Capítulo 131

Su presentacion final, i Pentecoste di aña 33 E.C.

NA un tempo Jesús a haci arreglo pa tur 11 apóstol di dje contra cuné na un ceru den Galilea. Ta parce cu otro disípel a tende dje reunion, i un total di mas cu 500 hende a reuni. Ki un reunion feliz esei a resulta di ser ora Jesús a presenta i a cuminza síñanan!

Entre otro cosnan, Jesús a splica e multitud grandi cu Dios a duné tur autoridad den cielo i riba tera. El a mándanan: “Bai pues i haci disípel di hende di tur nacion, bautizando nan den e nomber dje Tata i dje Yiu i dje spiritu santo, siñando nan pa warda tur loke mi a manda boso.”

Imaginábo! Tur homber, muher i mucha a recibi e mesun comision pa participa den e trabao di haci dísipel. Opositor a purba di kítanan di predica i siña, pero Jesús a consolánan: “Mira! mi ta cu boso tur dia te na conclusion dje sistema di cosnan.” Jesús a permanece cu su sigidornan mediante e spiritu santo, pa yúdanan cumpli cu nan ministerio.

En conhunto, Jesús a aparece bibo pa su disípelnan pa un periodo di 40 dia despues di su resureccion. Durante tal aparencia, el a instruínan tocante e Reino di Dios, i a enfatiza loke tabata nan responsabilidad como disípel di dje. Na un ocasion e asta a aparece na su mitá ruman Santiago i a convence e homber cu no tabata un creyente na antes cu Jesús en berdad tabata Cristo.

Mientras cu e apóstolnan tabata den Galilea ainda, ta parce cu Jesús a instruínan pa bolbe pa Jerusalem. Ora el a reuní cu nan ei, el a bísanan: “No aleha boso for di Jerusalem, sino spera loke e Tata a primintí, tocante di locual boso a tende foi mi; pasobra Juan, en berdad, a bautiza cu awa, pero boso lo ser bautizá den spiritu santo no hopi dia despues di esaki.”

Despues, Jesús a reuni cu su apóstolnan atrobé i a híbanan for dje stad te na Betania, cu ta situá banda pariba di Ceru di Olijfi. Asombrosamente, apesar di tur loke el a bísanan tocante su subimento pronto na cielo, ainda nan a kere cu su Reino lo ser establecí riba tera. P’sei nan a puntra: “Señor, bo ta restora e reino na Israel ne tempo aki?”

En bez di purba di corrigi nan mal comprendimento di nobo, Jesús simplemente a contesta: “No ta pertenece na boso pa haya conocimento di tempo of temporada cu e Tata a pone bao di su mes autoridad.” Anto, dunando énfasis di nobo ne trabao cu nan mester haci, el a bisa: “Boso lo recibi poder ora spiritu santo ta yega riba boso, i boso lo ser testigo di mi tanto den Jerusalem como den tur Hudea i den Samaria i te ne parti mas lehano dje tera.”

Mientras cu nan tabata wak ainda, Jesús a cuminza subi na cielo, anto un nubia a kité for di nan bista. Despues di a desmaterializa su curpa di carni, el a subi na cielo como un persona spiritual. Mientras cu e 11 a sigi wak den cielo, 2 homber den bistí blancu a presenta cerca nan. E dos angel materializá a puntra: “Homber di Galilea, pakico boso ta para mirando na cielo? E Jesucristo ei cu a wordu recibí na cielo for di boso lo bini asina dje mesun manera cu boso a miré bai cielo.”

E manera cu Jesús a caba di bandona e tera tabata sin celebracion público i cu solamente su fiel sigidornan mirando. El a bolbe asina di igual manera—sin celebracion público i cu solamente su fiel sigidornan mirando cu el a bolbe i a cuminza su presencia cu poder di Reino.

Awor e apóstolnan a baha for di Ceru di Olijfi, a cruza e rooi di Cedrón, i a drenta den Jerusalem di nobo. Nan a keda ei den obedencia ne mandamento di Jesús. Diez dia despues, ne fiesta hudío di Pentecoste di aña 33 EC, ora rond di 120 disípel a reuni den un sala djariba den Jerusalem, un sonido mescos cu un bientu fuerte a yena tur e cas di ripiente. Lenga como si di candela a bira visibel, i un a baha riba cabez di cada un presente, i tur disípel a cuminza papia na diferente idioma. Esei tabata e bashamento di spiritu santo cu Jesús a priminti! Mateo 28:16-20; Lucas 24:49-52; 1 Corintio 15:5-7; Echo 1:3-15; 2:1-4.

▪ Jesús a duna instruccion di despidida na ken na un ceru den Galilea, i cua instruccion esei tabata?

▪ Cua consuelo Jesús a duna su disípelnan, i di ki manera lo e permanece cu nan?

▪ Jesús a aparece na su disípelnan pa cuanto tempo despues di su resureccion, i kico el a síñanan?

▪ Jesús a presenta na cua persona cu evidentemente no tabata un disípel promé cu e morto di Jesús?

▪ Jesús a tene cua dos reunion final cu su apóstolnan, i kico a sosode na tal ocasion?

▪ Di ki manera Jesús a bolbe mescos cu el a bai?

▪ Kico a sosode na Pentecoste di aña 33 EC?