Capítulo 38

Juan a falta fe?

JUAN bautista, cu a pasa un aña den prisón caba, a tende e noticia dje resureccion dje yiu dje biuda di Naín. Pero Juan kier a tende directamente for di Jesús e nificacion di esei, pues el a manda dos disípel di dje pa puntra: “Bo ta Esun cu ta bini of nos tin cu spera un otro?”

Esei por parce un pregunta straño specialmente ya cu Juan a mira e spiritu di Dios baha riba Jesús i a tende e boz di aprobacion di Dios ora Juan a bautizé casi dos aña promé. E pregunta di Juan por a haci algun hende conclui cu su fe a bira swak. Pero esei no tabata e caso. Jesús lo no a duna un recomendacion tanto halto di Juan, cu el a haci ne ocasion ei, si Juan a cuminza duda. Pakico, anto, Juan a haci e pregunta?

Juan simplemente por a deseá un confirmacion di parti di Jesús di cu e tabata Mesías. Esei por a fortalece Juan mashá mientras cu el a pena den prisón. Pero aparentemente tabatin mas den e pregunta di Juan cu esei. Ta parce cu e kier sa si ta bini un otro, esta, un sucesor, cu lo completa cumplimento di tur loke tabata profetizá cu Mesías lo haci.

Segun profecía bíblica, cu Juan a conoce, e Ungí di Dios tabatin cu ser rey i libertador. Pero ainda Juan tabata preso, asta hopi luna despues di bautismo di Jesús. Pues, ta parce cu Juan tabata puntra Jesús: ‘Bo ta esun cu lo establece e Reino di Dios cu poder visibel, of lo tin un otro, un sucesor, cu nos tin cu spera pa cumpli cu tur profecía maraviyoso tocante e gloria di Mesías?’

En bez di bisa disípel di Juan, ‘Naturalmente mi ta esun cu mester bini!’ Net ne tempo ei Jesús a haci demonstracion notable di cura hopi hende di tur sorto di maleza i enfermedad. Anto el a bisa disípel di Juan: “Bai i bisa Juan loke boso a mira i a tende: hende ciegu ta recibi bista, hende coho ta camna, hende leproso ta keda limpi i hende surdo ta tende, hende morto ta ser lantá, hende pober ta ser bisá e bon nobo.”

Es decir, e pregunta di Juan por a indica cu el a spera pa Jesús haci mas cu loke el a haci, i kizás duna Juan mes su libertad. Pero Jesús tabata bisa Juan no spera mas cu e milagronan cu Jesús tabata haci.

Despues cu disípel di Juan a bai, Jesús a dirigí palabra ne multitud i a bísanan cu Juan ta e “mensahero” di Jehova profetizá den Malaquías 3:1 i també ta profeta Elías profetizá den Malaquías 4:5, 6. Asina el a elogiá Juan como igual cu cualkier profeta cu a biba promé cuné, splicando: “En berdad mi ta bisa boso, Di esnan cu a nace di hende muher no a lanta uno mayor cu Juan bautista; pero hende cu ta menor den e reino di cielo ta mayor cuné. Pero desde e dianan di Juan bautista te awor e reino di cielo ta e meta cu hende ta forza pa alcanza.”

Asina Jesús a mustra cu Juan lo no ta den e Reino celestial, siendo cu uno menor den dje lo ta mayor cu Juan. Juan a prepara e camina pa Jesús, pero su morto a tuma lugar promé cu Cristo a seya e pacto, of conbenio, cu su disípelnan pa nan ser co-gobernante cuné den su Reino. P’sei Jesús a bisa cu Juan lo no ta den e Reino celestial. Mas bien, Juan lo ta un ciudadano terrenal dje reino di Dios. Lucas 7:18-30; Mateo 11:2-15.

▪ Pakico Juan a puntra si Jesús tabata Esun cu mester bini of si e mester spera un otro?

▪ Segun Jesús, Juan a cumpli cu cua profecía?

▪ Pakico Juan bautista lo no ta den cielo cu Jesús?