Capítulo 44

Calmando un tempestad spantoso

E DIA di Jesús tabata yen di actividad, incluyendo siñamento di un multitud na oriya di lamá i despues splicando su comparacion privadamente na su disípelnan. Ora anochi a yega, el a bisa: “Bam pe otro banda.”

Na otro banda pariba di Lamá di Galilea tabatin e tera yamá Decápolis, dje palabra griego deka, cu kier men “diez,” i polis, cu kier men “stad.” Stad di Decápolis tabata e centro di cultura griego, aunque sin duda hopi hudío també a biba ei. Sin embargo, e actividad di Jesús den e tera ei tabata mashá limitá. Asta ne bishita ei, manera nos lo mira despues, el a wordu strobá di keda hopi tempo.

Ora Jesús a pídinan bai pe otro banda, e disípelnan a hibé den e boto. Sin embargo, hende a míranan bai. Pronto otro hende a barca pa compañánan. No tabata leu pe otro banda. Realmente, Lamá di Galilea ta solamente un lagún grandi, rond di 21 km largu i un máximo di 12 km hanchu.

Ta di comprende cu Jesús tabata cansá. Pues, asina cu nan a laga cai, el a bai drumi den e parti patrás dje boto, a pone su cabez riba cusinchi, i a pega un soño profundo. Varios apóstol di dje tabata marinero cu experencia, ya cu nan a pisca hopi den Lamá di Galilea. Pues, nan tabata na mando nabegando e boto.

Pero esei no tabata un nabegacion fácil. Debí ne temperatura mas halto riba superficie dje awa, locual ta rond di 210 meter bao di nivel di lamá, i e aire friu di montaña cerca dje, tabatin bez cu bientu fuerte a baha di ripiente i a crea tempestad di bientu violento riba e lagún. Esei ta loke a sosode e ora ei. Pronto ola tabata zuta e boto i tabata yené, di manera cu e tabata cerca di sink. Pero, Jesús a sigi drumi!

Marinero cu experencia a traha frenéticamente pa stuur e boto. Sin duda nan a nabega den tempestad caba. Pero awor nan tabata cerca e fin di nan poder. Teniendo miedu cu nan por perde nan bida, nan a lanta Jesús foi soño. Nan a grita, ‘Maestro, no ta importábo? Nos ta sink! Sálbanos, nos ta bai hoga!’

Lantando foi soño, Jesús a manda e bientu i lamá: “Calmábo! keda ketu!” I e bientu fuerte a baha i lamá a bira calmo. Enfrentando su disípelnan, el a puntra: ‘Pakico boso a tene miedu asina? Boso no tin fe ainda?’

E ora ei un temor raro a domina e disípelnan. Nan a puntra otro, ‘Ken realmente ta e homber ei? Pasobra e ta duna ordu asta na bientu i na lamá, i nan ta obedecele.’

Ki poder Jesús a demonstra! Cuanto siguranza esei ta dúnanos, sabiendo cu nos Rey tin poder riba elemento natural i cu ora su plena atencion ta dirigí ne tera durante e gobernacion di su Reino, tur hende por biba den siguridad, protehá contra calamidad natural spantoso!

Un poco tempo despues cu e tempestad a calma, Jesús i su disípelnan a yega sano i salbo ne oriya pariba. Kizás e otro botonan a scapa for di intensidad dje tempestad i a bolbe cas sano i salbo. Marco 4:35–5:1; Mateo 8:18, 23-27; Lucas 8:22-26.

▪ Kico tabata Decápolis, i unda e tabata situá?

▪ Cua circunstancia fisical tabata responsabel pe tempestad violento riba Lamá di Galilea?

▪ Ora nan capacidad di nabega no por a sálbanan, kico e disípelnan a haci?