Capítulo 2

Onrá promé cu el a nace

DESPUES cu angel Gabriel a bisa e soltera María cu lo e duna luz na un yiu homber cu lo bira rey eterno, María a puntra: “Con esei por tá, siendo cu mi no ta tene relacion cu homber?”

Gabriel a splica, “Spiritu santo di Dios lo baha riba bo, i poder dje Haltísimo lo cubríbo cu sombra. P’sei mes també loke lo nace lo ser yamá santo, Yiu di Dios.”

Pa yuda María kere su mensahe, Gabriel a sigi: “I, mira! Elisabet bo pariente també a concibi un yiu den su behez, i esaki ta luna di seis pé caba, esun yamá stéril; pasobra en cuanto Dios ningun palabra ta un imposibilidad.”

María a acepta e palabra di Gabriel. I con el a responde? El a bisa: “Mira! esclaba di Jehova! Laga sosode cu mi segun bo declaracion.”

Pronto despues cu Gabriel a bai, María a preparele i a bai pa bishita Elisabet cu a biba cu su casá Zacarías den ceru di Hudea. For dje cas di María den Nazaret, esei tabata un biahe largu di kizás tres of cuater dia.

Ora María finalmente a yega na cas di Zacarías, el a drenta i a duna saludo. Cu esei Elisabet a yena cu spiritu santo, i a bisa María: “Bo ta bendita entre hende muher, i bendita ta fruta di bo matriz! Pakico mi tin e privilegio di recibi e bishita dje mama di mi Señor? Pasobra, mira! ora sonido di bo saludo a yega mi orea, e criatura den mi matriz a bula di gran alegría.”

Ora María a tende esei, el a responde cu gratitud di curazón: “Mi alma ta engrandece Jehova, i mi spiritu no por keda sin pasa over cu gozo pa causa di Dios mi Salbador; pasobra el a wak e puesto humilde di su esclaba. Pasobra, mira! djawor padilanti tur generacion lo declarámi feliz; pasobra e Poderoso a haci gran obra pa mi.” Pero, apesar di tur fabor cu María a recibi, el a duna tur onor na Dios. El a bisa: “Su nomber ta santo, i pa generacion tras generacion su misericordia ta ariba esnan cu ta temé.”

María a sigi alaba Dios cu un cantica profético inspirá, proclamando: “El a obra poderosamente cu su braza, el a plama na tur parti esnan cu ta halzá den intencion di nan curazón. El a tumba homber di poder for di trono i a halza hende humilde; esnan cu tabatin hamber el a satisface cu bon cosnan i a despacha bashí esnan cu tin riqueza. El a duna auxilio na Israel su sirbidor, pe corda misericordia, net manera el a bisa nos antepasado, na Abraham i na su simía, pa semper.”

María a pasa rond di tres luna cerca Elisabet, i sin duda tabata un gran yudanza pé durante e simanan final dje embarazo di Elisabet. Tabata excelente en berdad pe dos fiel hende muher, tur dos na estado cu ayudo di Dios, keda hunto ne tempo ei di bendicion den nan bida!

Bo a ripara e onor duná na Jesús asta promé cu el a nace? Elisabet a yamé “mi Señor,” i e yiu den su barica a bula cu alegría ora María a caba di yega. En cambio, otro hende despues a trata María i e yiu den su barica cu poco respet, segun cu nos lo mira. Lucas 1:26-56.

▪ Kico Gabriel a bisa pa yuda María comprende con e por sali na estado?

▪ Con Jesús tabata onrá promé cu el a nace?

▪ Kico María a bisa den un cantica profético den alabanza di Dios?

▪ Pa cuanto tempo María a keda cerca Elisabet, i pakico tabata apropiado pa María keda cerca Elisabet durante e tempo ei?