E demoñonan ta animá rebelion contra Dios

Pero pakico Satanas i su demoñonan ta traha asina duru pa gaña hende? Pasobra nan kier pa nos uni den nan rebelion. Nan kier pa nos adorá nan. Nan kier pa nos kere nan mentiranan i pa practicá cosnan cu Jehova no ta gusta. Hopi dje prácticanan aki ta enbolbé custumbernan relacioná cu e mortonan.

E morto di un ser kerí ta un experencia emocionalmente doloroso i ta normal i apropiado pa expresá duele. Despues di morto di su amigu Lázaro, Jesus “a entregá na lágrima.”—Juan 11:35.

Tin hopi custumbernan asociá cu morto i esakinan ta varia hopi rond mundu. Hopi no ta na conflicto cu principionan bíblico. Sin embargo, algun custumber ta basá rib’e idea di cu e mortonan ta na bida i ta capas pa mira e bibunan. Belorio, lamentamentu desenfrená i ceremonianan di entiero elaborá tur tin rais den e temor di desagradá spiritu dje mortonan. Pero siendo cu e mortonan no ta “conciente di nada,” esnan cu ta practicá tal cosnan ta promoviendo falsedad di Satanas.—Eclesiastés 9:5.

Otro custumbernan of ceremonianan ta bin for dje creencia di cu e mortonan mester di yudansa dje bibunan i lo causa daño na esnan na bida si nan no wordu calmá. Den algun pais bankete i sacrificio ta ser tené sea 40 dia of un aña despues dje persona su morto. Esaki supuestamente lo mester yuda e defuntu ‘crusa’ p’e region di spiritu. Un otro custumber comun ta pa ofrecé cuminda i bebida n’e mortonan.

E cosnan aki ta robes pasobra nan ta promové Satanas su mentiranan tocante e mortonan. Jehova lo aprobá pa nos tin algu di haber cu custumbernan basá riba siñansa di demoño? Nunca!—2 Corintio 6:14-18.

Sirbidornan dje Dios berdadero no tin ningun participacion den custumbernan cu ta apoyá Satanas su mentiranan. En bes di esei, nan amorosamente ta concentrá riba yuda e bibunan i consolá nan. Nan sa cu una bes cu un persona a muri, solamente Jehova por yuda e persona ei.—Job 14:14, 15.

Spiritismo condená pa Dios

Algun hende ta drenta den contacto cu e demoñonan directamente of via un medium humano. Esaki ta ser yamá spiritismo. Vudu, hacimentu di brua, magia, miramentu di destino i informá cerca e mortonan tur ta formanan di spiritismo.

E Bijbel ta condená e cosnan aki, bisando: “No mester ser hañá den boso ningun persona . . . cu ta usa divinacion, un practicante di magia of cualkier persona cu ta busca siñal of un hacidor di brua, of un persona cu ta mara otronan cu encanto of cualkier persona cu ta consultá un medium spiritista of un pronosticador profesional di suceso of cualkier persona cu ta informá cerca e mortonan. Pasobra tur hende cu ta haci e cosnan aki ta algu repugnante pa Jehova.”—Deuteronomio 18:10-12.

Pakico Jehova ta spierta nos asina fuerte contra e prácticanan aki?

Pa nos mes bienestar, Jehova ta spierta nos contra tur forma di spiritismo. E ta stima i ta interesá den hende i e sa cu esnan cu ta bira enbolbí cu demoño lo sufri sigur.

Un persona asina tabata Nilda, kende tabata un medium spiritista na Brazil. E demoñonan a haci su bida miserabel. E ta relatá: “E spiritunan . . . a poseé mi, mandando mi p’aki p’aya. Mi tabata varia entre estado conciente i inconciente i mi tabata interná den hospital cu problemanan sikiátrico. E demoñonan a persiguí mi asina tantu cu mi nervionan a wordu afectá. Mi a tuma calmante i a cuminsá bebe i huma constantemente. Esaki a sigui pa añanan largu.”

Cu tempu, cu yudansa di Jehova i su Testigonan riba tera, Nilda a libra su mes di influencia di demoño i awor ta hiba un bida ricu i saludabel. Nilda a bisa: “Mi ta animá tur hende pa nunca, ni pa un instante, bira enbolbé cu e [mal] spiritunan.”[8]