Capítulo 33

Cumpliendo cu e profecía di Isaías

DESPUES cu Jesús a tende cu fariseo i sigidor di partido di Herodes a planeá pa maté, Jesús i su disípelnan a retiránan te na Lamá di Galilea. Tabatin un multitud grandi cu a acudi na dje ei di tur parti di Palestina, i di asta pafó di su frontera. El a cura hopi hende, cu e resultado di cu tur hende cu enfermedad doloroso a forza padilanti pa nan toqué.

Door cu e multitud tabata asina grandi, Jesús a bisa su disípelnan tene un boto continuamente na su disposicion. Door di hala un poco distancia for di tera, tabata posibel pe multitud no primié. E por a síñanan for di boto of bai na otro lugar cant’i awa pa yuda hende ei.

Disípel Mateo a skirbi cu actividad di Jesús a cumpli cu “loke Isaías e profeta a papia.” Anto Mateo a skirbi e profecía cu Jesús a cumpli, esta:

“Mira! mi sirbidor cu mi a scoge, mi stimá, cu mi alma a aprobá! Lo mi pone mi spiritu riba dje, i lo e aclara pe nacionan loke ta husticia. Lo e no pleita, ni hiza su boz, ni ningun hende lo tende su boz den camina hanchu. Ningun caña kibrá lo e machica, ni lo no paga ningun mecha di linen cu ta huma, te cu e saca husticia cu bon éxito. En berdad, e nacionan lo spera den su nomber.”

Naturalmente Jesús ta e sirbidor stimá cu Dios ta aprobá. I Jesús a haci claro loke ta berdadero husticia, cu tradicion di religion falso ta sconde. Debí na nan aplicacion inhusto dje ley di Dios, fariseo ni sikiera a yuda hende enfermo riba dia di sabat! P’sei, haciendo claro e husticia di Dios, Jesús a aliviá hende dje carga pisá di tradicion inhusto, i p’sei guía religioso a purba di maté.

Kico kier men cu ‘lo e no pleita, ni hiza su boz pa hende tendé den camina hanchu’? Wel, ora Jesús a cura hende, el a ‘mándanan estrictamente pa no duna di conoce esei.’ E no tabata kier pa nan haci propaganda ruidoso pe na caya ni pa un boca bisa otro na moda excitá i troce e berdad.

També, Jesús a hiba su mensahe di consuelo na hende cu simbólicamente tabata manera caña machicá, doblá i trapá. Nan tabata manera mecha di linen humando, kende su último flam di bida casi a paga. Jesús no a machica e caña kibrá ni no a paga e flam dje mecha humando i cerca di paga. Ma cu compasion i amor e aptamente a lanta hende manso. Jesús en berdad tabata esun den ken e nacionan por spera! Mateo 12:15-21; Marco 3:7-12; Isaías 42:1-4.

▪ Con Jesús a aclara husticia, sin pleitamento ni gritamento den camina hanchu?

▪ Ken ta manera caña kibrá i mecha di linen, i con Jesús a trátanan?