Capítulo 41

Un centro di discusion

UN poco tempo despues cu Simón a recibi Jesús den su cas, el a cuminza su segundo biahe pa predica den Galilea. Durante su biahe di antes den e territorio ei, Pedro, Andrés, Santiago, i Juan, su promé disípelnan, a compañé. Pero awor tur 12 apóstol a compañé, i també cierto hende muher. Eseinan a inclui María Magdalena, Susana, i Juana, kende su casá tabata un oficial di rey Herodes.

Mientras mas e trabao dje ministerio di Jesús a intensifica, mas discusion tabatin tocante su actividad. Hende a trece cerca Jesús un homber endemoniá cu també tabata ciegu i mudo. Ora Jesús a curé, di manera cu e tabata liber di poder di demoño i por a papia i també mira, e multitud simplemente a perde dominio. Nan a cuminza puntra: “Esei tal bez no por ta e Yiu di David?”

Un multitud asina grandi a reuni rond dje cas unda Jesús tabata keda, cu e i su disípelnan ni sikiera por a tuma cuminda. Además di hende cu a considera cu e kizás tabata e “Yiu di David” primintí, tabatin scriba i fariseo cu a bini tur e distancia foi Jerusalem pa desacredité. Ora pariente di Jesús a tende dje gran desordu cu hende a haci tocante Jesús, nan a bini pa hibé. Pa ki motibo?

Wel, e rumanan mes di Jesús ainda no a kere cu e tabata Yiu di Dios. Además, e desordu público i contencion cu el a crea tabata totalmente contrario cu loke nan tabata sa di Jesús tempo cu el a lanta den Nazaret. P’sei, nan a kere cu algo serio a falta Jesús mentalmente. Nan a conclui cu “El a bira loco,” i nan a bai pa cogé i hibé cas.

Sin embargo, tabatin evidencia claro cu Jesús a cura e homber endemoniá. Scriba i fariseo sa cu nan no por nenga e realidad di esei. Pues, pa nan desacredita Jesús, nan a bisa e pueblo: “E homber ei no ta saca demoño sino pa medio di Beelzebub, e gobernante di demoño.”

Sabiendo loke nan tabata pensa, Jesús a yama scriba i fariseo cerca dje i a bísanan: “Tur reino partí contra su mes ta yega na desolacion, i tur stad of cas cu ta partí contra su mes no por permanece. Di igual manera, si Satanás ta saca Satanás, el a bira partí contra su mes; con, anto, su reino por permanece?”

Ki lógico destructivo! Siendo cu fariseo a bisa cu hende di nan partido a saca demoño, Jesús també a puntra: “Si mi ta saca demoño pa medio di Beelzebub, pa medio di ken boso yiunan ta sácanan?” Es decir, nan acusacion contra Jesús por wel ta aplicá tanto na nan como na Jesús. Anto Jesús a duna advertencia: “Pero, si mi ta saca demoño cu e spiritu di Dios, e reino di Dios berdaderamente a alcanza boso.”

Pa ilustra cu su sacamento di demoño tabata evidencia di su poder ariba Satanás, Jesús a bisa: “Con hende por invadi e cas di un homber fuerte i coge su propiedad movible, amenos cu nan promé ta mara e homber fuerte? Anto e ora ei nan por plunder su cas. Ken cu no ta di mi parti ta contra mi, i ken cu no ta recoge cu mi ta plama.” Fariseo tabata claramente contra Jesús, demonstrando cu nan tabata representante di Satanás. Nan tabata plama israelita leu foi Jesús.

P’sei Jesús a adverti tal opositor satánico di cu “blasfemia contra e spiritu lo no ser pordoná.” El a splica: “Ken cu ta papia un palabra contra e Yiu di hende, esei lo ser pordoná na ne; pero ken cu ta papia contra e spiritu santo, esei lo no ser pordoná ne, no, ni den e sistema di cosnan aki ni den esei cu ta bini.” Tal scriba i fariseo a comete picá impordonabel, bisando cu malicia cu Satanás a haci loke tabata claramente un obramento milagroso dje spiritu santo di Dios. Mateo 12:22-32; Marco 3:19-30; Juan 7:5.

▪ Di ki manera e segundo biahe di Jesús den Galilea tabata diferente cu e promé?

▪ Pakico pariente di Jesús a haci esfuerzo pa coge Jesús?

▪ Con fariseo a haci esfuerzo pa desacreditá milagro di Jesús, i con Jesús a desmentínan?

▪ Fariseo tabata culpable di kico, i pakico?