Capítulo 66

Ne fiesta di tabernáculo

JESÚS a bira famoso durante e casi tres aña desde su bautismo. Hopi miles di hende a mira milagro di dje, i noticia di su actividad a plama den tur e país. Awor, ora pueblo ta reuni pe fiesta di tabernáculo den Jerusalem, nan a speré ei. Nan a puntra: “Unda e homber tá?”

Jesús a bira un tópico di discusion. Algun a bisa cu “E ta bon hende.” Otronan a pleita cu “No, e ta gaña pueblo.” Tabatin hopi papiamento dje clase ei na secreto durante e promé dianan dje fiesta. Pero ningun hende tabatin e curashi di papia na público pa defende Jesús. Ta asina pasobra e pueblo tabatin miedu di represalia di lider hudío.

Ora mitá dje fiesta a pasa, Jesús a yega. El a subi ne tempel, unda e pueblo a keda asombrá di su capacidad maraviyoso di siña. Siendo cu Jesús nunca a bai scol di rabí, hudío a cuminza puntra: “Con e homber ei tin conocimento di letter, ya cu e no a studia na scol?”

Jesús a splica: “Loke mi ta siña no ta di mi, sino ta di esun cu a mandámi. Si hende kier haci su boluntad, e por sa tocante e siñanza si e ta di Dios of si mi ta papia di parti di mi mes.” E siñanza di Jesús a keda mashá pegá cu e ley di Dios. P’sei, e mester a keda bisto cu e tabata busca e gloria di Dios i no su mes gloria. Jesús a puntra: “Moisés a duna boso e Ley, no ta berdad?” Pa duna reprendimento, el a bisa: “Ni sikiera uno di boso ta obedece e Ley.”

Anto Jesús a puntra: “Pakico boso ta percura pa matámi?”

Hende den e multitud, probablemente bishitante ne fiesta, no tabata sa di tal esfuerzo. Nan a considera cu tabata impensable pa hende kier mata un maestro asina maraviyoso. Pues, nan a kere cu algo mester falta Jesús pe kere esei. Nan a bisa: “Bo tin un demoño. Ken ta percura pa matábo?”

Lider hudío kier a mata Jesús, aunque e multitud no tabata sa esei. Ora Jesús a cura un homber riba sabat un aña i mei promé, lidernan a purba di maté. Pues, awor Jesús a enfatiza cu nan tabata irrazonabel, puntrando nan: “Si un homber ta recibi circuncision riba un sabat afin di no kibra e ley di Moisés, boso ta violentamente rabiá cu mi pasobra mi a haci un homber completamente sano di salud riba sabat? Stop di huzga segun aparencia exterior, sino huzga cu huicio husto.”

Habitante di Jerusalem cu a conoce e situacion, a puntra awor: “Esei ta e homber cu nan ta percura pa mata, no ta berdad? I toch, mira! e ta papia na público, i nan no ta bisé nada. Gobernante no a yega di conoce pa sigur cu esei ta Cristo, no ta berdad?” Tal residente di Jerusalem a splica pakico nan no ta kere cu Jesús ta Cristo: “Nos sa di unda e homber ei tá; pero ora Cristo bini, ningun hende lo sa di unda e tá.”

Jesús a contesta: “Boso conocémi i també sa di unda mi tá. Además, mi no a bini di mi mes iniciativa, pero esun cu a mandámi ta berdadero, i boso no conocé. Mi conocé, pasobra mi ta representante di dje, i El a mandámi.” Cu esei nan a purba di haya gara di dje, kizás pa encarcelé of laga maté. Pero nan no a logra pasobra no tabata tempo pa Jesús muri.

Sin embargo, hopi hende a pone fe den Jesús, manera nan mesté en berdad. Sí, el a camna riba awa, a calma bientu i tempestad di lamá, a alimenta miles di hende cu un poco pan i piscá, a cura hende enfermo, a haci hende coho camna, a habri wowo di hende ciegu, a cura hende leproso, i asta a lanta hende morto. Pues, nan a puntra: “Ora Cristo bini, lo e no haci mas siñal cu e homber ei a haci, no ta berdad?”

Ora fariseo a tende e multitud papia riba tal cosnan, nan i sacerdote principal a manda oficial pa arresta Jesús. Juan 7:11-32.

▪ Na ki tempo Jesús a yega ne fiesta, i kico pueblo a bisa tocante dje?

▪ Pakico algun hende a bisa cu Jesús tabatin demoño?

▪ Habitante di Jerusalem tabatin cua punto di bista di Jesús?

▪ Pakico hopi hende a pone fe den Jesús?