Ken Realmente Ta Goberna e Mundu?

Hopi hende lo a contestá e pregunta aki riba cu un solo palabra—Dios. Pero significativamente, ningun caminda Bijbel ta bisa cu sea Jesucristo of su Tata ta e berdadero gobernantenan dje mundu aki. Al contrario, Jesus a bisa: “E gobernante dje mundu aki lo ser tirá afó.” I el a agregá: “E gobernante dje mundu ta biniendo. I e no tin gara riba mi.”—Juan 12:31; 14:30; 16:11.

Pues e gobernante dje mundu aki ta den oposicion di Jesus. Ken esaki por ta?

Un Indicacion For di Condicionnan Mundial

Apesar dje esfuersonan di hende bon-intencioná, e mundu a sufri teriblemente atraves di henter historia. Esaki ta pone hende pensativo puntra nan mes, manera e defunto escritor di editorial David Lawrence a puntra: “‘Pas riba tera’—casi tur hende kier esei. ‘Bon boluntad pa hende’—casi tur e hendenan dje mundu ta sinti esei un pa cu otro. Pues anto kico ta robes? Pakico guera ta menasá apesar dje deseonan natural di hende?”

Esei ta parce un contradiccion, no ta berdad? Ora e deseo natural di hende ta pa biba na pas, generalmente nan ta odia i mata un e otro—i masha ferosmente. Considerá e excesonan cu sanger friu den crueldad monstruoso. Hende a usa cambernan di gas, camponan di concentracion, lansadornan di flam, bomnan di napalm i otro métodonan horibel pa torturá i mata un i otro sin misericordia.

Bo ta kere cu hende, cu ta anhelá pa pas i felicidad, ta capas, riba nan mes, di tal maldad grosero contra otro? Cua forsanan ta pusha hende na tal echonan repugnante of maniobrá nan den situacionnan caminda nan ta sinti nan obligá di cometé atrocidad? Bo a yega di puntra bo mes si un cierto poder malbado, invisibel ta influenciando hende pa cometé tal actonan di violencia?

E Gobernantenan di Mundu Identificá

No tin mester di rei den e asuntu aki, pasobra e Bijbel claramente ta mustra cu un persona inteligente invisibel a bin ta controlá tantu hende como nacionnan. E ta bisa: “Henter e mundu ta drumí den poder dje malbado.” I e Bijbel ta identifik’é, bisando: “Esun yamá Diabel i Satanas . . . ta gañando henter e tera habitá.”—1 Juan 5:19; Revelacion 12:9.

Na un ocasion ora Jesus a ser “tentá dor dje Diabel,” Jesus no a cuestioná Satanas su papel como e gobernante dje mundu aki. E Bijbel ta splica loke a sosodé: “E Diabel a hib’é huntu cuné na un ceru extraordinariamente haltu i a mustr’é tur e reinonan di mundu i nan gloria i el a bis’é: ‘Tur e cosnan aki lo mi duná bo si bo cai abou i haci un acto di adoracion na mi.’ Anto Jesus a bis’é: ‘Bai fo’i mi, Satanas!’”—Mateo 4:1, 8-10.

Pensa riba esaki. Satanas a tenta Jesus dor di ofrec’é “tur e reinonan di mundu.” Sin embargo, Satanas su oferta lo tabata un berdadero tentacion si Satanas realmente no tabata e gobernante dje reinonan aki? No, lo e no tabata. I ripará cu Jesus no a ninga cu tur e gobiernunan mundial aki tabata di Satanas, cua lo el a haci si Satanas no tabatin poder riba nan. Pues, anto, Satanas e Diabel realmente ta e gobernante invisibel dje mundu! Bijbel, en realidad, ta yam’é “e dios dje sistema di cosnan aki.” (2 Corintio 4:4) Sin embargo, con un persona asina malbado hamas a yega na e posicion poderoso aki?

Esun cu a bira Satanas tabata un angel creá dor di Dios, pero el a bira envidioso di Dios su posicion. El a desafiá Dios su derecho di gobernacion. Pa e propósito aki el a usa un colebra como un portabos pa gaña e promé muher, Eva, i asina el a logra haña Eva i su esposo, Adam, pa haci loke e tabata kier en bes di obedecé Dios. (Génesis 3:1-6; 2 Corintio 11:3) Tambe el a pretendé cu lo e por a apartá for di Dios tur yu di Adam i Eva cu no a nace ainda. P’esei Dios a permití tempu pa Satanas trata na proba su pretencion, pero Satanas no a logra.—Job 1:6-12; 2:1-10.

Significativamente, Satanas no ta so den su gobernacion dje mundu. E tabatin éxito den persuadí algun dje otro angelnan pa uní cuné den rebelion contra Dios. Esakinan a bira demoño, su cómplicenan spiritual. E Bijbel ta papia di nan ora e ta insta cristiannan: “Para firme contra e mañanan dje Diabel; pasobra nos tin un lucha, no contra sanger i carni, sino . . . contra gobernantenan mundial dje scuridad aki, contra e forsanan spiritual malbado den lugarnan celestial.”—Efesio 6:11, 12.

Resistí Spiritunan Malbado

E gobernantenan mundial invisibel i malbado aki, ta determiná pa gaña tur humanidad, apartando nan for di adoracion di Dios. Un manera cu spiritunan malbado ta haci esaki ta dor di promové e idea di sobrebibencia despues di morto, aunke Dios su Palabra claramente ta mustra cu e mortonan no ta conciente. (Génesis 2:17; 3:19; Ezekiel 18:4; Salmo 146:3, 4; Eclesiastés 9:5, 10) Pues, un spiritu malbado, imitando e bos di un persona cu a muri, kisas ta papia cu e persona ei su famia of amigunan na bida, sea mediante un medium spiritista of mediante un “bos” for dje region invisibel. E “bos” ta pretendé di ta e persona morto, sin embargo realmente e ta un demoño!

Pues si hamas bo tende un “bos” asina, no ser gañá. Rechasá loke sea cu e ta bisa i ripití e palabranan di Jesus: “Bai fo’i mi, Satanas!” (Mateo 4:10; Santiago 4:7) No permití curiosidad tocante e region spiritual poné bo bira enbolbí cu spiritunan malbado. Tal enbolbementu ta ser yamá spiritismo i Dios ta spierta su adoradornan contra dje den tur su formanan. Bijbel ta condená “cualkier persona cu ta usa divinacion . . . of cualkier persona cu ta consultá un medium spiritista of un pronosticador profesional di sucesonan of cualkier persona cu ta puntra e mortonan.”—Deuteronomio 18:10-12; Galatio 5:19-21; Revelacion 21:8.

Siendo cu spiritismo ta trece un persona bou di influencia dje demoñonan, resistí tur su prácticanan sin importá con pret of excitante nan ta parce di ta. E prácticanan aki ta incluí fihamentu den bola di cristal, uso di ‘ouija bord’, ESP [telepatia], wakmentu den plant’i man i astrologia. Tambe demoñonan a causa zonido i otro fenómenonan físico den casnan cu nan ta haci nan teritorio.

Ademas, spiritunan malbado ta usa pa nan probecho e inclinacion pecaminoso di hende dor di promové literatura, película i programanan di television cu ta presentá conducta sexual inmoral i innatural. E demoñonan sa cu si pensamentunan robes no ser sacá for dje mente nan lo causa impresionnan permanente i hiba hende na comportá inmoralmente—mescos cu e demoñonan mes.—Génesis 6:1, 2; 1 Tesalonicense 4:3-8; Hudas 6.

Berdad, hopi hende kisas ta haci bofon dje idea cu e mundu aki ta ser goberná dor di spiritunan malbado. Pero nan incredulidad no ta sorprendente, ya cu Bijbel ta bisa: “Satanas mes ta sigui transformá su mes den un angel di lus.” (2 Corintio 11:14) Su engaño di mas sabí tabata di ciega hopi hende dje echo cu e i su demoñonan realmente ta existí. Pero no sea gañá! E Diabel i su demoñonan ta real i bo mester resistí nan continuamente.—1 Pedro 5:8, 9.

Felismente, e tempu ta cerca awor ora Satanas i su compinchinan lo no tei mas! “E mundu [incluyendo su gobernantenan demoño] ta pasando forbij,” e Bijbel ta sigurá, “pero esun cu ta haci e boluntad di Dios ta permanecé pa semper.” (1 Juan 2:17) Ta ki un alivio pa ser librá dje influencia malbado ei! P’esei, laga pa nos ta entre esnan cu ta haci Dios su boluntad i disfrutá di bida pa semper den Dios su hustu mundu nobo.—Salmo 37:9-11, 29; 2 Pedro 3:13; Revelacion 21:3, 4.

Aménos cu tin otro indicacion, tur cita bíblico ta dje Traducción del Nuevo Mundo de las Santas Escrituras.

[Plachi na página 4]

Satanas por a ofrecé Jesus tur e gobiernunan mundial aki si nan no tabata di dje?