Spiritunan no a biba i muri riba tera
Spiritunan ta existí! Den e region spiritual invisibel, tin tantu bon i mal spiritunan. Nan ta persona cu a biba i a muri riba tera?
No, nan no ta. Ora un persona muri, e no ta pasa p’e mundu di spiritu, manera hopi hende ta pensa. Con nos por sa esaki? Pasobra e Bijbel ta bisa asina. E Bijbel ta un buki di berdad cu ta bin for dje único Dios berdadero, kende su nomber ta Jehova. Jehova a crea hende; e sa bon kico ta pasa cu nan ora nan muri.—Salmo 83:18; 2 Timoteo 3:16.
Adam a bin di stof i a bolbe na stof
E Bijbel ta bisa cu Dios a forma Adam, e promé hende, “for di stof dje suela.” (Génesis 2:7) Dios a pon’é den paradijs, e hardin di Eden. Si Adam a obedecé Jehova su ley, e lo no a muri; ainda lo e ta na bida riba tera awe. Pero ora Adam deliberadamente a kibra Dios su ley, Dios a bis’é: “[Lo] bo bolbe n’e suela, pasobra for di dje bo tabata tumá. Pasobra stof bo ta i na stof lo bo bolbe.”—Génesis 3:19.
Kico esaki ta nificá? Wel, unda Adam tabata promé cu Jehova a cre’é for di stof? E no tabata ningun caminda. E no tabata un spiritu cu a nace den cielu. E no a existí. Pues ora Jehova a bisa cu Adam lo “bolbe n’e suela,” e tabata kier men cu Adam lo a muri. E no a crusa pasa p’e region di spiritu. Na su morto, Adam un biaha mas a bira sin bida, sin existencia. Morto ta e ausencia di bida.
Pero kico di otronan cu a muri? Nan tambe ta sin existencia? E Bijbel ta contestá:
“Tur [tantu hende como bestia] ta bayendo na un solo lugar. Nan tur a bin for di stof i nan tur ta bolbiendo n’e stof.”—Eclesiastés 3:20.
“E mortonan . . . no ta conciente di nada en absoluto.”—Eclesiastés 9:5.
“Nan amor i nan odio i nan jalusí a perecé caba.”—Eclesiastés 9:6.
“No tin trabou ni formacion di proyecto ni conocimentu ni sabiduria den Sheol [e graf], e lugar caminda bo ta bai.”—Eclesiastés 9:10.
“[Hende] ta bai bek na su suela; den e dia ei su pensamentunan ta perecé.”—Salmo 146:4.
Solamente esnan bibu por haci e cosnan aki
Bo ta haña e textonan aki duru pa aceptá? Si ta asina, pensa riba esaki: Den hopi famia, e homber ta gana placa pa mantené su cas. Ora e homber muri, su famia gene- ralmente ta pasa trabou. Tin bes su esposa i yunan no tin ni sikiera suficiente placa pa cumpra cuminda. Kisas enemigunan dje homber lo abusá di nan. Awor puntra bo mes: ‘Si e homber ei ta na bida den e mundu di spiritu, pakico e no ta sigui percurá pa su famia? Pakico e no ta protegá su famia for di mal hende?’ Ta pasobra e scritura ta corecto. E homber ei ta sin bida, incapas di haci algu.—Salmo 115:17.
E mortonan no por yuda esnan cu hamber of protegá esnan cu ta víctima di abusu
Esaki ta nificá cu nunca mas e mortonan lo biba atrobe? No, e no ta nificá esei. Nos lo papia dje resureccion despues. Pero e ta nificá cu hende morto no sa kico bo ta haciendo. Nan no por mirá bo, tendé bo, of papia cu bo. Bo no mester tene miedu di nan. Nan no por yudá bo i nan no por hací bo daño.—Ecle- siastés 9:4; Isaías 26:14.