Capítulo 133

Jesús a cumpli cu tur loke Dios a pidi

ORA e Rey Guerrero Jesucristo ta elimina Satanás i su mundo malbado, ki motibo lo tin pa alegría! E Reino di mil aña di paz di Jesús lo cuminza por fin!

Bao di direccion di Jesús i di rey asociado di dje, sobrebibiente di Armagedón lo haci e tera limpi di resto dje gera husto. Probablemente sobrebibiente terrenal també lo haya yiu pa un tempo, i eseinan lo participa den e trabao gozoso di cultiva e tera pe bira un hofi bonita manera parque.

Cu tempo Jesús lo lanta miyones di hende incontable for di nan graf pa nan disfruta dje Paradijs bonita. Lo e haci esei na cumplimento di su mes garantía: “E ora ta bini den locual tur esnan cu ta den graf memorial . . . lo sali.”

Entre esnan cu Jesús lo resusitá lo ser e ex-malechor cu a muri banda di dje riba e staca di tormento. Corda cu Jesús a priminti na dje: “Berdaderamente mi ta bisábo awe, Lo bo ta cu mi den Paradijs.” No, e homber no tabata hibá cielo pa reina como rey cu Jesús, ni Jesús lo no bira hende atrobé i biba den Paradijs riba tera cuné. Mas bien, Jesús lo ser cu e ex-malechor den e sentido di cu Jesús lo resusité na bida den Paradijs i percura pa atende na necesidad di dje, tanto fisical como spiritual, segun e ilustracion ne sigiente bladji.

Imaginábo! Bao di atencion amoroso di Jesús, tur e famía humano—sobrebibiente di Armagedón, nan yiunan, i e miles di miyones di hende morto resusitá cu ta obedecele—lo crece te na perfeccion humano. Jehova Dios, usando su Yiu real, Jesucristo, lo biba spiritualmente cu humanidad. “I,” manera e boz cu Juan a tende foi cielo a bisa, “lo e seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas.” Ningun hende riba tera lo sufri of ser enfermo.

Ne fin dje Reino di mil aña di Jesús, e situacion lo ta net manera Dios a declara den su propósito original ora el a bisa e promé pareha humano, Adam i Eva, pa multiplica i yena e tera. Sí, e tera lo ser yená cu un raza husto di hende perfecto. Lo ta asina pasobra e beneficio dje sacrificio di rescate di Jesús lo ser aplicá na tur hende. Morto debí ne picá di Adam lo ni existi mas!

Asina, Jesús lo cumpli cu tur loke Jehova Dios a pidié haci. P’sei, na fin di mil aña, lo e entrega e Reino i e famía humano perfeccioná na su Tata. Anto Dios lo laga Satanás i su demoñonan sali for di abismo di inactividad semehante di morto. Pa ki propósito?

Wel, na fin dje mil aña, e mayoría di hende bibando den Paradijs lo ser hende resusitá cu nunca a haya nan fe poní na prueba. Promé cu nan a muri, nan nunca a conoce e promesa di Dios i p’sei no por a demonstra fe den nan. Anto, despues di a ser resusitá i siñá e berdad bíblico, tabata fácil pa nan sirbi Dios den Paradijs, sin ningun oposicion. Pero, si Satanás ta ser duná e oportunidad di purba di kítanan di sigi sirbi Dios, nan lo resulta di ser leal bao di prueba? Pa resolve e cuestion, Satanás lo ser gelós.

E revelacion duná na Juan ta revela cu despues dje Reino di mil aña di Jesús, Satanás lo logra aparta un cantidad no determiná for dje sirbishi di Dios. Pero e ora ei, ora e prueba final ta caba, Satanás, su demoñonan, i tur hende cu e ta logra gaña lo ser destruí pa semper. En cambio, sobrebibiente completamente probá i leal, lo sigi biba pa disfruta di bendicion di nan Tata celestial pa tur eternidad.

Claramente, Jesús a hunga, i lo sigi hunga, un papel vital den e cumplimento dje glorioso propósito di Dios. Ki un futuro grandioso nos por sigi goza como resultado di tur loke Jesús ta haci como e gran Rey celestial di Dios. Sin embargo, nos no por lubida tur loke el a haci como hende.

Jesús a bini ne tera boluntariamente i a síñanos tocante su Tata. Además di esei, el a duna ehempel di calidad precioso di Dios. Ta conmove nos curazón ora nos ta considera su curashi sublime i hombreza, su sabiduría sin igual, su capacidad sobresaliente como maestro, su guiamento sin miedu, i su tierna compasion i simpatía. Ora nos ta corda con el a sufri na moda inexplicable pa percura e rescate, locual ta e único manera pa nos por gana bida, siguramente nos curazón ta ser conmoví cu aprecio pe!

Berdaderamente, ki un homber nos a mira den e estudio aki dje bida di Jesús! Su grandeza ta bisto i invencibel. Nos ta keda conmoví pa repiti e palabra dje gobernador romano Poncio Pilato: “Mira! e homber!” Sí, en berdad, “E homber,” e homber mas importante cu hamás a biba!

Cu nos aceptacion dje percuracion di su sacrificio di rescate, e carga pisá di picá i morto heredá for di Adam por ta kitá for di nos, i Jesús por bira nos “Tata Eterno.” Tur hende cu kier gana bida eterna mester logra conocimento, no di Dios so sino també di su Yiu, Jesucristo. Nos deseo tá cu bo lezamento i studiamento dje buki aki por yudábo logra tal conocimento dunador di bida! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Génesis 1:28; 1 Corintio 15:24-28; Revelacion 20:1-3, 6-10; 21:3, 4; Isaías 9:6.

▪ Sobrebibiente di Armagedón i nan yiunan lo tin cua privilegio feliz?

▪ Además di sobrebibiente di Armagedón i nan yiunan, ken lo disfruta di Paradijs, i den ki sentido Jesús lo ta cu nan?

▪ Cua situacion lo existi na fin dje mil aña, i kico Jesús lo haci ne tempo ei?

▪ Pakico Satanás lo ser libertá for di abismo, i kico lo sosodele despues i tur esnan cu ta sigié?

▪ Di ki manera Jesús por bira nos “Tata Eterno”?