Capítulo 60

Un bista di antemano dje gloria di e Reino di Cristo

JESÚS a yega ne districto di Cesarea di Filipo, i tabata siña un multitud cu a inclui su apóstolnan. El a haci e sigiente anuncio asombroso na nan: “Berdaderamente mi ta bisa boso cu tin algun di esnan cu ta pará aki cu di ningun manera lo experimenta morto te cu promé nan ta mira e Yiu di hende bini den su reino.”

Su disípelnan tabata pensa: ‘Kico Jesús kier men?’ Rond di un siman despues, Jesús a hiba Pedro, Santiago, i Juan hunto cuné, i nan a subi un montaña halto. Posiblemente esei tabata anochi, siendo cu e disípelnan tabatin soño. Durante cu Jesús tabata haci oracion, e tabata transformá dilanti nan. Su cara a cuminza briya manera solo, i su bistí a bira briyante manera luz.

Anto, dos persona, identificá como “Moisés i Elías,” a presenta i a cuminza papia cu Jesús tocante su ‘despidida cu tabatin cu sosode den Jerusalem.’ E despidida ta parce di referi ne morto di Jesús i su resureccion despues. Asina, e conbersacion a duna prueba cu su morto bergonzoso no tabata algo pe evita, manera Pedro tabata kier.

Completamente lantá awor, e disípelnan a wak i a scucha cu asombro. Maske esei tabata un vision, el a parce asina berdadero cu Pedro a cuminza participa den e conbersacion, bisando: “Señor, ta excelente cu nos ta aki. Si bo kier, lo mi span tres tent aki, un pa bo i un pa Moisés i un pa Elías.”

Durante cu Pedro tabata papia, un nubia briyante a tápanan, i un boz dje nubia a bisa: “Esaki ta mi Yiu, esun stimá, cu mi a aprobá; scuché.” Ora nan a tende e boz, e disípelnan a cai boca abao. Pero Jesús a bisa: “Lanta i no tene miedu.” Ora nan a lanta, nan no a mira ningun hende, sino Jesús.

Ora nan a baha for di montaña su mañan, Jesús a manda: “No bisa e vision na ningun hende te cu e Yiu di hende ta ser lantá for di morto.” E presentacion di Elías den e vision a haci un pregunta presenta den e mente dje disípelnan. Nan a puntra, “Pakico scriba ta bisa cu Elías tin cu bini promé?”

Jesús a contesta: “Elías a bini caba i nan no a reconocele.” Sin embargo, Jesús tabata papia tocante Juan bautista, cu a hunga un papel similar cu esun di Elías. Juan a prepara e camina pe binimento di Cristo, mescos cu Elías a haci pa Eliseo.

Cuanto e vision a fortalecénan, tanto Jesús como e disípelnan! Den un sentido, e vision tabata un bista di antemano dje gloria dje Reino di Cristo. En efecto, e disípelnan a mira e “Yiu di hende bini den su reino,” net manera Jesús a priminti un siman promé. Despues di morto di Jesús, Pedro a skirbi cu nan a ‘bira testigo ocular dje magnificencia di Cristo ora nan tabata cuné riba e montaña santo.’

Fariseo a exigi di Jesús un siñal pa duna prueba cu e tabata esun primintí den e Scritura como e Rey escogí di Dios. Nan no tabata duná un siñal asina. En cambio, disípel íntimo di Jesús tabata permití di mira e transformacion di Jesús como un confirmacion di profecía dje Reino. P’sei, Pedro a skirbi despues: “Consecuentemente nos tin e palabra profético hací mas sigur.” Mateo 16:13, Mat 16:28–17:13; Marco 9:1-13; Lucas 9:27-37; 2 Pedro 1:16-19.

▪ Promé cu nan a experimenta morto, con algun a mira Cristo bini den su Reino?

▪ Den e vision, Moisés i Elías a conbersa tocante kico cu Jesús?

▪ Pakico e vision tabata asina un yudanza pa fortalece e disípelnan?