si bo tin problema en relacion cu esei,” ta e sugerencia di un jufrow yamá Janel. “Haci pregunta si tin algo cu bo ta haya dificultoso pa kere.” (Proverbio 15:22) Sin duda, cu tempo lo bo comprende cu Jehova Dios en berdad ta bendiciona su Testigonan cu un comprendimento maraviyoso di berdad di Bijbel!
Segun un hoven yamá Prentice: “Tin bez cu mi ta hayámi den depresion tocante con e mundo tá. Mi ta busca texto tal como Revelacion 21:4, i esei ta dunámi algo pa spera.” Sí, un fe sólido den promesa di Dios siguramente por afecta bo punto di bista. Bo ta mira e futuro cu un anticipacion feliz, no cu depresion. Bo bida actual ta bira, no un lucha sin doel, sino un medio pa ‘warda siguramente pa bo mes un fundeshi excelente pe futuro, pa bo haya un gara firme riba e berdadero bida.’—1 Timoteo 6:19.
Pero, bo no tin cu haci mas pa bo alcanza e “berdadero bida” en bez di simplemente siña i kere siñanza bíblico?
[Nota]
a Mira bladji 58-68 dje buki Razonamiento a partir de las Escrituras, (publicá dor di Testigonan di Jehova) pa mas informacion en detaye tocante autenticidad dje Bijbel.
Pregunta pa consideracion Capítulo 38
◻ Hopi hoven ta tene cua miedu tocante nan futuro?
◻ Cua propósito Dios tabatin pe tera originalmente? Pakico nos por tene confianza cu e propósito di Dios no a cambia?
◻ Ki papel e Reino ta hunga den e cumplimento dje propósito di Dios pe tera?
◻ Pakico ta necesario pa haci prueba pa mira si siñanza bíblico ta e berdad, i con bo por haci esei?
◻ Con bo por convence bo mes cu e Bijbel ta inspirá di Dios?
[Komentario na página 306]
“Mi ta mashá pesimista. Nos realmente no por resolve nos problema.”—Sicólogo B. F. Skinner
[Plachi na página 307]
E Creador dje tera lo no laga hende ruina nos planeta
[Plachi na página 309]
Bo a convence bo mes di cu e Bijbel ta bisa e berdad?