Hamas Lo Yega Di Tin Un Mundu Sin Guera?
1, 2. Cua preguntanan ta lanta encuanto futuro dje mundu?
DESDE su establecimentu como un estado moderno na 1948, Israel tabata prepará contra su bisiñanan. E confrontacion aki, e cuestion coriente aki, a laga—na tur dos banda—un rastro di mamanan, esposanan, yunan i otronan sin nan sernan kerí i na luto. Tog, un dje deseonan natural di humanidad, specialmente na nivel di famia, ta pa por biba na pas.
2 Sin embargo, guera i pleitu no ta problemanan di Medio Oriente so. Ta parce cu barínan di polvo sperando pa ser cendí ta plamá na tur parti di mundu. Pues e pregunta ta, Hamas lo logra alcansá pas, no solamente na Medio Oriente sino pas mundial? Si ta asina, con esei lo ser lográ? Esei lo ta mediante di humanidad su bon boluntad político, religioso i étnico? Esei ta parce probabel? Of Dios, e Doño i Creador dje tera, lo tin cu intervení?
3-5. (a) Cua promesa encuanto pas ta ser duná den Bijbel? (b) Cua preguntanan mester di mas investigacion?
3 E Scritura Hebreo ta duna nos profecianan alentador tocante un tempu ora e nacionnan “lo bati nan spada na chapi i nan lansanan na sker di corta mata: nacion lo no hisa spada contra nacion; nunca mas nan lo conocé guera.”—Isaías 2:4.
4 No ta Isaías so a papia dje pas aki cu lo encerá henter mundu. (Salmo 46:9-11 [46:8-10, NW]) Un tempu di pas i armonia completo entre hende realmente ta un tema principal den Bijbel. Manera e estadista i autor israelí Abba Eban a nota, e Scritura Hebreo a duna israelitanan di antigua un perspectiva i speransa único pa futuro, ya cu “Israel so a mira padilanti na un época di oro den futuro.”1 Sí, un futuro maraviyoso ta cerca pa tur humanidad, un fin na guera i hopi mas. Isaías a profetisá tambe di condicionnan paradísico mundialmente—un fin na pobresa, malesa i asta morto.—Isaías 11:9; 25:8; 33:24; 35:5, 6; 65:21.
5 Algun hende kisas ta reaccioná, ‘E profecianan ei tabata skirbí miles di añanan pasá, tog ainda tin guera. Di ki manera por considerá Bijbel como un fuente confiabel di speransa? Ki prueba concreto ta existí cu Bijbel realmente ta e Palabra di Dios?’