Capítulo 7

Jesús i astrólogo

UN grupo di homber a bini di oriente. Nan tabata astrólogo—hende cu ta bisa cu nan por duna e nificacion di strea. Ora nan tabata na cas den oriente, nan a mira un strea nobo, i nan a sigié pa cientos di kilometer te na Jerusalem.

Ora astrólogo a yega Jerusalem, nan a puntra: “Unda ta esun cu a nace rey di hudío? Pasobra nos a mira su strea ora nos tabata den oriente, i nos a bini pa rindié homenahe.”

Ora rey Herodes di Jerusalem a tende di esei, el a keda mashá molestiá. P’sei el a yama tur sacerdote principal i a púntranan unda Cristo mester nace? Fundando nan contesta riba e Scritura, nan a contesta: “Den Betlehem.” Anto Herodes a manda pe astrólogonan wordu trecí cerca dje i el a bísanan: “Bai haci un buscamento cuidadoso pe mucha, i ora boso hayé, bolbe informámi, pa mi bai també i rindi homenahe.” Pero, realmente, Herodes kier a haya e mucha pa maté!

Despues cu nan a bai, algo asombroso a sosode. E strea cu nan a mira ora nan tabata den oriente a bai dilanti nan. Claramente esei no tabata un gewoon strea, sino a wordu percurá specialmente pa guíanan. Astrólogo a sigi tras di dje te cu el a para net ariba dje cas unda José i María a keda.

Ora e astrólogonan a drenta den e cas, nan a haya María cu su yiu chikito, Jesús. Anto nan tur a buig pe. I nan a saca for di nan sacu regalo di oro, olíbano i mirra. Despues, ora nan tabata cla pa bolbe i bisa Herodes unda e mucha tabata, Dios a advertínan den un soño pa no haci esei. Pues, nan a bolbe pa nan mes tera usando otro camina. Ken bo ta kere a percura e strea cu a move den cielo pa guía e astrólogonan? No lubida cu e strea no a guíanan directamente na Jesús den Betlehem. Mas bien, el a guíanan na Jerusalem unda nan a haya contacto cu rey Herodes, cu tabata kier mata Jesús. I e por a maté si Dios no a entremete i a adverti astrólogo pa no bisa Herodes unda Jesús tabata. Satanás e Diabel, enemigo di Dios, tabata esun cu kier a mata Jesús, i el a usa e strea haciendo esfuerzo pa cumpli cu su propósito. Mateo 2:1-12; Miqueas 5:2.

▪ Kico ta mustra cu e strea cu astrólogo a mira no tabata un gewoon strea?

▪ Unda Jesús tabata ora astrólogo a hayé?

▪ Pakico nos sa cu Satanás a percura e strea pa guía e astrólogonan?