Un Buki pa Bo?

“N’e trahamentu di hopi buki no tin fin,” Sálomon a declará un 3.000 aña pasá. (Eclesiástes 12:12) E comentario ei ta mas apropiado awe cu nunca. Ademas dje obranan clásico, miles di buki nobo ta ser imprimí tur aña. Cu asina tantu buki pa scoge for di dje, pakico bo mester lesa Bijbel?

HOPI hende ta lesa buki sea pa entretené nan mes of pa ser informá, of kisas pa ámbos motibu. Mescos por ta cierto di lesa Bijbel. E por ta lesamentu iluminador, i asta entretenedor. Pero Bijbel ta mas cu esei. E ta un fuente único di conocimentu.​—Eclesiástes 12:​9, 10.

Bijbel ta contestá preguntanan cu hende a pensa riba dje pa hopi tempu​—preguntanan tocante nos pasado, nos presente i nos futuro. Hopi hende ta puntra nan mes: Di unda nos a bin? Ki propósito bida tin? Con nos por haña felicidad den bida? Semper lo tin bida riba tera? Kico tin den futuro pa nos?

Tur e evidencianan presentá aki den poní huntu ta establecé claramente cu Bijbel ta exacto i auténtico. Ya nos a considerá caba con su conseho práctico por yuda nos hiba un bida felis i yen di propósito awe. Ya cu su contestanan tocante e presente ta satisfaciente, siguramente su contestanan tocante e pasado i su profecianan tocante futuro ta merecé nos sumo atencion.

Con pa Saca Mayor Probecho

Hopi hende a cuminsá lesa Bijbel, pero ora nan a topa cu partinan difícil pa comprendé nan a stop. Si esei tabata e caso cu bo, tin algun cos cu lo por ta útil.

Scoge un traduccion confiabel skirbí den idioma moderno, manera e Traducción del Nuevo Mundo de las Santas Escrituras.a Algun hende ta cuminsá cu lesa e relatonan di Evangelio tocante e bida di Jesus, kende su siñansanan sabí, manera esnan hañá den e Sermon Riba Ceru, ta reflehá un bon conocimentu dje naturalesa humano i ta describí con pa mehorá nos bida.​—Mira Mateo capítulo 5 te 7.

Ademas di lesa Bijbel di kaft pa kaft, ta masha informativo pa studi’é via e método di tópico. Esaki ta nificá cu bo ta analisá loke Bijbel ta bisa riba un cierto tópico. Kisas bo ta keda sorprendí pa sa loke Bijbel berdaderamente ta bisa di tópiconan manera alma, shelu, tera, bida i morto, i tambe e Reino di Dios​—loke e ta i loke lo e logra.b Testigonan di Jehova tin un programa grátis di studio di Bijbel via tópico. Bo por puntra tocante esei dor di skirbi e publicadónan, usando e adres mas cumbiniente na página 2.

Despues di a examiná e evidencia, hopi hende a yega n’e conclusion cu Bijbel ta di Dios, kende ta ser identificá den e Scritura como “Jehova.” (Salmo 83:18) Kisas bo no ta convencí cu Bijbel ta di orígen divino. Pero pakico no examin’é pa bo mes? Nos tin sigur cu despues cu bo siña, meditá i kisas experenciá e balor práctico di su sabiduria eterno pa bo mes, lo bo bin ripará cu Bijbel en berdad ta un buki pa tur hende, i mas ainda​—un buki pa bo.

[Nota]