Capítulo 80

E curá di carné i e Wardador

JESÚS a yega Jerusalem pe fiesta di dedicacion, of Hanukkah, un fiesta cu a celebra rededicacion dje tempel na Jehova. Na aña 168 PEC, rond di 200 aña promé, Antíoco IV Epífanes a domina Jerusalem i a profana e tempel i su altar. Sin embargo, tres aña despues hudío a bolbe domina Jerusalem i a rededicá e tempel. Despues, nan a celebra un rededicacion tur aña.

E fiesta di dedicacion a tuma lugar na Chislev 25, e luna hudío cu ta corresponde cu e último parti di November i e promé parti di December di nos calendar djawe. Pues, un poco mas cu cien dia a keda te cu e pascu hudío importante di aña 33 EC. Door cu esei tabata e tempo di friu, apóstol Juan a yamé “winter.”

Awor Jesús a conta un comparacion den locual el a menciona tres curá di carné i su papel como e Wardador Excelente. E promé curá di carné cu el a menciona ta ser identificá cu e arreglo dje pacto di Ley di Moisés. E Ley a sirbi como un curá pa separa hudío for di costumber corrupto di hende cu no tabata den e pacto special cu Dios. Jesús a splica: “Cu mayor berdad mi ta bisa boso, Ken cu no drenta e curá di carné via e porta sino ta subi na otro lugar, esei ta un ladrón i plunderar. Pero esun cu ta drenta via e porta ta e wardador dje carnénan.”

Otro hende a bini i a pretende di ser Mesías of Cristo, pero nan no tabata e berdadero wardador di carné cu Jesús a sigi pa menciona: “E portero ta habri pé, i e carnénan ta scucha su boz, i e ta yama su mes carnénan pa nomber i ta sácanan afó. . . . Di ningun manera nan lo sigi un hende straño sino ta hui di dje, pasobra nan no conoce e boz di hende straño.”

E “portero” dje promé curá tabata Juan bautista. Como portero, Juan a ‘habri’ pa Jesús, identificando ele pa carnénan simbólico cu el a hiba pe yerba berde. Carné cu Jesús a yama pa nomber i a saca afó ta ser recibí despues den un otro curá, manera el a splica: “Cu mayor berdad mi ta bisa boso, mi ta e porta dje carnénan,” esta, e porta dje curá nobo. Ora Jesús a institui e pacto nobo cu su disípelnan i desde cielo a basha spiritu santo riba nan ne sigiente dia di Pentecoste, nan tabata hibá den e curá nobo.

Dunando mas splicacion di su papel, Jesús a bisa: “Mi ta e porta; ken cu ta drenta door di mi lo ser salbá, i por drenta i sali i haya yerba. . . . Mi a bini pa nan tene bida i tené na abundancia. . . . Mi ta e wardador excelente, i mi conoce mi carnénan i mi carnénan conocémi, mescos cu e Tata ta conocémi i mi ta conoce e Tata; i mi ta entrega mi alma na fabor dje carnénan.”

Recientemente, Jesús a consola su sigidornan, bisando: “No tene miedu, trupa chikito, pasobra boso Tata a aprobá di duna boso e reino.” E trupa chikito, cu eventualmente ta un total di 144.000, ta drenta den e curá nobo, of segundo curá. Pero, Jesús a sigi bisa: “Mi tin otro carné, cu no ta dje curá aki; eseinan també mi mester trece, i nan lo scucha mi boz, i lo bira un solo tao, un solo wardador.”

Siendo cu e “otro carnénan” no ta dje “curá aki,” nan mester ta di un otro curá, curá di tres. E último dos curá di carné tin destino distinto. E “trupa chikito” den un curá lo reina cu Cristo den cielo, i e “otro carnénan” den e otro curá lo biba den Paradijs riba tera. Sin embargo, apesar di ser den dos curá, e carnénan no ta envidioso, ni tampoco nan no ta sínti discriminacion, pasobra manera Jesús a bisa, nan ta bira “un solo tao” bao di “un solo wardador.”

Jesucristo, e Wardador Excelente, a duna su bida boluntariamente pe dos curá di carné. El a bisa: “Mi ta entregué di mi mes iniciativa. Mi tin autoridad di entregué, i mi tin autoridad di bolbe recibié. E mandamento aki mi a recibi di mi Tata.” Ora Jesús a bisa esei, el a causa desunion den hudío.

Hopi hende den e multitud a bisa: “E tin un demoño i ta loco. Pakico boso ta scuché?” Pero otronan a responde: “Esei no ta e palabra di un hende endemoniá.” Anto, evidentemente referiendo di nobo na su curacion dos luna promé dje homber cu a nace ciegu, nan a bisa: “Demoño no por habri wowo di hende ciegu, no ta berdad?” Juan 10:1-22; 9:1-7; Lucas 12:32; Revelacion 14:1, 3; 21:3, 4; Salmo 37:29.

▪ Kico ta e fiesta di dedicacion, i nan a celebré na ki tempo?

▪ Cua ta e promé curá di carné, i ken ta portero di dje?

▪ Con e portero a habri e porta pe Wardador, i e carnénan a drenta den kico despues?

▪ Ken ta compone e dos curá dje Wardador Excelente, i nan ta bira cuanto tao?