Capítulo 118

Traicion i arresto

TABATA hopi despues di meianochi caba ora Hudas a hiba un multitud grandi di soldad, sacerdote principal, fariseo, i otronan ne hofi di Getsemaní. Sacerdote a conbini pa paga Hudas 30 pida di plata pa traiciona Jesús.

Mas promé, ora Jesús a despidi di Hudas durante e cena di pascu hudío, evidentemente el a bai un bez cerca sacerdote principal. Eseinan a reuni inmediatamente nan mes oficial, i també un grupo di soldad. Kizás Hudas a híbanan promé unda Jesús i su apóstolnan a celebra pascu. Mirando cu nan a bai, e multitud grandi teniendo arma i cargando lampi i flambeo a sigi Hudas saliendo for di Jerusalem i cruzando e Valle di Cedrón.

Ora Hudas a guia e grupo subiendo e Ceru di Olijfi, el a keda sigur cu e sa unda pa haya Jesús. Durante e siman cu a pasa, ora Jesús i su apóstolnan a bai i bini entre Betania i Jerusalem, nan a para hopi bez den e hofi di Getsemaní pa sosega i conbersa. Pero, awor, cu e posibilidad cu Jesús tabata den scuridad bao di mata di olijfi, con e soldadnan por a identifiqué? Kizás nan nunca a mira Jesús ainda. P’sei, Hudas a prepara un siñal, bisando: “Ken cu mi ta zunchi, esei té; arresté i hibé den siguridad.”

Hudas a guia e multitud grandi pa drenta den e hofi, el a mira Jesús cu su apóstolnan, i a bai directamente cerca dje. El a bisa: “Bon dia, Rabí!” i a duné un zunchi mashá suave.

Jesús a puntra: “Amigo, pa ki propósito bo ta presente?” Anto, contestando su mes pregunta, el a bisa: “Hudas, bo ta traiciona e Yiu di hende cu un zunchi?” Pero, basta dje traidor! Jesús a drenta den luz di flambeo i lampi i a puntra: “Kende boso ta busca?”

Nan a contestá: “Jesús e nazareno.”

Jesús a bisa: “Ami té,” i a para cu curashi dilanti nan tur. Asombrá cu su curashi i sin sa kico pa spera, e hendenan a hala atrás i a cai na suela.

Jesús a sigi papia trankilamente: “Mi a bisa boso cu ami té. Pues, si ta ami cu boso ta busca, laga eseinan bai.” Un poco promé den e sala djariba, Jesús a bisa su Tata den oracion cu el a warda su fiel apóstolnan i no a perde ningun di nan “fuera dje yiu di destruccion.” Pues, pe cumpli cu su palabra, el a pídinan laga su sigidornan bai.

Ora e soldadnan a domina nan mes, a lanta riba nan pia, i a cuminza mara Jesús, e apóstolnan a reconoce loke tabata cerca di sosode. Nan a puntra: “Señor, nos mester dalnan cu e spada?” Promé cu Jesús a contesta, Pedro, sacando uno dje dos spada cu e apóstolnan a trece, a ataca Malco, un esclabo dje sumosacerdote. E golpi di Pedro a hera e cabez dje sclabo pero a kita su orea drechi.

Jesús a entremete i a bisa: “Lagué yega te aki.” I tocando e orea di Malco el a cura e herida. Anto el a siña un les importante, mandando Pedro: “Bolbe bo spada na su lugar, pasobra tur hende cu ta tuma spada lo perece pa spada. Of bo ta kere cu mi no por apela na mi Tata pa dunámi ne momento aki mas cu diesdos legion di angel?”

Jesús a keda dispuesto di ser arrestá, pasobra el a splica: “Con e Scritura por ta cumplí di cu e mester sosode asina?” I el a sigi: “E copa cu e Tata a dunámi, mi no mester bebé di tur manera?” El a keda completamente di acuerdo cu e boluntad di Dios pe!

Anto Jesús a puntra e multitud: “Boso a sali cu spada i palu manera contra un salteador pa arrestámi? Dia tras dia mi tabata sinta den e tempel siñando, i toch boso no a arrestámi. Pero tur esaki ta sosode pe scritura dje profetanan ser cumplí.”

Anto e grupo di soldad i e comandante militar i oficial di hudío a coge Jesús i a maré. Ora e apóstolnan a mira esei, nan a bandona Jesús i a hui. Sin embargo, un hoven—kizás esei tabata e disípel Marco—a keda ei den e multitud. Tal bez e tabata den e cas unda Jesús a celebra pascu i despues a sigi e multitud djei. Pero, awor, nan a reconocele, i a haci esfuerzo di cogé. Pero el a laga atrás su bistí di linen i a scapa cu bistí djabao so. Mateo 26:47-56; Marco 14:43-52; Lucas 22:47-53; Juan 17:12; 18:3-12.

▪ Pakico Hudas a keda sigur cu e por haya Jesús den e hofi di Getsemaní?

▪ Con Jesús a manifesta preocupacion pa su apóstolnan?

▪ Kico Pedro a haci pa defende Jesús, pero kico Jesús a bisa Pedro tocante esei?

▪ Con Jesús a mustra cu e tabata completamente di acuerdo cu e boluntad di Dios pe?

▪ Ora e apóstolnan a bandona Jesús, ken a keda, pero kico a pasé?