Capítulo 5

E nacimento di Jesús—unda i na ki tempo?

CÉSAR Augusto, emperador dje imperio romano, a decreta pa tur hende bolbe ne stad di nan nacimento pa inscripcion. Pues, José a bai na su lugar di nacimento, e stad di Betlehem.

Un cantidad di hende tabata den Betlehem pa inscribi, i e único lugar cu José i María por a haya posada tabata den stal di bestia. Jesús a nace ei, unda burricu i otro bestia a keda. María a loré den pida di paña i a poné den pesebre, un baki pa cuminda di bestia.

Siguramente tabata bao di direccion di Dios cu César Augusto a saca e ley tocante inscripcion. Esei a haci posibel pa Jesús nace den Betlehem, e stad cu e Scritura a profetiza hopi tempo promé cu lo ser e lugar di nacimento dje gobernante primintí.

Ki un anochi importante esei tabata! Den campo un luz briyante a luza rond di un grupo di wardador di carné. Esei ta e gloria di Jehova Dios! I un angel di Jehova a bísanan: “No tene miedu, pasobra, mira! mi ta declara boso bon nobo di un gran gozo cu tur pueblo lo haya, pasobra a nace na boso awe un Salbador, cu ta Cristo e Señor, den e stad di David. I esaki ta un siñal pa boso: boso lo haya un criatura lorá den banchi di tela i drumí den pesebre.” Di ripiente hopi mas angel a presenta i a canta: “Gloria na Dios den haltura ariba, i na tera paz entre hende di bon boluntad.”

Despues cu e angel a bai, e wardadornan a bisa un e otro: “Láganos di tur manera bai te na Betlehem i mira loke a sosode, locual Jehova a dúnanos di conoce.” Nan a bai purá i a haya Jesús net unda e angel a bisa cu nan lo hayé. Ora e wardadornan a conta loke e angel a bísanan, tur hende cu a tende di dje a straña. María a warda tur e palabra i a skírbinan den su curazón.

Hopi hende djawe ta kere cu Jesús a nace dia 25 di December. Pero December ta un tempo di awa i ta haci friu den Betlehem. Wardador di carné no ta pasa anochi den campo cu nan tao ne tempo ei. Tampoco, César romano muy probablemente no a exigi pa hende cu tabatin inclinacion rebelioso caba contra dje haci biahe asina den tempo di friu pa nan inscribi. Segun prueba, Jesús a nace na un tempo na principio di otoño dje aña. Lucas 2:1-20; Miqueas 5:2.

▪ Pakico José i María a bai te na Betlehem?

▪ Kico maraviyoso a sosode e anochi cu Jesús a nace?

▪ Con nos sa cu Jesús no a nace dia 25 di December?