Con Bo Por Siña Tocante Dios

Bo por siña tocante Jehova dor di lesa Bijbel. Hopi tempu pasá, Dios a scoge cierto hende pa skirbi su pensamentunan. E scrituranan ei yama Bijbel. Awe nos ta siña tocante Dios dor di lesa Bijbel. Debí cu Bijbel ta contené Jehova su palabra of mensahe, e ta ser yamá tambe e Palabra di Dios. Nos por kere loke Bijbel ta bisa pasobra Jehova no ta gaña nunca. “Ta imposibel pa Dios gaña.” (Hebreonan 6:18) E Palabra di Dios ta contené e berdad.—Juan 17:17.

Bijbel ta un dje regalonan di mas precioso cu Dios a duna nos. E ta manera un carta di un tata amoroso na su yunan. E ta conta nos tocante Dios su promesa pa cambia e tera den un lugá maraviyoso pa biba—un paradijs. E ta conta nos kico el a haci den pasado, kico e ta haciendo awor, i kico lo e haci den futuro pa su yunan fiel. Tambe e ta yuda nos resolvé nos problemanan i haña felicidad.—2 Timoteo 3:16, 17.

Testigonan di Jehova ta amigu di Dios; nan lo yuda bo comprendé loke Bijbel ta siña. Djis bisa nan cu bo kier studia Bijbel. Nan no ta cobra pa esaki. (Mateo 10:8) Banda di esei, bo por asistí na reunionnan cristian. Ta tene esakinan den lugánan di adoracion cu yama Salon di Reino. Si bo asistí na reunionnan cristian, bo conocimentu di Dios lo aumentá rápidamente.

Bo por siña di Dios for dje cosnan cu el a traha. Por ehempel, Bijbel ta bisa: “Dios a crea shelu i tera.” (Génesis 1:1) Ora Jehova a crea “shelu,” el a traha solo. Awor, kico esei ta bisa nos tocante Dios? E ta bisa nos cu Jehova tin gran poder. Ta e so por a traha algu asina poderoso manera solo. Tambe e ta bisa nos cu Jehova ta sabí, ya cu ta rekerí sabiduria pa traha solo, cu ta percurá calor i lus cu nunca ta caba.

Jehova su creacion ta mustra cu e ta stima nos. Pensa riba tur e diferente tipo di fruta cu tin riba tera. Jehova por a proveé djis un tipo di fruta so pa nos—of niun mes. En bes di esei, Jehova a duna nos hopi tipo di fruta den un gran variedad di forma, tamaño, color i sabor. Esaki ta mustra cu Jehova ta un Dios cu no solamente ta amoroso, pero tambe masha generoso, atento i bondadoso.—Salmo 104:24.