Capítulo 51
Asesinato durante fiesta di cumpliaña
DESPUES di a duna instruccion na su apóstolnan, Jesús a mándanan den e territorio dos dos. Probablemente e dos ruman Pedro i Andrés a bai hunto, mescos cu Santiago i Juan, Felipe i Bartolomeo, Tomás i Mateo, Santiago i Tadeo, i Simón i Hudas Iscariote. E seis par di evangelizador a declara e bon nobo di Reino i a haci curacion milagroso unda cu nan a bai.
Entretanto, Juan bautista tabata den prisón ainda. El a haci casi dos aña cerá caba. Kizás bo ta corda cu Juan a declara públicamente cu tabata malu pa Herodes Antipas tuma Herodías, esposa di su ruman Felipe, como su mes esposa. Siendo cu Herodes Antipas a bisa cu e tabata sigidor dje Ley di Moisés, Juan a denuncia correctamente nan adulterio den un bida compañá. P’sei mes, Herodes a cera Juan den prisón, kizás bao di instigacion di Herodías.
Herodes Antipas tabata sa cu Juan tabata un homber husto i asta a scuché cu gusto. Pues, Herodes no tabata sa kico pa haci cu Juan. En cambio, Herodías a odia Juan i a sigi busca manera pa maté. Finalmente, e oportunidad cu el a spera a yega.
Un poco tempo promé cu pascu hudío di aña 32 EC, Herodes a haci arreglo pa un celebracion grandi di su cumpliaña. A reuni pe fiesta tur oficial halto i oficial militar di Herodes, i també ciudadano principal di Galilea. Durante e fiestamento, Salomé, yiu muher di Herodías i su ex-esposo Felipe, tabata mandá pa balia pe bishitantenan. E grupo di homber a keda encantá cu su baliamento.
Herodes a keda mashá contentu cu Salomé. El a bisa: “Pidími loke bo kier, i lo mi dunábo.” E asta a hura: “Cualkier cos cu bo pidími, lo mi dunábo, te na mitá di mi reino.”
Promé cu el a contesta, Salomé a sali pa consulta cu su mama. El a puntré: “Kico mi mester pidi?”
Por fin e oportunidad a yega! Herodías a contesta sin vacila: “Pidi e cabez di Juan bautista.”
Salomé a bolbe cerca Herodes un bez i a pidi: “Mi kier pa bo dunámi awor mes riba tebladji e cabez di Juan bautista.”
Herodes a keda mashá afligí. Pero, door cu bishitante di dje a tende su huramento, el a tene bergüenza di no cumpli cuné, aunque esei a nifica e asesinato di un homber inocente. Un berdugo a wordu mandá un bez ne prisón cu su instruccion horrible. Un poco tempo despues el a bolbe cu e cabez di Juan bautista riba tebladji, i a duné na Salomé. Salomé a hibé en buelta na su mama. Ora disípel di Juan a tende loke a pasa, nan a bini i a hiba su cadáver i a deré, i despues nan a informa Jesús dje asunto.
Mas tardi, ora Herodes a tende cu Jesús a cura hende i a saca demoño, el a spanta, teniendo miedu cu Jesús realmente ta Juan lantá for di morto. Despues, e tabatin mashá gana di mira Jesús, no pa scucha su predicamento, sino pa confirma si su miedu tabatin fundeshi of no. Mateo 10:1-5; 11:1; 14:1-12; Marco 6:14-29; Lucas 9:7-9.
▪ Pakico Juan tabata den prisón, i pakico Herodes no kier duné e castigo di morto?
▪ Con Herodías finalmente por a laga mata Juan?
▪ Despues di morto di Juan, pakico Herodes kier mira Jesús?