Capítulo 30

Contestando acusador di dje

ORA guía religioso hudío a acusa Jesús di violacion di sabat, el a contesta: “Mi Tata a sigi traha te awor, i mi ta sigi traha.”

Apesar di acusacion di fariseo, e trabao di Jesús no tabata e trabao cu e ley di sabat a prohibí. Su trabao di predica i haci curacion tabata un asignacion di Dios, i imitando ehempel di Dios, Jesús a sigi haci esei tur dia. Sin embargo, su contesta a haci hudío asta mas rabiá cu nan tabata promé, i nan a haci percuracion pa maté. Pakico?

Pasobra awor nan no solamente a kere cu Jesús a viola e sabat sino també a considera cu su declaracion di ser Yiu personal di Dios tabata blasfemia. Sin embargo, Jesús no a tene miedu i a dúnanan otro contesta tocante su relacion favorecí cu Dios. “E Tata tin cariño pe Yiu,” segun Jesús, “i ta mustré tur loke e mes ta haci.”

Jesús a sigi: “Mescos cu e Tata ta lanta hende morto, . . . asina e Yiu també ta haci biba ken cu e kier.” En berdad, e Yiu tabata lanta hende morto caba den un sentido spiritual! “Ken cu ta tende mi palabra i ta kere esun cu a mandámi,” Jesús a bisa, “a pasa for di morto na bida.” Sí, segun Jesús: “E ora ta bini, i ta awor, ora hende morto lo tende e boz dje Yiu di Dios i esnan cu a haci caso lo biba.”

Aunque te ne tempo ei, no tin cuenta di cu Jesús literalmente a lanta hende for di morto, el a bisa acusador di dje cu tal resureccion literal di hende morto lo sosode. “No straña riba esei,” Jesús a bisa, “pasobra e ora ta bini den cua tur esnan den graf memorial lo tende su boz i sali.”

Ta parce cu te ne momento ei Jesús nunca a duna detaye públicamente di su papel vital den e propósito di Dios usando palabra claro i definitivo. Pero acusador di Jesús tabatin mas cu e testimonio di dje tocante tal cosnan. Jesús a hácinan corda: “Boso a despacha hende na Juan i el a duna testimonio dje berdad.”

Solamente dos aña promé, Juan bautista a bisa guía religioso hudío di Esun biniendo despues di dje. Haciendo nan corda e aprecio halto cu nan tabatin na antes di Juan cu awor tabata encarcelá, Jesús a bisa: “Boso pa un poco tempo a keda dispuesto pa alegra mashá den su luz.” Jesús a hácinan corda esei cu e speranza di yúdanan, sí, sálbanan. Pero, Jesús no a depende dje testimonio di Juan.

“E obranan mes cu mi ta haci [incluyendo e milagro cu el a caba di haci] ta duna testimonio di mi di cu e Tata a despachámi.” Pero, además di esei, Jesús a sigi: “E Tata cu a mandámi, e mes ta duna testimonio di mi.” Por ehempel, Dios a duna testimonio di Jesús na su bautismo, bisando: “Esei ta mi Yiu, esun stimá.”

Realmente, acusador di Jesús no tabatin excuus pa nan rechazamento di dje. E Scritura mes cu nan a bisa cu nan a rista, a duna testimonio di dje! Jesús a conclui: “Si boso ta kere Moisés boso mester kerémi, pasobra esei a skirbi tocante mi. Pero si boso no ta kere e skirbimento di dje, con boso por kere mi palabra?” Juan 5:17-47; 1:19-27; Mateo 3:17.

▪ Pakico e trabao di Jesús no tabata un violacion dje sabat?

▪ Ki detaye Jesús a duna di su papel vital den e propósito di Dios?

▪ Pe duna prueba cu e tabata e Yiu di Dios, Jesús a siñala ne testimonio di ken?