Parti 6
Pakico Dios A Permiti Sufrimentu
1, 2. Con nos promé mayornan a daña e comienso excelente cu Dios a duna nan?
KICO a bai robes? Kico a sosodé cu a daña e comienso excelente cu Dios a duna nos promé mayornan den e Paradijs di Eden? Pakico, en bes dje pas i armonia di Paradijs, maldad i sufrimentu a prevalecé pa miles di aña?
2 E motibu ta cu Adam i Eva a malusá nan boluntad liber. Nan a perde for di bista e echo cu nan no tabata creá pa prosperá separá di Dios i su leynan. Nan a dicidí di bira independiente di Dios, pensando cu esaki lo a mehorá nan bida. Asina nan a pasa fuera dje límitenan cu Dios a decretá pa boluntad liber.—Génesis, capítulo 3.
E Cuestion di Soberania Universal
3-5. Pakico Dios no a simplemente destruí Adam i Eva i cuminsá di nobo?
3 Pakico Dios no a simplemente destruí Adam i Eva i cuminsá di nobo cu un otro pareha humano? Pasobra su soberania universal, esta, su derecho intransferibel di goberná, a ser desafiá.
4 E cuestion tabata: Ken tin e derecho di goberná i ken su gobernacion ta corecto? Siendo todopoderoso i e Creador di tur criatura ta duna Dios e derecho di goberná riba nan. Ya cu e tin tur sabiduria, su gobernacion ta lo mihor pa tur criatura. Pero awor Dios su gobernacion a ser desafiá. Tambe, tabatin algu robes cu su creacion—hende? Despues nos lo examiná con e cuestion di integridad humano ta enbolbí.
5 Dor cu hende a bira independiente di Dios, un otro cuestion tabata implicá: Lo a bai mas mihor cu hende si Dios no a goberná nan? E Creador siguramente tabata sa e contesta, pero un manera sigur pa hende haña sa tabata dor di permití nan e libertad total cu nan tabata kier. Nan a scoge e curso ei di nan mes boluntad liber, pues Dios a permití esei.
6, 7. Pakico Dios a permití hende libertad total pa asina tantu tempu?
6 Dor di permití hende suficiente tempu pa experimentá cu libertad total, Dios lo a establecé pa semper si lo a bai hende mas mihor bou di gobernacion di Dios of di nan mes. I e tempu permití lo mester tabata suficiente largu pa permití hende alcansá loke nan a considerá e máximo di nan logronan político, industrial, científico i médico.
7 P’esei, Dios a permití hende rienda liber te den nos dia pa mustra fuera di tur duda si gobernacion humano independiente di dje por tin éxito of no. Pues hende por a scoge entre amabilidad i crueldad, entre amor i odio, entre husticia i inhusticia. Pero tambe el a ser confrontá cu e consecuencianan di su scogementu: bondad i pas of maldad i sufrimentu.
Rebelion di Criaturanan Spiritual
8, 9. Con rebelion a cuminsá den e region spiritual? (b) Satanas a influenciá ken, ademas di Adam i Eva, pa rebelá?
8 Tin un otro factor pa considerá. Nos mayornan original no tabata e úniconan cu a rebelá contra Dios su gobernacion. Pero ken mas tabata existí na e tempu ei? Criaturanan spiritual. Promé cu Dios a crea hende, el a crea un forma di bida mas haltu, gran cantidad di angelnan, pa bida den e region celestial. Nan tambe tabata creá cu boluntad liber i tambe cu e necesidad di someté nan na Dios su gobernacion.—Job 38:7; Salmo 104:4; Revelacion 5:11.
9 E Bijbel ta mustra cu rebelion a cuminsá promé den e region spiritual. Un criatura spiritual tabata kier libertad total. Asta e tabata kier pa hende ador’é. (Mateo 4:8, 9) E spiritu rebelde aki a bira un factor den influenciá Adam i Eva pa rebelá, pretendiendo falsamente cu Dios tabata teniendo atras algu bon for di nan. (Génesis 3:1-5) P’esei e ta ser yamá Diabel (Calumniador) i Satanas (Opositor). Despues, el a tenta otro criaturanan spiritual pa rebelá. Nan a bira conocí como demoño.—Deuteronomio 32:17; Revelacion 12:9; 16:14.
10. Kico a resultá for dje rebelion di hende i criaturanan spiritual?
10 Hende, dor di rebelá contra Dios, a entregá nan mes na e influencia di Satanas i su demoñonan. Ta p’esei e Bijbel ta yama Satanas “e dios dje sistema di cosnan aki,” kende “a ciega e mente dje incrédulonan.” Pues, Dios su Palabra ta bisa cu “henter e mundu ta drumí den poder dje malbado.” Jesus mes a yama Satanas “e gobernante dje mundu aki.”—2 Corintio 4:4; 1 Juan 5:19; Juan 12:31.
Dos Cuestion
11. Encuanto cua otro cuestion Satanas a desafiá Dios?
11 Satanas a lanta un otro cuestion cu a desafiá Dios. En efecto, el a acusá cu Dios tabata robes den e manera cu El a crea hende i cu ningun persona lo kier a haci loke ta corecto ora nan ser poné bou di presion. En realidad, el a pretendé cu bou di prueba nan asta lo a maldicioná Dios. (Job 2:1-5) Den e manera aki Satanas a pone na duda e integridad dje creacion humano.
12-14. Con tempu lo a revelá e berdad encuanto e dos cuestionnan cu Satanas a lanta?
12 P’esei, Dios a permití suficiente tempu pa tur criatura inteligente mira con e cuestion aki i tambe e cuestion di Dios su soberania lo a ser resolvé. (Compará cu Exodo 9:16.) E eventual experencia di historia humano lo a revelá e berdad encuanto e dos cuestionnan aki.
13 Promé cu tur cos, kico tempu lo a revelá encuanto e cuestion di soberania universal, e derecho di Dios su gobernacion? Hende lo por a goberná nan mes mihor cu Dios? Cualkier sistema di gobernacion humano separá di Dios lo por a introducí un mundu felis liber di guera, crímen i inhusticia? Cualkier lo a eliminá pobresa i percurá prosperidad pa tur hende? Cualkier lo a vence malesa, behes i morto? Dios su gobernacion tabata diseñá pa haci tur esei.—Génesis 1:26-31.
14 Encuanto e di dos cuestion, kico tempu lo a revelá encuanto e balor dje creacion humano? Tabata un eror di Dios di a crea hende den e manera cu el a haci’é? Cualkier un di nan lo a haci lo corecto bou di prueba? Cualkier hende lo a mustra cu nan tabata kier Dios su gobernacion en bes di gobernacion humano independiente?
[Plachi na página 13]
Dios a permití tempu pa hende alcansá e máximo di nan logronan
[Rekonosementu]
Shuttle: Basá riba potret di NASA