Nan Desaroyo i Crecementu Moderno

HISTORIA moderno di Testigonan di Jehova a cuminsá mas cu shen aña pasá. Na principio di añanan ’70 di siglo 19, un grupo no masha notabel a cuminsá studia Bijbel na Allegheny, Pennsylvania, Merca, cu awor ta un parti di Pittsburgh. Charles Taze Russell tabata e forsa principal tras dje grupo aki. Na juli 1879, nan a publicá e promé edicion di e revista E Toren di Vigilancia di Síon i Anunciante dje Presencia di Cristo (na ingles). Pa 1880 ya hopi congregacion a sali for dje solo grupito di studio di Bijbel ei, i plama bai na estadonan den cercania. Na 1881 a forma Zion’s Watch Tower Tract Society, i na 1884 e Sociedad aki a haña personalidad hurídico, cu Russell como presidente. Despues a cambia e nomber dje Sociedad pa Watch Tower Bible and Tract Society. Tabatin hopi hende e tempu ei ta duna testimonio di cas pa cas i ofrecé literatura bíblico. Tabatin 50 hende ta haci esaki den e trabou di tempu completo na 1888—awor e cantidad promedio mundialmente ta mas o ménos 700.000.

Pa 1909 ya e trabou a bira internacional, i e sede di Sociedad a muda bai caminda e ta situá awor na Brooklyn, New York. Sermonnan imprimí tabata sali simultáneamente den diferente korant, i na 1913 nan tabata sali den cuater idioma den miles di korant na Merca, Cánada i Europa. Nan a distribuí cientos di miles di buki, foyeto chikitu i tratado.

Na 1912 nan a cuminsá traha riba e “Foto-Drama di Creacion.” Pa medio di ‘slides’ i película cu zonido, e Foto-Drama a cubri e tempu for di creacion di tera te na final dje Reinado di Mil Aña di Cristo. A cuminsá present’é na 1914, cu un audiencia diario di 35.000 hende. E tabata un pionero den película cu zonido.

AÑA 1914

Un periodo crucial tabata acercando. Na 1876 e studiante di Bijbel Charles Taze Russell a contribuí cu e artículo “Tempu Gentil: Ki Ora E Ta Terminá?” pa Bible Examiner, publicá na Brooklyn, New York, cu na página 27 dje edicion di october a bisa: “E shete tempunan lo terminá na A.D. 1914.” E Tempu Gentil ta e periodo cu den un otro traduccion di Bijbel ta ser yamá “e tempu señalá dje nacionnan.” (Lucas 21:24) No ta tur cos cu nan a anticipá tocante 1914 a sosodé, pero tog el a marca e fin di e Tempu Gentil i tabata un aña cu nificacion special. Hopi historiadó i comentarista ta di acuerdo cu 1914 tabata un aña den historia humano den cua un cambio significativo a tuma lugá. E siguiente citanan ta ilustrá esaki:

“E último aña completamente ‘normal’ den historia tabata 1913, e aña promé cu Promé Guera Mundial a cuminsá.”—Editorial den Times-Herald, Washington, D.C., 13 di mart 1949.

“Mas i mas, historiadónan ta mira e periodo di 75 aña di 1914 pa 1989, cu ta abarcá e dos gueranan mundial i e guera friu, como un época apart riba su mes, un tempu único den cua gran parti di mundu tabata bringa den guera, recuperando di guera of preparando pa guera.”—The New York Times, 7 di mei 1995.

“Henter mundu a drenta cáos den tempu di Promé Guera Mundial, anto te ainda nos no sa di con. Promé cu esei hende a kere cu utopia tabata ta na bista. Tabatin pas i prosperidad. Anto tur cos a basha den otro. Desde e tempu ei nos a keda na rand di morto . . . Mas hende a ser matá den e siglo aki compará cu tur otro siglo den historia.”—Dr. Walker Percy, American Medical News, 21 di november 1977.

Mas cu 50 aña despues di 1914, estadista aleman Konrad Adenauer a skirbi: “Siguridad i trankilidad a disparcé for di bida di hende desde 1914.”—The West Parker, Cleveland, Ohio, 20 di januari 1966.

E promé presidente di Sociedad, C. T. Russell, a muri na 1916 i e siguiente aña Joseph F. Rutherford a bira su sucesor. Hopi cambio a tuma lugá. A introducí un revista compañero pa E Toren di Vigilancia, yamá E Epoca di Oro (na ingles). (Awor yamá Spierta!, cu un circulacion di mas cu 20.000.000 copia den mas cu 80 idioma.) A duna hopi énfasis na e testificacion di cas pa cas. Pa distinguí nan mes for di e denominacion di cristiandad, na 1931 e cristiannan aki a adoptá e nomber Testigonan di Jehova. E nomber aki ta basá riba Isaías 43:10-12.

A usa radio ampliamente den añanan ’20 i ’30 di siglo 20. Pa 1933 Sociedad tabata usa 403 emisora di radio pa transmití discursonan bíblico. Despues pa gran parti a remplasá e uso di radio pa e bishitanan di cas pa cas di Testigonan cu tocadisconan portátil i discursonan bíblico grabá. A cuminsá studionan di Bijbel cu tur hende cu a mustra interes den berdad bíblico.

VICTORIANAN DEN CORTE

Durante añanan ’30 i ’40 di siglo 20, a arestá un cantidad di Testigo pa motibu di e trabou aki, i a bringa casonan den corte pa defendé libertad di expresion, prensa, reunion i adoracion. Na Merca, casonan apelá den corte di promé instancia tabatin como resultado cu e Testigonan a gana 43 caso den Corte Supremo di Merca. Di igual manera, a ricibí huicionan faborabel den corte supremo di otro paisnan. Tocante e victorianan aki den corte, profesor C. S. Braden, den su buki These Also Believe (Esakinan Tambe Ta Kere), a bisa di e Testigonan: “Nan a contribuí di un manera sobresaliente na democracia dor di nan lucha pa mantené nan derechonan civil, ya cu den nan gran esfuerso nan a haci hopi pa garantisá e derechonan ei pa tur grupo minoritario na Merca.”

PROGRAMANAN SPECIAL DI ENTRENAMENTU

J. F. Rutherford a muri na 1942 i N. H. Knorr tabata su sucesor como presidente. Un programa di entrenamentu riba diferente área a cuminsá. Na 1943 a establecé e Scol Bíblico di Galad di Watchtower, un scol special pa entrená misionero. Di e tempu ei padilanti a manda graduadonan di e scol aki na paisnan rond mundu. Congregacionnan nobo a lanta manera paddestoel den paisnan caminda no tabatin ningun, i awor tin mas cu 100 sucursal establecí internacionalmente. Tempu-tempu ta tene cursonan special cu a ser establecí pa entrená ancianonan di congregacion, trahadónan boluntario na sucursalnan i esnan cu ta traha tempu completo (como pionero) den e trabou di duna testimonio. Un cantidad di diferente scol specialisá pa ministernan a ser tení na un centro di educacion cu ta operá na Patterson, New York.

N. H. Knorr a muri na 1977. Un dje último cambionan organisacional cu el a tuma parti aden promé cu su morto tabata ampliacion di e Cuerpo Gobernante, cu ta situá na e sede mundial na Brooklyn. Na 1976 responsabilidadnan administrativo a ser dividí i asigná na vários comité cu ta consistí di miembronan dje Cuerpo Gobernante, kendenan tur tabatin hopi década di experencia como minister.

AMPLIACION DJE FACILIDADNAN DI IMPRENTA

E historia di tempu moderno di Testigonan di Jehova ta yen di sosodementu dramático. Dje solo grupo chikitu di studio di Bijbel na Pennsylvania na 1870, e Testigonan a crece te na e cantidad di 90.000 congregacion rond mundu pa aña 2.000. Na promé instante nan tabata imprimí tur literatura na companianan comercial; anto na 1920, e Testigonan a producí algun literatura den edificionan di fábrica cu nan a huur. Pero desde 1927 padilanti, nan a producí hopi mas literatura den e fábrica di ocho piso na Brooklyn, New York, cu ta propiedad di Watchtower Bible and Tract Society of New York, Inc. A expandé esaki awor cu mas edificio di fábrica i un compleho di oficina. Tin edificionan adicional den cercania di Brooklyn pa acomodá e ministernan cu boluntariamente ta traha na e facilidadnan pa publicá literatura. Ademas di esaki, un combinacion di hacienda i imprenta ta funcioná na Wallkill, den e parti nort di New York. Aki nan ta percurá pa imprimí e revistanan E Toren di Vigilancia i Spierta! i ta producí un parti di e cuminda pa e ministernan cu ta sirbi na e diferente localidadnan. Cada trahadó boluntario ta haña un compensacion chikitu cada luna pa cubri su gastunan adicional.

CONGRESONAN INTERNACIONAL

Na 1893 a tene e promé congreso grandi na Chicago, Illinois, Merca. Na e congreso aki 360 hende a asistí, i 70 creyente nobo a bautisá. Na 1958 tabata e último bes cu nan a tene un solo congreso internacional grandi, i e tabata na New York City. Pa esaki, nan a usa tantu Yankee Stadium como Polo Grounds cu tabata existí n’e tempu ei. E asistencia máximo tabata di 253.922 persona; esnan nobo cu a bautisá tabata 7.136. Desde e tempu ei ta tene seri di congresonan internacional den hopi pais. Na tur, un seri asina por encerá mil congreso den paisnan rond mundu.

[Komentario na página 8]

Un contribucion sobresaliente na libertad civil

[Plachi na página 6]

“E Toren di Vigilancia,” for di 6.000 ehemplar na un solo idioma te mas cu 23.000.000 na mas cu 140 idioma

[Plachi na página 7]

Un aña den historia humano den cua un cambio significativo a tuma lugá

[Plachi di henter página 10]