Capítulo 26

Den Capernaum di nobo

NE TEMPO ei e fama di Jesús a plama leu na tur parti, i hopi hende a bini unda e tabata keda den lugarnan poco conocí. Sin embargo, despues di algun dia Jesús a bolbe na Capernaum cant’i Lamá di Galilea. Pronto e noticia a plama den tur e stad cu Jesús a yega atrobé, i hopi hende a bini ne cas unda e tabata. Fariseo i maestro di Ley a bini di tanto leu como Jerusalem.

E multitud tabata asina grandi cu hende no por a drenta e cas i no tabatin lugar pa otro hende drenta. E situacion tabata cla pa un sosodimento berdaderamente notable. Loke a sosode ne ocasion ta di importancia vital, pasobra esei ta yúdanos comprende cu Jesús tabatin e poder di elimina e causa di sufrimento humano i restora salud na tur hende cu e kier cura.

Durante cu Jesús tabata siña e multitud, cuater homber a yega ne cas cu un homber paralítico riba cama. Nan kier pa Jesús cura nan amigo, pero debí ne multitud nan no por a drenta. Ki un desilusion! Toch nan no a entrega. Nan a subi ariba e dak plat, a kita panchi i a habri un burraco den dje, i a vier e cama abao cu e homber paralizá riba dje net cant’i Jesús.

Jesús a rabia debí ne interrupcion? Di ningun manera! Mas bien, nan fe a impresioné profundamente. El a bisa e paralítico: “Bo picánan ta pordoná.” Pero, Jesús realmente por a pordona picá? Scriba i fariseo a kere cu no. Nan a razona den nan curazón: “Pakico e homber ei ta papia asina? E ta blasfema. Ken por pordona picá sino Dios so?”

Sabiendo loke nan a pensa, Jesús a púntranan: “Pakico boso ta razona tal cosnan den boso curazón? Cua ta mas fácil, bisa e paralítico, ‘Bo picánan ta pordoná,’ of bisa, ‘Lanta i coge bo cama i camna’?”

Anto, Jesús a permiti e multitud, incluyendo hende crítico di dje, di mira un demonstracion notable cu a revela cu e tabatin autoridad di pordona picá riba tera i cu e en berdad ta e homber di mas grandi cu a yega di biba. El a dirigié ne paralítico i a bisa: “Lantábo, coge bo cama i bai cas.” I el a lanta un bez, saliendo cu su cama dilanti nan tur! Cu asombro e pueblo a duna gloria na Dios i a sclama: “Nos nunca a mira cos semehante di esei”!

Bo a ripara cu Jesús a menciona picá en conexion cu maleza i cu pordón di picá ta relacioná cu recobramento di salud fisical? E Bijbel ta splica cu nos promé tata Adam a peca i cu nos tur a hereda consecuencia di tal picá, esta, maleza i morto. Pero, bao di gobernacion dje Reino di Dios, Jesús lo pordoná picá di tur hende cu ta stima i ta sirbi Dios, anto tur maleza lo ser eliminá. Ki excelente esei lo tá! Marco 2:1-12; Lucas 5:17-26; Mateo 9:1-8; Romano 5:12, 17-19.

o▪ Con e situacion tabata cla pa un sosodimento berdaderamente notable?

▪ Con e paralítico a yega cerca Jesús?

▪ Pakico nos tur ta pecador, pero con Jesús a percura e speranza di cu pordón di nos picánan i restoracion di nos salud perfecto ta posibel?