Capítulo 25

Compasion pa un hende leproso

ORA Jesús i su cuater disípel a bishita stad di Galilea, noticia dje cosnan maraviyoso cu el a haci a plama den tur e districto. Palabra di su obra a yega te na un stad unda tabatin un homber enfermo cu lepra. Docter Lucas a bisa cu e homber tabata “yen di lepra.” Despues di tempo e maleza spantoso ta desfigura poco poco varios parti di curpa di hende. Pues, e homber leproso tabata den un estado lastimoso.

Ora Jesús a yega ne stad, e homber leproso a acudi na dje. Segun e ley di Dios, hende leproso tabatin cu grita e spiertamento, “Impuro, impuro!” pa proteha otro hende di yega mucho cerca i risca infeccion. Anto e homber leproso a cai boca abao i a roga Jesús: “Señor, si bo solamente kier, bo por hacími limpi.”

Cuanto fe e homber a pone den Jesús! Toch, ki un aparencia lastimoso su maleza mester a duné! Kico Jesús a haci? Kico lo bo a haci? Conmoví pa compasion, Jesús a saca su man i a toca e homber, bisando: “Mi kier. Sea limpi.” I un bez e lepra a desaparece foi dje.

Bo kier un persona tanto compasivo como esei como bo rey? E manera cu Jesús a trata cu e homber leproso ta duna nos confianza di cu durante e gobernacion di su Reino e profecía bíblico lo ser cumplí: “Lo e sinti duele di hende humilde i di hende pober, i alma di hende pober lo e salba.” Sí, ne tempo ei Jesús lo cumpli cu e deseo di su curazón di yuda tur hende afligí.

Asta promé cu Jesús a cura e homber leproso, su ministerio tabata causa gran excitacion den pueblo. Na cumplimento dje profecía di Isaías, awor Jesús a manda e homber curá: “Mira pa bo no bisa nada na ningun hende.” Anto el a instrui e homber: “Bai mustra bo mes ne sacerdote i haci ofrenda relacioná cu bo limpieza manera Moisés a manda, como un testimonio pa nan.”

Pero e homber tabata asina feliz cu e no por a keda ketu tocante e milagro. El a bai i a cuminza plama e noticia na tur parti, i a parce di a causa tanto interés i curiosidad den pueblo cu Jesús no por a sali abiertamente den e stad. P’sei Jesús a keda den lugar desolá unda hende no a biba, i hende na tur parti a bai ei pa scuché i pa ser curá di nan maleza. Lucas 5:12-16; Marco 1:40-45; Mateo 8:2-4; Levítico 13:45; 14:10-13; Salmo 72:13; Isaías 42:1, 2.

▪ Ki efecto lepra por tene riba hende, i cua spiertamento tabata duná na un homber leproso?

▪ Con un homber leproso a apela na Jesús, i kico nos por siña for dje reaccion di Jesús?

▪ Kico a pasa ora e homber curá no a obedece Jesús, i cu ki consecuencia?