Disfruta di Bida di Famia

Famianan realmente por ta felis?

Con esei ta posibel?

Bo conocé cualkier famia cu ta mes uní i felis manera esnan cu bo ta mira den e tratado aki? Famianan tur caminda ta ser ruiná completamente. Divorcio, falta di siguridad di trabou, dilemanan di mayornan soltero, frustracion—tur esakinan ta contribuí na e crísis. Un experto riba bida di famia a lamentá: “Pa awor aki, pronósticonan di fayecimentu dje famia ta conocí pa tur hende.”

Di con famianan awe ta ser bombardiá cu tal problemanan serio? Con nos por disfrutá di bida di famia?

Con e Famia A Originá

Pa contestá e preguntanan aki, nos mester conocé e orígen di matrimonio i e famia. Pasobra si esakinan tabatin un Originador—un Creador—miembronan di famia mester acudí na dje pa guia, ya cu siguramente e lo sa mihor con nos por disfrutá di bida di famia plenamente.

Ta interesante cu hopi hende ta kere cu e areglo di famia no tabatin Originador. The Encyclopedia Americana ta bisa: “Algun escolástico ta incliná na demostrá cu e orígen di matrimonio a bini di areglo di forma pareha di bestia cu tabatei promé cu hende den e proceso di evolucion.” Sin embargo, Jesucristo a papia dje creacion di homber i muher. El a cita como autoridad e registro bíblico di promé i a bisa: “Loke Dios a uni huntu bou di yugo no laga ningun hende separ’é.”—Mateo 19:4-6.

Pues Jesucristo tin razon. Un Dios inteligente a crea e promé hendenan i a haci areglo pa bida di famia felis. Dios a trece e promé pareha huntu den matrimonio i a bisa cu e homber “mester pega na su esposa i nan mester bira un solo carni.” (Génesis 2:22-24) Por ta anto, cu e problemanan di famia djawe ta debí na e siguimentu tras di estilonan di bida cu ta violá normanan poné dor dje Creador den su Palabra, e Bijbel?

Cua Caminda pa Exito?

Manera sin duda bo a ripará, mundu moderno ta promové interes propio i realisacion di bo mes speransa i ambicionnan. “Golosidad ta saludabel,” un experto di finansa a conta un clas graduando di universidad na Merca. “Bo por ta golos i tog sinti bon tocante bo mes.” Pero siguiendo tras di posesionnan material no ta hiba na éxito. En realidad, materialismo riba su mes ta un dje menasanan mas grandi pa bida di famia pasobra e ta stroba relacionnan humano i ta chica hende di tempu i placa. Na contraste, considerá con solamente dos proverbio bíblico ta yuda nos mira kico ta importante pa felicidad.

“Mihor come berdura huntu cu hende cu bo ta stima cu come e carni di mas excelente caminda tin odio.”

“Mihor come un casca di pan secu huntu cu pas di mente cu tin un bankete den un cas yen di problema.”

Proverbio 15:17; 17:1, “Today’s English Version.”

Nan ta poderoso, no ta berdad? Djis pensa con diferente e mundu lo tabata si tur famia a tene nan na e prioridadnan aki! Tambe Bijbel ta percurá guia balioso encuanto con miembronan di famia mester trata un e otro. Considerá solamente un par di instruccion cu e ta duna.

Esposonan: ‘Stima bo esposa mescos cu bo mes curpa.’—Efesio 5:28-30.

Simpel, pero masha práctico! Bijbel tambe ta instruí un esposo pa ‘asigná onor na su esposa.’ (1 Pedro 3:7) E ta haci esaki dor di dun’é atencion special, incluyendo ternura, comprension i siguransa. Tambe e ta balorá su opinionnan i ta scucha na dje. (Compará cu Génesis 21:12.) Bo no ta di acuerdo cu cualkier famia lo beneficiá si e esposo trata su esposa mustrando interes, manera e mes lo kier ser tratá?—Mateo 7:12.

Esposanan: “Tene respet profundo pa [bo] esposo.”—Efesio 5:33.

Un esposa ta contribuí na felicidad di famia dor di yuda su esposo cumpli cu su responsabilidadnan pisá. Esaki ta loke tabata e intencion, siendo cu Dios a proveé un esposa pa ser “un yudante p’e, como un complemento di dje.” (Génesis 2:18) Bo por apreciá e bendicion pa bida di famia ora un esposa ta mustra respet na su esposo dor di apoyá su decisionnan i cooperá cuné pa logra metanan dje famia?

Parehanan Casá: “Esposo i esposanan mester ta fiel na otro.”—Hebreo 13:4, TEV.

Ora nan ta fiel asina, bida di famia siguramente ta ser beneficiá. Adulterio hopi bes ta destruí un famia. (Proverbio 6:27-29, 32) Sabiamente anto, Bijbel ta insta: “Sea felis cu bo esposa i haña bo goso cu e mucha muher cu bo a casa cuné . . . Pakico bo mester duna bo amor na un otro muher?”—Proverbio 5:18-20, TEV.

Mayornan: “Entrená [boso yunan] di acuerdo cu e caminda pa [nan].”—Proverbio 22:6.

Ora mayornan ta duna tempu i atencion na yunan, bida di famia sigur lo mehorá. Pues, Bijbel ta insta mayornan pa siña nan yunan principionan corecto ‘ora nan ta sinta den nan cas i ora nan ta cana riba caminda i ora nan ta cai drumi i ora nan ta lanta.’ (Deuteronomio 11:19) Tambe Bijbel ta bisa cu mayornan mester mustra cu nan ta stima nan yunan dor di disipliná nan.—Efesio 6:4.

Yunan: “Yunan, sea obediente na boso mayornan den union cu Señor.”—Efesio 6:1.

Ta berdad cu den e mundu malbado aki, no ta semper fácil pa obedecé bo mayornan. Sin embargo, bo no ta di acuerdo cu ta sabí pa haci loke e Originador di famia ta bisa nos? E sa loke ta mihor pa haci nos bida di famia mas felis. P’esei trata tur cu tin pa obedecé bo mayornan. Sea determiná pa evitá e hopi tentacionnan di mundu pa haci loke ta malu.—Proverbio 1:10-19.

Te n’e grado cu cada miembro di famia ta aplicá e conseho di Bijbel, bida di famia lo ser beneficiá. E famia no solamente lo disfrutá di un bida mas mihor awor sino lo e tin e prospecto di un futuro maraviyoso den e mundu nobo primintí dor di Dios. (2 Pedro 3:13; Revelacion 21:3, 4) Pues haci’é un custumber di famia pa studia Bijbel huntu! Miyones di famia mundialmente a haña cu e guia percurá den e buki E Secreto pa Felicidad den Famia di ta un berdadero beneficio.

A ménos cu tin otro indicacion, tur cita bíblico ta dje Traducción del Nuevo Mundo de las Santas Escrituras.