Notisia di Reino Num. 35

Tur Hende Lo Stima Otro un Dia?

Amor pa Prohimo A Fria

MIYONES di hende ta sinti nan desampará i infelis, sin niun caminda pa acudí pa yudansa. Un señora comerciante penshoná a comentá: ‘Un anochi un biuda cu ta biba riba mi piso a bati na mi porta i a bisa cu e tabata sintié su so. Mi a bis’é amablemente pero bon cla cu mi tabata druk. El a pidi dispensa pa a molestiá mi i a bai.’

Lamentablemente, e anochi ei mes, e biuda a cometé suicidio. Despues di esei, e señora comerciante a bisa cu el a siña un “les duru.”

Hopi bes falta di amor pa próhimo ta hiba na tragedia. Durante e conflictonan étnico na Bosnia i Herzegovina, un tempu parti di Yugoslavia, mas cu un miyon hende a haña nan forsá ta hui for di nan cas i dies di miles a ser matá. Dor di ken? “Nos bisiñanan,” un hobencita a lamentá, kende a ser sacá for di su pueblito. “Nos tabata conocé nan.”

Na Ruanda cientos di miles di hende a ser masacrá, hopi bes dor di nan mes bisiñanan. “E hutunan i e tutsinan [a biba] huntu, casando cu otro, sin preocupá of ni sikiera sa ken tabata un hutu i ken tabata un tutsi,” The New York Times a informá. “Anto di ripiente algu a cambia,” i “e matansanan a cuminsá.”

Mescos tambe, hudiunan i arabirnan na Israel ta biba lado a lado, pero hopi ta odia otro. Mésun situacion ta reina entre hopi católico cu protestant na Irlanda i entre mas i mas grupo den otro paisnan. Nunca promé den historia mundu tabata falta asina tantu amor.

Pakico Amor pa Próhimo A Fria?

Nos Creador ta duna e contesta. Su Palabra, e Bijbel, ta yama e tempu den cua nos ta biba “e último dianan.” Esaki ta un periodo durante cua, segun profecia di Bijbel, hende lo ‘no tin cariño natural.’ Relacioná cu e “tempu crítico, duru pa trata cuné” aki, cu e Scritura ta yama tambe “e conclusion dje sistema di cosnan,” Jesucristo a predicí cu “e amor dje mayoria lo fria.”​—2 Timoteo 3:​1-5; Mateo 24:​3, 12.

P’esei, e falta di amor cu tin awe ta parti dje evidencia cu nos ta bibando den e último dianan dje mundu aki. Afortunadamente, esei ta nificá tambe cu e mundu aki di hende malbado pronto lo ser reemplasá dor di un hustu mundu nobo goberná pa amor.​—Mateo 24:​3-14; 2 Pedro 2:5; 3:​7, 13.

Pero di berdad nos tin motibu pa kere cu un cambio asina ta posibel​—cu tur hende por siña stima otro i biba huntu na pas un cu otro?

Amor Pa Prohimo—Un Realidad

“Ken realmente ta mi próhimo?” un abogado di promé siglo a puntra Jesus. Sin duda el a spera pa Jesus bisa, ‘Bo compatriotanan hudiu.’ Pero den un cuenta tocante un samaritano amoroso, Jesus a mustra cu hende di otro nacionalidad tambe ta nos próhimo.​—Lucas 10:​29-37; Juan 4:​7-9.

Jesus a enfatisá cu, despues di amor pa Dios, amor pa próhimo mester dirigí nos bida. (Mateo 22:​34-40) Pero, tin un grupo di hende cu berdaderamente a yega di stima nan próhimo? Sí, e cristiannan di promé! Nan tabata conocí p’e amor cu nan tabatin pa otronan.​—Juan 13:​34, 35.

Kico di awe? Tin hende cu ta practicá un amor manera Cristo a mustra? Encyclopedia Canadiana ta comentá: “E obra di Testigonan di Jehova ta e rebibamentu i restablecimentu dje cristianismo di promé cu Jesus i su disipelnan a practicá . . . Tur ta ruman.”

Kico esei kier men? Esei kier men cu Testigonan di Jehova no ta laga nada​—ni rasa, nacionalidad ni antecedente étnico​—pone nan odia nan próhimo. Ni nan lo no mata ningun hende, pasobra den un sentido figurativo nan a bati nan spada na ploeg i nan lansa na skèr di corta mata. (Isaías 2:4) De echo, e Testigonan ta conocí como hende cu ta tuma e iniciativa pa yuda nan próhimo.​—Galationan 6:10.

Nada straño cu un editorial den e corant Sacramento Union di California a remarcá: “No ta di mas pa bisa cu si henter e mundu tabata biba segun e credo di Testigonan di Jehova lo tabatin un fin na dramamentu di sanger i odio, i amor lo a reina como rey.” Un escritor dje revista Ring di Hungria a comentá: “Mi a yega n’e conclusion cu si Testigonan di Jehova tabata e úniconan cu ta biba riba tera, gueranan lo a stop di existí, i e único tareanan cu polis lo tabatin lo ta di controlá tráfico i saca pasport.”

Sin embargo, nos tin cu admití cu lo mester bin un cambio drástico rond mundu pa tur hende stima otro. Con e cambio ei lo tuma lugá? (Por fabor, mira e último página.)

Ora Tur Hende Lo Stima Otro

Un oracion cu Jesucristo a siña ta mustra cu un cambio dramático ta a punto di tuma lugá. Den su famoso Sermon Riba Ceru, Jesus a siña nos pidi den oracion: “Laga bo reino bini; bo boluntat sea hasí na tera meskos ku na shelu.”​—Mateo 6:10, Sosiedat Antiano di Beibel.

Kico e Reino di Dios ta? E ta un berdadero gobiernu, unu cu ta goberná for di shelu. Ta p’esei e yama “e reino di shelu.” Jesus, e “Prins di Pas,” a ser nombrá dor di su Tata como su gobernante.​—Mateo 10:7; Isaías 9:​6, 7; Salmo 72:​1-8.

Ora e Reino di Dios bini, kico lo sosodé cu e mundu yen di odio aki? “E reino,” lo “aplastá i pone un fin” na tur e gobiernunan corupto dje mundu aki. (Daniel 2:44) Bijbel ta splica: “Mundu ta pasa bai . . . , pero esun cu ta haci e boluntad di Dios ta permanecé pa semper.”​—1 Juan 2:17.

Relacioná cu e mundu nobo di Dios, Bijbel ta bisa: “E hustunan mes lo poseé e tera, i nan lo biba pa semper riba dje.” (Salmo 37:​9-11, 29; Proverbionan 2:​21, 22) Ki un tempu glorioso esei lo ta! “Lo no tin morto mas, ni lo no tin lamento ni sclamacion ni dolor mas.” (Revelacion 21:4) Asta e mortonan lo bolbe bek na bida, i henter e tera lo ser transformá den un paradijs literal.​—Isaías 11:​6-9; 35:​1, 2; Lucas 23:43; Echonan 24:15.

Pa biba den e mundu nobo di Dios, nos tin cu stima otro, manera Dios ta siña nos haci. (1 Tesalonicensenan 4:9) Un studiante di Bijbel den un pais na Oriente a bisa: “Mi ta anhelá e tempu ora, manera Bijbel ta primintí, tur hende lo a siña stima otro.” I nos por ta sigur cu Dios lo cumpli cu su promesanan! “Asta mi a papi’é,” e ta bisa, “lo mi hacié tambe.”​—Isaías 46:11.

Pero pa disfrutá dje bendicionnan bou di Dios su Reino, bo tin cu adkerí conocimentu di Bijbel, mescos cu miyones di hende di curason onrado ta haciendo mundialmente. (Juan 17:3) E foyeto di 32 página Kico Dios Ta Rekerí di Nos? lo yudá bo. Obtené un ehemplar dor di yena e cupon riba e página anterior i mand’é na e adres mas cerca di bo cas.

□ Lo mi kier ricibí e foyeto Kico Dios Ta Rekerí di Nos?

□ Por fabor, tuma contacto cu mi pa un studio di Bijbel grátis na cas.

[Rekonosementu pa Potrèt na página 2]

Tiradó scondí i entiero na Bosnia: Reuters/Corbis-Bettmann