Capítulo 69

E cuestion di ken tabata su tata

DURANTE e fiesta, e discusion di Jesús cu lider hudío a bira mas intenso. Jesús a admiti: “Mi sa cu boso ta desendiente di Abraham, pero boso ta percura pa matámi, pasobra mi palabra no ta haci ningun progreso den boso. Mi ta papia loke mi a mira cerca mi Tata; i boso, pues, ta haci loke boso a tende di boso tata.”

Aunque Jesús no a identifica nan tata, el a haci claro cu nan tata ta distinto di su tata. Sin sa di ken Jesús tabata pensa, lider hudío a contesta: “Nos tata ta Abraham.” Nan a kere cu nan tabatin e mesun fe cu Abraham, cu tabata amigo di Dios.

Sin embargo, Jesús a dalnan un golpi cu su contesta: “Si boso ta yiu di Abraham, haci obra di Abraham.” Sí, berdadero yiu ta imita nan tata. “Pero, awor boso ta percura pa matámi,” segun Jesús, “un hende cu a bisa boso e berdad cu mi a tende di Dios. Abraham no a haci esei.” Pues, Jesús a bolbe bisa: “Boso ta haci obra di boso tata.”

Toch nan no a comprende di ken Jesús tabata papia. Nan a debati cu nan tabata yiu legítimo di Abraham, bisando: “Nos no a nace di fornicacion.” Pues, bisando cu nan tabata berdadero adorador manera Abraham, nan a gaba: “Nos tin un solo Tata, Dios.”

Pero Dios realmente tabata nan Tata? Jesús a contesta: “Si Dios ta boso Tata, boso lo stimámi, pasobra mi a bini di Dios i ta aki. Tampoco mi no a bini di mi mes iniciativa, no, sino El a mandámi. Pakico boso no sa loke mi ta papia?”

Jesús a purba di mustra tal lider religioso e consecuencia di nan rechazo di dje. Pero awor el a bisa directamente: “Boso ta di boso tata e Diabel, i boso kier haci deseo di boso tata.” E Diabel ta ki sorto di tata? Jesús a identifiqué como asesino i també a bisa: “E ta mentiroso i tata di mentira.” Pues, Jesús a conclui: “Ken cu ta di Dios ta scucha e palabra di Dios. P’sei boso no ta scucha, pasobra boso no ta di Dios.”

Rabiá bao di condenacion di Jesús, hudío a contesta: “Nos no a bisa correctamente, Bo ta samaritano i tin un demoño?” E palabra “samaritano” tabata usá como un expresion di desprecio i reproche, ya cu samaritano tabata hende cu hudío a odia.

Jesús a pasa por halto di nan calumnia di desprecio di yamé samaritano, i a bisa: “Mi no tin demoño, sino ta onra mi Tata, i boso ta desonrámi.” Sigiendo, Jesús a haci un promesa asombroso: “Si hende observa mi palabra, nan lo no mira morto nunca.” Naturalmente, Jesús no kier men cu tur hende cu a sigié literalmente lo no mira morto nunca. Mas bien, e kier men cu nan nunca lo mira destruccion eterno, of e “segundo morto,” di locual no tin resureccion.

Sin embargo, hudío a kere e palabra di Jesús literalmente. P‘sei nan a bisa: “Awor nos sa cu bo tin un demoño. Abraham a muri, també e profetanan; pero bo ta bisa, ‘Si hende observa mi palabra, nan lo no experimenta morto nunca.’ Bo no ta mayor cu nos tata Abraham, cu a muri, no ta berdad? També, e profetanan a muri. Ken bo ta pretende di ser?”

Den tur e discusion, ta keda bisto cu Jesús tabata mustra e hendenan ei e echo di cu e tabata Mesías primintí. Pero, en bez di contesta nan pregunta directamente en cuanto su identidad, Jesús a bisa: “Si mi ta glorifica mi mes, mi gloria no ta nada. Mi Tata ta esun cu ta glorificámi, esun cu boso ta bisa ta boso Dios; i toch boso no a conoce. Pero mi conocé. I si mi bisa cu mi no conocé, mi ta bira manera boso, mentiroso.”

Sigiendo, Jesús a menciona fiel Abraham di nobo, bisando: “Abraham boso tata a alegra mashá den e prospecto di mira mi dia, i el a miré i a alegra.” Sí, cu wowo di fe, Abraham a mira den futuro ne binimento di Mesías primintí. Sin kere, e hudíonan a contesta: “Bo no tin cincuenta aña ainda, i toch bo a mira Abraham?”

Jesús a contesta: “Cu e mayor berdad mi ta bisa boso, promé cu Abraham a yega di existi, mi tabata.” Naturalmente, Jesús tabata referi na su existencia prehumano como un persona spiritual poderoso den cielo.

Rabiá pasobra Jesús a bisa cu el a existi promé cu Abraham, hudío a coge piedra pa piedré. Pero el a sconde i a sali for dje tempel sin daño. Juan 8:37-59; Revelacion 3:14; 21:8.

▪ Con Jesús a mustra cu e i su enemigonan tabatin tata distinto?

▪ Kico hudío kier men yamando Jesús samaritano?

▪ Den ki sentido Jesús kier men cu sigidor di dje lo no mira morto nunca?