Capítulo 27

E yamamento di Mateo

POCO despues di a cura e homber paralítico, Jesús a sali for di Capernaum i a yega na Lamá di Galilea. Atrobé un multitud di hende a bini cerca dje ei, i el a cuminza síñanan. Mientras cu el a sigi camna, el a mira Mateo, cu també tabata yamá Leví, sintá den oficina di belasting. Jesús a duné un invitacion, “Sea sigidor di mi.”

Probablemente Mateo a conoce e siñanza di Jesús caba, mescos cu Pedro, Andrés, Santiago i Juan ora nan tabata yamá. I mescos cu nan, Mateo a reacciona un bez ne invitacion. El a lanta, a laga atrás su responsabilidad como cobrador di belasting, i a sigi Jesús.

Mas tardi, tal bez pa celebra recibimento di su yamamento, Mateo a pone un fiesta grandi di recepcion den su cas. Además di invita Jesús i su disípelnan, asociado di antes di Mateo tabata presente. Generalmente otro hudío a desprecia tal hende pasobra nan a cobra belasting pa autoridad romano cu hudío a odia. Además, hopi bez desonradamente, nan a ranca mas placa for di pueblo cu e belasting cu nan mester a paga.

Mirando Jesús ne fiesta cu hende asina, fariseo a puntra disípel di dje: “Pakico boso maestro ta come cu cobrador di belasting i hende pecador?” Tendiendo e pregunta, Jesús a contesta fariseo: “Hende den bon salud no tin mester di docter, sino hende enfermo. Bai, pues, i siña loke esaki kier men, ‘Mi kier misericordia, i no sacrificio.’ Pasobra mi a bini pa yama, no hende husto, sino hende pecador.”

Ta parce cu Mateo a invita cobrador di belasting na su cas pa nan por scucha Jesús i recibi curacion spiritual. P’sei Jesús a asociá cu nan pa yúdanan alcanza un relacion saludable cu Dios. Jesús no a desprecia hende asina, manera fariseo cu a kere cu nan tabata husto caba. Mas bien, Jesús a sinti compasion pa nan i, en efecto, a sirbi como un médico spiritual pa nan.

Pues, ora Jesús a eherce misericordia pa pecador, esei no kier men cu el a consenti cu nan picá sino a expresa tierno sintimento pa nan mescos cu el a haci pa hende físicamente enfermo. Por ehempel, corda ora den su compasion el a saca su man i a toca e homber leproso i a bisa: “Mi kier. Sea limpi.” Laga nos di igual manera mustra misericordia yudando hende den necesidad, specialmente yudando nan na moda spiritual. Mateo 8:3; 9:9-13; Marco 2:13-17; Lucas 5:27-32.

▪ Unda Mateo tabata ora Jesús a miré?

▪ Ki ofishi Mateo tabatin, i pakico otro hudío a desprecia hende asina?

▪ Ki keho a wordu hací contra Jesús, i con Jesús a responde?

▪ Pakico Jesús a asocia cu hende pecador?