E Mundu Aki Lo Sobrebibí?

Ningun otro generacion a tende asina tantu papiamentu tocante e fin di mundu. Hopi hende tin miedu cu mundu lo caba den un holocausto nuclear. Otronan ta kere cu kisas polucion lo destruí mundu. Ainda tin otronan ta preocupá cu cáos económico lo pone masanan di humanidad un contra otro.

E mundu aki realmente por caba? Si e sosodé, kico esei lo nificá? Un mundu a yega di caba nunca promé?

Un Mundu Ta Caba—Un Otro Ta Reemplas’é

Sí, un mundu a yega di caba. Considerá e mundu cu a bira masha malbado den e dianan di Noe. E Bijbel ta splica: “E mundu dje tempu ei a sufri destruccion ora e tabata inundá cu awa.” Tambe Bijbel ta bisa: “[Dios] no a keda sin castigá un mundu di antigua, pero a warda den siguridad Noe, un predicador di husticia, cu siete otro ora el a trece un diluvio riba un mundu di hende malbado.”—2 Pedro 2:5; 3:6.

Tuma nota di loke e fin dje mundu ei a nificá i loke e no a nificá. E no a nificá e fin di humanidad. Noe i su famia a sobrebibí e Diluvio mundial. I tambe e planeta Tera i e cielu bunita yen di strea. Tabata “un mundu di hende malbado” cu a perecé, un sistema di cosnan malbado.

Cu tempu, segun Noe su desendencia a aumentá, un otro mundu a desaroyá. E di dos mundu ei, of sistema di cosnan, a existí te den nos dia. Su historia a ser yená cu guera, crímen i violencia. Kico lo sosodé cu e mundu aki? Lo e sobrebibí?

Futuro dje Mundu Aki

Despues di bisa cu e mundu den dia di Noe a sufri destruccion, e relato di Bijbel ta sigui: “Via e mesun palabra cielu i tera cu tei awor ta ser wardá pa candela.” (2 Pedro 3:7) En berdad, manera un otro escritor bíblico ta splica: “E mundu [esun cu ta existí awe] ta pasando forbij.”—1 Juan 2:17.

Bijbel no kier men cu e tera literal of e cielu yen di strea lo pasa forbij, mescos cu esakinan no a pasa forbij den dia di Noe. (Salmo 104:5) Mas bien, e mundu aki, cu su “cielu,” of lidernan gubernamental bou dje influencia di Satanas i su “tera,” of sociedad humano, lo ser destruí como si fuera dor di candela. (Juan 14:30; 2 Corintio 4:4) E mundu aki, of sistema di cosnan, lo perecé mes sigur cu e mundu promé cu Diluvio. Asta Jesucristo a papia tocante e situacion den “e dianan di Noe” como un ehempel di loke lo sosodé djis promé cu e fin dje mundu aki.—Mateo 24:37-39.

Significativamente, ora Jesus a papia dje dianan di Noe, esei tabata como contesta na e pregunta di su apostelnan: “Ki señal lo tin di bo binimentu i di fin di mundu?” (Mateo 24:3, Testament Nobo) Jesus su siguidornan tabata sa cu e mundu aki lo a caba. E prospecto aki a spanta nan?

Al contrario, ora Jesus a describí sucesonan cu lo sosodé promé cu e fin di mundu, el a animá nan pa alegrá ‘pasobra nan liberacion tabata yegando cerca.’ (Lucas 21:28) Sí, liberacion for di Satanas i su sistema di cosnan malbado i drenta den un mundu nobo pacífico!—2 Pedro 3:13.

Pero na ki tempu e mundu aki lo caba? Ki “señal” Jesus a duna di su “binimentu i di fin di mundu”?

“E Señal”

E palabra griego traducí aki como “binimentu” ta pa·rou·siʹa i e ta nificá “presencia,” esta, realmente siendo presente. Pues ora “e señal” ta ser mirá, esei lo no a nificá cu Cristo lo bini pronto sino cu el a bolbe caba i tabata presente. Esei lo a nificá cu el a cuminsá goberná invisiblemente como un rey celestial i cu pronto lo e trece un fin na su enemigunan.—Revelacion 12:7-12; Salmo 110:1, 2.

Jesus no a duna solamente un suceso como “e señal.” El a describí hopi suceso i situacionnan mundial. Tur esakinan lo a tuma lugar durante e tempu cu escritornan bíblico a yama “e último dianan.” (2 Timoteo 3:1-5; 2 Pedro 3:3, 4) Considerá algun dje cosnan cu Jesus a profetisá cu lo a marca “e último dianan.”

“Nacion lo lanta contra nacion i reino contra reino.” (Mateo 24:7) Guera den tempu moderno tabata di magnitud mas grandi cu nunca promé. Un historiador a nota: “E Promé Guera Mundial [cuminsando na 1914] tabata e promé guera ‘total.’” Sin embargo, e di dos guera mundial tabata hopi mas destructivo. I guera ta sigui ruiná e tera. Sí, Jesus su palabranan a haña cumplimentu den un forma dramático!

“Lo tin scarcedad di cuminda.” (Mateo 24:7) Despues di Guera Mundial I a bini e hamber kisas di mas grandi den tur historia.[2] Hamber teribel tambe a sigui Guera Mundial II. Un plaga di malnutricion ta afectá te na un di cincu parti dje poblacion di tera, matando rond di 14 miyon mucha tur aña. Berdaderamente, tabatin “scarcedad di cuminda”!

“Lo tin temblornan grandi.” (Lucas 21:11) Na averahe, rond di dies biaha mas tantu hende a muri cada aña dor di temblornan desde 1914 cu den siglonan anterior. Considerá solamente un par di esnan mas principal: 1920, China, 200.000 matá; 1923, Hapon, rond di 140.000 persona a muri of disparcé; 1939, Turkia, 32.700 morto; 1970, Peru, 66.800 matá; i 1976, China, rond di 240.000 (of, segun algun fuente, 800.000) víctima. Siguramente, “temblornan grandi”!

“Den un lugar tras di otro pest.” (Lucas 21:11) Djis despues di Guera Mundial I, rond di 21 miyon hende a muri dje griep spañó. Science Digest a raportá: “Den tur historia nunca morto a atacá asina severo i rápido.” Desde e tempu ei, malesa di curason, cancer, AIDS i hopi otro plaga a mata cientos di miyones di hende.

“Aumento di maldad.” (Mateo 24:12) Nos mundu desde 1914 a bira conocí como unu di crímen i violencia. Den hopi lugar ningun hende ta sinti nan sigur riba caya ni sikiera durante dia. Anochi hende ta keda den nan cas tras di porta di lock i cu trali, cu miedu di bai pafó.

Hopi otro cosnan tabata profetisá pa sosodé durante e último dianan i tur esakinan tambe ta ser cumplí. Esaki ta nificá cu e fin di mundu ta cerca. Pero, felismente, lo tin sobrebibiente. Despues di bisa “e mundu ta pasando forbij,” Bijbel ta primintí: “Esun cu ta haci e boluntad di Dios lo permanecé pa semper.”—1 Juan 2:17.

Pues nos tin cu siña Dios su boluntad i haci’é. Anto nos por sobrebibí fin dje mundu aki pa disfrutá eternamente dje bendicionnan di Dios su mundu nobo. Bijbel ta primintí cu na e tempu ei: “Dios . . . lo seca tur lágrima for di [hende su] wowo i morto lo no existí mas, ni yoramentu ni sclamamentu ni dolor lo no existí mas.”—Revelacion 21:3, 4.

Aménos cu tin otro indicacion, tur cita bíblico ta dje Traducción del Nuevo Mundo de las Santas Escrituras.

[Rekonosementu pa Potrèt na página 6]

Acreditacion pa potret: Avion: potret di USAF. Mucha: potret di WHO dor di W. Cutting. Temblor: Y. Ishiyama, Hokkaido University, Hapon.