E Buki Mas Ampliamente Distribui na Mundu

“Bijbel ta e buki mas lesá den historia. . . . A distribuí mas ehemplar di Bijbel cu di cualkier otro buki. Tambe Bijbel a ser traducí mas biaha i den mas idioma, cu cualkier otro buki.”​—“The World Book Encyclopedia.”¹

DEN cierto sentido, mayoria buki ta mescos cu hende. Nan ta aparecé riba esena, kisas ta bira popular, i​—cu excepcion di un man yen di obranan clásico​—ta bira bieu i muri. Hopi bes bibliotecanan ta sirbi como santana pa cantidadnan incontabel di buki cu no ta ser usá, ni lesá i cu, de echo, ta morto.

Sin embargo, Bijbel ta excepcional asta compará cu obranan clásico. Maske el a cuminsá ser skirbí 3.500 aña pasá, ainda e ta yen di bida. E ta e buki mas ampliamente circulá riba tera, lagando cualkier otro leu tras di dje.a Tur aña, un 60 miyon ehemplar di Bijbel, sea completo of partinan di dje, ta ser distribuí. E promé edicion imprimí riba imprenta tipo móbil, a sali for dje imprenta dje inventor aleman, Johannes Gutenberg, rond di 1455. Segun cálculo, desde e tempu ei te cu awor cuater mil miyon Bijbel (completo of en parti) a ser imprimí. Ningun otro buki, sea religioso of di otro género, no ta ni yega cerca di e cantidad aki.

Tambe, Bijbel ta e buki mas ampliamente traducí den historia. Bijbel completo of partinan di dje a ser traducí den mas cu 2.100 idioma i dialecto.b Mas cu 90 porciento dje famia humano tin acceso na por lo ménos parti di Bijbel den nan mes idioma.² Asina e buki aki a crusa fronteranan nacional i a surpasá bareranan racial i étnico.

Kisas bo no ta haña cu estadísticanan so ta motibu pa poné bo examiná e Bijbel. No obstante, e cifranan di circulacion i traduccion ta impresionante, dunando prueba cu Bijbel tin un atraccion universal. Sigur, e buki mas bendí i mas ampliamente traducí den henter historia humano ta merecé bo consideracion.

[Nota]

[Plachi na página 6]

E Bijbel di Gutenberg, na latin, e promé buki completo imprimí riba imprenta tipo móbil