Capítulo 15

E promé milagro di Jesús

A HACI solamente un of dos dia desde cu Andrés, Pedro, Juan i kizás Santiago, Felipe i Natanael a bira e promé disípelnan di Jesús. Awor nan tabata riba camina pa cas den e districto di Galilea, di unda nan tur a bini. Nan destino tabata Caná, e stad di nacimento di Natanael, situá den ceru no mucho leu for di Nazaret unda Jesús mes a lanta. Nan a haya invitacion pa un fiesta di casamento den Caná.

E mama di Jesús també a bai ne casamento. Como un amiga dje famía dje hendenan cu a casa, ta parce cu María tabata enbolbí den administracion di necesidad dje cantidad di invitados. P’sei María a ripara un bez un falta, locual el a mencioná cu Jesús: “Nan no tin biña.”

Pues, ora María, en efecto, a sugeri pa Jesús haci algo tocante e falta di biña, Jesús na principio no tabatin gana di hacié. El a puntra: “Kico mi tin cu ber cu bo?” Como Rey ungí di Dios, su famía i amigonan no mag dirigié den su actividad. P’sei, María prudentemente a laga e asunto den man di su yiu, simplemente bisando e criánan: “Haci loke e ta bisa boso.”

Wel, tabatin seis tinashi grandi di awa ei, cada un por a contene mas cu 40 liter. Jesús a bisa e criánan: “Yena tinashi cu awa.” I e criánan a yénanan te na rand. Anto Jesús a bisa: “Saca un poco awor i hibé pe director dje fiesta.”

E director a keda impresioná cu e calidad excelente dje biña, sin sa cu un milagro a producié. Yamando e bruidegom, e dí: “Tur otro hende ta saca e biña excelente promé, i despues cu hende ta burachi, ta saca e inferior. Pero bo a warda e biña excelente te awor.”

Esei tabata e promé milagro di Jesús, i ora e disípelnan nobo a miré, nan fe a bira mas fuerte. Despues, hunto cu su mama i mitá rumanan, nan a bai ne stad di Capernaum cerca Lamá di Galilea. Juan 2:1-12.

▪ Na ki tempo durante e ministerio di Jesús tabatin e casamento den Caná?

▪ Pakico Jesús no tabatin gana di sigi sugerencia di su mama?

▪ Ki milagro Jesús a haci, i con esei a afecta otro hende?