Capítulo 6

E yiu dje promesa

EN BEZ di bolbe na Nazaret, José i María a keda den Betlehem. I ora Jesús a haci ocho dia di edad nan a laga circuncidé, manera e Ley di Dios duná na Moisés a manda. Ta parce cu tabata e costumber també pa duna yiu homber nan nomber na dia ocho. P’sei nan a yama nan yiu Jesús, manera angel Gabriel a bísanan promé.

Mas cu un luna a pasa, i Jesús tabatin 40 dia di edad. Unda su mayornan a hibé ne tempo ei? Ne tempel den Jerusalem, cu tabata un poco kilometer so di unda nan a biba. Segun e Ley di Dios duná na Moisés, 40 dia despues cu mama a duna luz na yiu homber, nan tabatin cu presenta un ofrenda di purificacion den e tempel.

Esei ta loke María a haci. El a hiba dos páhara chikito como su ofrenda. Esei ta mustra algo tocante e situacion económico di José i María. E Ley di Moisés a indica cu un lamchi macho, cu tin mas balor cu páhara, tabatin cu ser ofrecí. Pero si e mama no por a hacié, e por a ofrece dos totolica of paloma.

Den e tempel un anciano a tuma Jesús den su braza. Su nomber tabata Simeón. Dios a revela na dje cu lo e no muri promé cu e mira Cristo, of Mesías, cu Jehova Dios a priminti. Ora Simeón a yega ne tempel e dia ei, spiritu santo a dirigié cerca e mucha cu José i María a hiba.

Ora Simeón a tene Jesús, el a gradici Dios, bisando: “Awor, Soberano Señor, bo ta laga bo esclabo bai liber den paz segun bo declaracion; pasobra mi wowo a mira bo medio di salba cu bo a prepara den bista di tur pueblo, un luz pa kita belo for dje nacionan i un gloria pa bo pueblo Israel.”

José i María a keda asombrá di a tende esei. Anto Simeón a bendicionánan i a bisa María cu su yiu “ta ser poní pe caimento i lantamento atrobé di hopi den Israel” i cu tristeza, manera un spada skerpi, lo penetra su alma.

Presente ne ocasion tabata Ana, un profetisa di 84 aña di edad. Realmente, e semper tabata den e tempel. Net ne momento ei el a yega cerca i a cuminza duna agradicimento na Dios i a papia di Jesús cu tur hende cu kier a scucha.

Ki feliz tal sosodimento den e tempel a haci José i María! Siguramente, esei solamente a dúnanan mas confirmacion cu nan yiu tabata Esun cu Dios a priminti. Lucas 2:21-38; Levítico 12:1-8.

▪ A parce cu tabata e costumber na ki tempo pa duna yiu homber israelita nan nomber?

▪ Ki requisito tabatin pa mama israelita ora nan yiu homber a haci 40 dia di edad, i con cumplimento dje requisito a revela e situacion económico di María?

▪ Ken a reconoce identidad di Jesús ne ocasion ei, i di ki manera?