Capítulo 1

Mensahe di cielo

REALMENTE, e Bijbel henter ta un mensahe di cielo cu nos Tata celestial a percura pa nos instruccion. Sin embargo, dos mensahe special tabata entregá casi dos mil aña pasá di parti di un angel cu ta “para cerca dilanti Dios.” Su nomber ta Gabriel. Láganos examina circunstancia dje dos bishita importante ne tera.

E aña tabata 3 PEC. Den ceru di Hudea, probablemente no mucho leu for di Jerusalem, a biba un sacerdote di Jehova Dios cu tabata yamá Zacarías. El a bira bieu i també su esposa Elisabet. I nan no tabatin ningun yiu. Zacarías a tuma su turno den e sirbishi di sacerdote den e tempel di Dios den Jerusalem. Di ripiente Gabriel a presenta na banda drechi dje altar di censia.

Zacarías a tene mashá miedu. Pero Gabriel a calma su miedu, bisando: “No tene miedu, Zacarías, pasobra bo súplica a wordu scuchá favorablemente, i bo esposa Elisabet lo bira mama di un yiu pa bo, i bo tin cu duné e nomber Juan.” Gabriel a sigi proclama cu Juan “lo ser grandi dilanti Jehova” i cu lo e “prepara pa Jehova un pueblo clá.”

Sin embargo, Zacarías no por a kere. Esei a parce asina imposibel na nan edad, esta, cu e i Elisabet por haya yiu. P’sei Gabriel a bisé: “Lo bo keda mudo i no por papia te ne dia cu e cosnan aki ta sosode, pasobra bo no a kere mi palabra.”

Wel, entre tanto, e pueblo pafó tabata pensa pakico Zacarías a tarda tanto tempo den e tempel. Ora el a sali finalmente, e no por a papia pero solamente por a haci seña cu su man, i nan a comprende cu el a mira algo sobrenatural.

Despues cu Zacarías a cumpli cu su tempo di sirbishi den e tempel, el a bai cas. I pronto despues, esei realmente a sosode—Elisabet a sali na estado! Mientras cu el a spera pe yiu nace, Elisabet a keda cas for di bista di hende pa cinco luna.

Despues, Gabriel a presenta atrobé. I cu ken el a papia? Esei tabata un soltera yamá María dje pueblo di Nazaret. Ki mensahe el a entrega e ora ei? Scucha! “Bo a haya fabor cerca Dios,” segun cu Gabriel a bisa María. “Mira! lo bo concibi den bo matriz i duna luz na un yiu homber, i bo tin cu duné e nomber Jesús.” Gabriel a sigi: “Esei lo ser grandi, i lo ser yamá Yiu dje Haltísimo; . . . i lo e reina como rey ariba e cas di Jacob pa semper, i lo no tin fin di su reino.”

Nos por keda sigur cu Gabriel a aprecia e privilegio di entrega tal mensahe. I mientras cu nos ta leza mas tocante Juan i Jesús, nos lo mira mas claramente net pakico tal mensahe di cielo tabata tanto importante. 2 Timoteo 3:16; Lucas 1:5-33.

▪ Cua dos mensahe importante a bini di cielo?

▪ Ken a entrega e dos mensahe i na ken el a entregánan?

▪ Pakico e dos mensahe tabata tanto dificultoso pa kere?