Capítulo 70

Curando un homber cu a nace ciegu

ORA hudío a purba di piedra Jesús, e no a bandona Jerusalem. Despues, riba dia di sabat, e i su disípelnan tabata camna den e stad ora nan a mira un homber cu tabata ciegu desde nacimento. E disípelnan a puntra Jesús: “Rabí, ken a peca, e homber ei of su mayornan, di manera cu el a nace ciegu?”

Kizás e disípelnan a kere, manera algun rabí, cu hende por peca den matriz di nan mama. Pero Jesús a contesta: “Ni e homber ei ni su mayornan a peca, sino esei tabata pe obranan di Dios ser manifestá den su caso.” E homber tabata ciegu no como consecuencia di un cierto error of picá cu e homber of su mayornan a comete. E picá dje promé homber Adam a resulta den e imperfeccion di tur hende, i p’sei nan ta sufri di defecto tal como nacimento ciegu. E defecto dje homber awor a ocasiona oportunidad pa Jesús duna di conoce e obranan di Dios.

Jesús a duna énfasis ne urgencia di haci tal obra. El a bisa: “Nos tin cu haci obra di esun cu a mandámi mientras cu ta dia, anochi ta bini ora ningun hende por traha. Tan tempo cu mi ta den mundo, mi ta luz di mundo.” Pronto e morto di Jesús a hinqué den scuridad di graf unda e no por a sigi haci nada. Mientras tanto, e tabata e fuente di iluminacion pa mundo.

Despues di a bisa esei, Jesús a scupi riba tera i a traha lodo dje clei. El a pone esei riba wowo dje ciegu i a bisa: “Bai laba den e tanki di Siloam.” E homber a obedece. I ora el a haci esei, e por a mira! Cuanto el a alegra ora el a bolbe, mirando pe promé bez den su bida!

Beciña i otronan cu a conocé a keda asombrá. Nan a puntra: “Esei ta e homber cu tabata sinta i pidi limosna, no ta berdad? Algun a bisa: ‘Esei té.’” Pero otronan no a kere: “Di ningun manera, pero ta parcé.” Pero e homber a bisa: “Ta ami.”

Hende kier sa: “Anto, con bo wowo a habri?”

“E homber yamá Jesús a traha clei i a hunté riba mi wowo i a bisámi, ‘Bai Siloam i laba.’ P’sei mi a bai i a laba i a recibi bista.”

Nan a puntra: “Unda e homber tá?”

El a contesta: “Mi no sa.”

Awor e pueblo a hiba e homber cu tabata ciegu cerca nan lider religioso, e fariseonan. Eseinan també a cuminza puntré con el a haya bista. E homber a splica: “El a pone clei riba mi wowo, i mi a laba i mi tin bista.”

Siguramente, fariseo mester a alegra hunto cu e limosnero sano! Pero, en bez di esei nan a denuncia Jesús. Nan a bisa: “E homber no ta di Dios.” Pakico nan a bisa esei? “Pasobra e no ta warda sabat.” I toch otro fariseo a puntra: “Con hende cu ta pecador por haci siñal dje clase ei?” Pues, tabatin desunion den nan.

P’sei, nan a puntra e homber: “Kico bo ta bisa tocante dje, siendo cu el a habri bo wowo?”

El a contesta: “E ta profeta.”

Fariseo a nenga di kere esei. Nan a keda convencí cu tabatin cu ser un conbenio secreto entre Jesús i e homber pa gaña pueblo. Pues, pa resolve e asunto, nan a yama e mayornan dje limosnero pa hácinan pregunta. Juan 8:59; 9:1-18.

▪ Kico ta responsabel pe nacimento ciegu dje homber, i kico no tá?

▪ Kico ta anochi ora ningun hende por traha?

▪ Ora e homber a wordu curá, ki reaccion tabatin di parti di esnan cu a conocé?

▪ Di ki manera tabatin desunion den fariseo riba e curacion dje homber?