Capítulo 59

Ken Jesús realmente tabata?

ORA e boto cu a hiba Jesús i su disípelnan a drenta haf di Betsaida, e pueblo a trece un homber ciegu cerca dje i a pidié toca e homber i curé. Jesús a coge e homber pa man i hibé pafó dje pueblo i, despues di a scupi den su wowo, a puntré: “Bo ta mira algo?”

E homber a contesta: “Mi ta mira hende, pasobra mi ta ripara loke ta parce palu, pero nan ta camna rond.” Poniendo su man riba e wowo dje homber, Jesús a restora su bista pe mira claramente. Anto Jesús a manda e homber cas cu e instruccion di no drenta den e stad.

Awor Jesús a bai cu su disípelnan ne pueblo di Cesarea Filipo, den e nort extremo di Palestina. Esei tabata un camina leu, subiendo pa rond di 48 km, te ne sitio bonita di Cesarea Filipo, mas cu 350 meter mas halto cu nivel di lamá. Probablemente nan a pasa dos dia riba camina.

Riba camina, Jesús a bai su so pa haci oracion. A keda solamente rond di nuebe of diez luna promé cu su morto, i el a preocupá tocante su disípelnan. Hopi a bandoné caba i no a sigié mas. Aparentemente otronan a keda confundí i desilusioná pasobra el a rechaza esfuerzo dje pueblo di hacié rey i pa motibo cu, ora enemigo a reté, e no a duna siñal di cielo pa duna prueba cu e tabata rey. Kico su apóstolnan a kere tocante su identidad? Ora nan a bini unda e tabata haci oracion, Jesús a púntranan: “Ken e multitud ta bisa cu mi tá?”

Nan a contesta: “Algun ta bisa Juan bautista, otronan Elías, otronan ainda ta bisa Jeremías of un dje profetanan.” Sí, hende a kere cu Jesús tabata un homber asina lantá for di morto!

Jesús a puntra: “Ma boso, ken boso ta bisa cu mi tá?”

Pedro a contesta un bez: “Bo ta Cristo, e Yiu di e Dios bibo.”

Despues di a expresa su aprobacion dje contesta di Pedro, Jesús a bisa: “Mi ta bisábo, Bo ta Pedro, i riba e barranca aki lo mi edifica mi congregacion, i porta di Hades no por dominé.” Pe promé bez ei Jesús a anuncia cu lo e edifica un congregacion i cu ni morto no por tene miembro di dje catibo despues di nan fiel andar riba tera. Anto el a bisa Pedro: “Lo mi dunábo yabi di reino di cielo.”

Asina Jesús a revela cu Pedro lo recibi privilegio special. No, Pedro no tabata duná e promé lugar den e apóstolnan, ni e no tabata hací e fundeshi dje congregacion. Jesús mes ta e Barranca riba locual e congregacion ta edificá. Pero Pedro tabata duná tres yabi cu por habri, den un sentido, oportunidad pa grupo di hende drenta den e Reino di cielo.

Pedro a usa e promé yabi na Pentecoste di aña 33 EC pa mustra hudío arrepentí loke nan tabatin cu haci pa ser salbá. El a usa e segundo yabi un poco despues pa habri oportunidad pa creyente samaritano drenta den e Reino di Dios. Anto, na aña 36 EC el a usa e tercer yabi pa habri e mesun oportunidad pa Cornelio i su amigonan, gentil no circuncidá.

Jesús a sigi su conbersacion cu su apóstolnan. El a desilusionánan mencionando e sufrimento i morto cu e tabatin cu enfrenta pronto den Jerusalem. Ya cu nan no a comprende cu Jesús lo ser resusitá na bida celestial, Pedro a hala Jesús un banda. El a bisa: “Sea bondadoso cu bo mes, Señor, abo absolutamente lo no tin tal destino.” Birando su lomba, Jesús a contesta: “Bai djaki, Satanás! Bo ta un tropiezo pa mi, pasobra bo no ta pensa pensamento di Dios, sino pensamento di hende.”

Ta parce cu tabatin otro hende fuera dje apóstolnan cu tabata biahá cu Jesús, p’sei awor el a yámanan cerca dje i a splica cu no ta fácil pa ser sigidor di dje. El a bisa: “Si un hende kier sigími, lagué nenga su mes i tuma su staca di tormento i sigími continuamente. Pasobra ken cu kier salba su alma lo perdé; pero ken cu ta perde su alma pa causa di mi i e bon nobo lo salbé.”

Sí, pa nan duna prueba cu nan ta merece su fabor, sigidor di Jesús tin cu tene curashi i haci sacrificio propio. Jesús a bisa: “Pasobra ken cu ta tene bergüenza di mi i di mi palabra den e generacion adúltero i pecaminoso aki, e Yiu di hende també lo tene bergüenza di dje ora e yega den e gloria di su Tata cu e angelnan santo.” Marco 8:22-38; Mateo 16:13-28; Lucas 9:18-27.

▪ Pakico Jesús a keda preocupá tocante su disípelnan?

▪ Hende tabatin cua punto di bista tocante identidad di Jesús?

▪ El a duna cua yabi na Pedro, i con el a úsanan?

▪ El a duna cua correccion na Pedro, i pakico?