Capítulo 4

Embarazá pero no casá

MARIA tabata na estado pa tres luna caba. Bo ta corda cu el a pasa e promé parti di su embarazo bishitando Elisabet, pero despues a bolbe na su cas den Nazaret. Pronto su estado a sali na cla pa público den su pueblo. María, en berdad, tabata den un situacion penoso!

Loke a haci e situacion pior tabata cu María tabata comprometí pa bira esposa di carpinté José. I María tabata sa cu, bao dje ley di Dios duná na Israel, hende muher comprometí pa casa cu homber, pero cu boluntariamente a tene relacion sexual cu otro homber, tabatin cu ser piedrá matá. Con e por splica su embarazo na José?

Siendo cu María tabata ausente pa tres luna, nos por keda sigur cu José tabata ansioso pa miré. Ora nan a topa, probablemente María a bisa José loke a pasé. E por a haci su posibel pa splica cu el a sali na estado via e spiritu santo di Dios. Pero, segun cu bo por imaginábo, esei tabata un cos mashá dificultoso pa José kere.

José a conoce e bon nomber di María. I ta parce cu José a stimé mashá. Pero, apesar di loke María a bisa, realmente a parce cu e tabata na estado di otro homber. No obstante, José no tabata kier pe ser piedrá matá ni ser bergonzá públicamente. P’sei José a decidi di divorcié secretamente. Ne tempo ei, hende comprometí tabata considerá como casá caba, i divorcio tabata necesario pa termina e compromiso.

Mas tardi, ora José tabata pensando e cos ainda, el a bai drumi. Un angel di Jehova Dios a presenta na dje den un soño i a bisé: “No tene miedu di hiba María cas como bo esposa, pasobra e ta na estado cu e spiritu santo. Lo e duna luz na un yiu homber, i bo tin cu yama e yiu Jesús, pasobra lo e salba su pueblo for di nan picá.”

Ora José a lanta foi soño, ki agradicido el a keda! Sin tarda el a haci net loke e angel a bisé. El a hiba María na su cas. En efecto, tal accion público a sirbi como ceremonia matrimonial, dunando di conoce cu José i María tabata oficialmente casá. Pero José no a tene relacion sexual cu María durante cu e tabata na estado cu Jesús.

Mira! María tabata pisá cu yiu, pero José a poné riba burricu. Unda nan a bai, i pakico nan a haci biahe ya cu María tabata casi cla pa duna luz? Lucas 1:39-41, 56; Mateo 1:18-25; Deuteronomio 22:23, 24.

▪ Kico José a pensa ora el a tende cu María tabata na estado, i pakico?

▪ Con José por a divorcia María siendo nan no tabata casá ainda?

▪ Cua accion público a sirbi como ceremonia matrimonial pa José i María?