Kapítulo Diesun

Sigui “Buska Promé e Reino”

1. (a) Dikon Hesus a urgi su oyentenan pa buska promé e Reino? (b) Kiko nos tin ku puntra nos mes?

MAS ku 1.900 aña pasá den un diskurso na Galilea, Hesus a urgi su oyentenan: “Ma buska promé e reino di Dios i Su hustisia.” Pero dikon esei tabata urgente? No tabata falta hopi siglo ainda pa Kristu risibí poder di Reino? Sí, pero e Reino Mesiániko tabata e medio ku Yehova lo a usa pa duna prueba di su derecho di goberná i pa kumpli ku su gran propósito p’e tera. Ken ku di bèrdat a komprendé e importansia di e kosnan ei lo a pone e Reino na promé lugá den su bida. Si esei tabata asina den promé siglo, kuantu mas awe ku Kristu ya ta entronisá komo Rei! P’esei e pregunta ta: Mi estilo di bida ta mustra ku mi ta buska promé e Reino di Dios?—Mateo 6:33.

2. Kiko hende en general ta kore tras di dje ku empeño?

² Awe, de echo tin miónes di hende rònt mundu ku ta buska promé e Reino. Nan ta demostrá nan apoyo n’e gobernashon dje Reino dor di dediká nan mes na Yehova i laga su boluntat bira e kos sentral den nan bida. Di otro banda, e gran mayoria di humanidat ta interesá den buska kosnan di mundu. Hende ta kore tras di plaka i tambe tras di e poseshon i plasernan ku bo por kumpra ku plaka. Òf nan ta hinka tur nan energia den un karera profeshonal. Nan estilo di bida ta demostrá ku loke ta interesá nan mas ta satisfakshon personal, kosnan material i plaser den bida. Nan ta pone Dios na segundo lugá, si akaso nan ta kere den dje mes.—Mateo 6:31, 32.

3. (a) Ki klase di tesoro Hesus a animá su disipelnan pa buska, i dikon? (b) Dikon nos no tin nodi ta demasiado preokupá tokante kosnan material?

³ Sin embargo, Hesus a konsehá su disipelnan: “No montoná tesoro pa boso mes riba tera,” ya ku ningun dje poseshonnan ei ta dura pa semper. Hesus di: “Ma montoná tesoro pa boso mes den shelu” dor di sirbi Yehova. El a urgi su siguidónan pa tene nan wowo “bon” [“simpel,” NW] dor di enfoká nan atenshon i energia riba hasimentu di Dios su boluntat. El a bisa nan: “Boso no por sirbi Dios i Rikesa.” Pero kiko di nan nesesidatnan material: kuminda, paña pa bisti i kas? Hesus a konsehá: “No preokupá boso mes.” I el a dirigí nan atenshon na e paranan: Dios ta alimentá nan. Hesus a animá su siguidónan pa siña un lès for dje flornan: Dios ta bisti nan. Akaso Yehova su sirbidónan humano inteligente no ta bal mas ku esakinan? P’esei Hesus a bisa: “Ma buska promé e reino di Dios i Su hustisia, i tur e kosnan [nesesario] aki lo wòrdu añadí na boso.” (Mateo 6:19-34) Bo akshonnan ta mustra ku bo ta kere esei?

No Laga Otro Kos Hoga e Bèrdat di Reino

4. Si un persona pone demasiado énfasis riba kosnan material, kiko por ta e resultado?

⁴ Ta na su lugá pa un persona preokupá pa e tin sufisiente pa satisfasé su nesesidatnan material i di su famia. Pero si un persona ta demasiado preokupá ku kosnan material, e resultado por ta desastroso. Maske kisas e ta bisa ku e ta kere den e Reino, si den su kurason e ta pone otro kos na promé lugá, e kosnan ei lo hoga e bèrdat di Reino. (Mateo 13:18-22) Por ehèmpel, na un okashon un hóben gobernante riku a puntra Hesus: “Kiko mi mester hasi pa heredá bida eterno?” E tabata hiba un bida di bon moral i a trata otro hende bon, pero su poseshonnan material tabata muchu pegá na su kurason. E no por a laga su poseshonnan material pa bira un siguidó di Kristu. Asina el a pèrdè e oportunidat di ta huntu ku Kristu den e Reino selestial. Hesus a bisa n’e okashon ei: “Ki difísil lo ta pa esnan ku ta riku drenta e reino di Dios!”—Marko 10:17-23.

5. (a) Pablo a animá Timoteo pa keda kontentu ku kiko, i dikon? (b) Kon Satanas ta usa “amor pa plaka” komo un trampa destruktivo?

⁵ Añanan despues, apòstel Pablo a skirbi Timoteo, kende e tempu ei tabata na Efeso, un sentro komersial próspero. Pablo a rekord’é: “Nos no a trese nada den mundu, i nos no por hiba nada for di dje tampoko. I si nos tin kuminda i paña pa bisti, ku esakinan nos mester ta kontentu.” Ta korekto pa un hende traha pa perkurá “kuminda i paña pa bisti” pa su mes i pa su famia. Pero Pablo a spièrta: “Esnan ku kier bira riku ta kai den tentashon i den trampa i den hopi deseonan loko i dañino, kuanan ta hundi hende den ruina i destrukshon.” Satanas ta mañoso. Na promé instante kisas e ta tenta un persona ku kosnan chikí. Kisas despues ta sigui preshon mas grandi, podisé e oportunidat pa haña promoshon na trabou òf un mihó empleo ku ta paga mas pero ku ta eksigí mas tempu, tempu ku ántes e persona tabata dediká na asuntunan spiritual. Si nos no vigilá, “amor pa plaka” por hoga e asuntunan hopi mas importante ku tin di haber ku e Reino. Pablo a ekspres’é asin’akí: “Algun hende, dor di deseá esaki, a desviá for di e fe, i a traspasá nan mes ku hopi doló.”—1 Timoteo 6:7-10.

6. (a) Kiko nos mester hasi pa evitá di kai den e trampa di materialismo? (b) Ki konfiansa nos por tin apesar di e situashon ekonómiko di mundu djawe?

⁶ Ku amor sinsero pa su ruman kristian, Pablo a urgi Timoteo: “Hui pa e kosnan aki” i: “Lucha e bon lucha di fe.” (1 Timoteo 6:11, 12) Nos mester hasi esfuerso sinsero si nos kier evitá pa e estilo di bida materialista dje mundu rònt di nos hiba nos bai kuné. Pero si nos hasi esfuerso vigoroso na armonia ku nos fe, Yehova nunka lo bandoná nos. Maske kon karu bida bira i kuantu desempleo reina, Yehova lo hasi sigur ku nos tin loke nos realmente mester. Pablo a skirbi: “Laga boso karakter ta liber di amor pa plaka i sea kontentu ku loke boso tin; pasobra [Dios] mes a bisa: ‘Nunka lo mi no bandoná bo, i nunka lo mi no laga bo desampará,’ asina ku nos ta bisa ku tur konfiansa: ‘SEÑOR ta mi yudadó, lo mi no tin miedu. Kiko hende por hasi mi?’” (Hebreonan 13:5, 6) I Rei David a skirbi: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.”—Salmo 37:25.

E Promé Disipelnan Ta Pone un Ehèmpel

7. Ki instrukshon tokante e predikashon Hesus a duna su disipelnan, i dikon esaki tabata apropiado?

⁷ Despues ku Hesus a duna su apòstelnan un entrenamentu apropiado, el a manda nan bai prediká e bon nobo den Israel i deklará: “E reino di shelu ta serka.” Ki un mensahe emoshonante esei tabata! Hesukristu, e Rei Mesiániko, tabata meimei di nan. Komo ku e apòstelnan tabata dediká nan mes na e sirbishi di Dios, Hesus a urgi nan pa konfia ku Dios lo perkurá pa nan. P’esei el a bisa: “No hiba nada pa na kaminda, ni garoti, ni saku, ni pan, ni plaka, ni ningun túnika èkstra. I den kualkier kas ku boso drenta, keda einan, i sigui biaha for di einan.” (Mateo 10:5-10; Lukas 9:1-6) Yehova lo a sòru pa otro israelita satisfasé nan nesesidatnan, ya ku pa e pueblo tabata normal pa mustra hospitalidat na hende straño.

8. (a) Dikon djis promé ku su morto, Hesus a duna e disipelnan instrukshon nobo pa prediká? (b) Kiko tòg mester a keda na promé lugá den bida dje siguidónan di Hesus?

⁸ Despues, djis promé ku su morto, Hesus a alertá su apòstelnan p’e echo ku den futuro nan lo a bai traha bou di otro sirkunstansia. Komo resultado di oposishon ofisial kontra nan aktividat, hende den Israel kisas lo no a mustra hospitalidat na nan dje fásil ei. Tambe, denter di poko nan lo a hiba e mensahe di Reino na paisnan ku no ta hudiu. P’esei awor nan mester a bai ku “un pòtmòni” i “un saku di kuminda.” Pero tòg, nan mester a sigui buska promé Yehova su Reino i su hustisia, ku e konfiansa ku Dios lo a bendishoná nan esfuersonan pa haña e kuminda i paña nesesario.—Lukas 22:35-37, NW.

9. Kon Pablo a pone e Reino na promé lugá den su bida i a la bes perkurá pa su nesesidatnan físiko? I ki konseho el a duna riba e asuntu aki?

⁹ Apòstel Pablo ta un bon ehèmpel di un persona ku a apliká e konseho di Hesus. Pablo a hasi e predikashon dje palabra e kos prinsipal den su bida. (Echonan 20:24, 25) Ora el a bai un área pa prediká, e tabata perkurá pa su propio nesesidatnan material, i asta a traha tènt pa mantené su mes. E no a ferwagt ku ta otro hende tabatin ku kuid’é. (Echonan 18:1-4; 1 Tesalonisensenan 2:9) Sin embargo, ora otro hende a ekspresá nan amor na dje dor di mustr’é hospitalidat i dun’é regalo, el a aseptá esei ku apresio. (Echonan 16:15, 34; Filipensenan 4:15-17) Pablo no a animá kristiannan pa neglishá nan obligashon familiar pa nan por prediká, sino mas bien pa nan balansá e vários responsabilidatnan ku nan tabatin. El a konsehá nan pa traha, stima nan famia i kompartí kos ku otro hende. (Efesionan 4:28; 2 Tesalonisensenan 3:7-12) El a urgi nan pa konfia den Dios, no den poseshon material, i pa usa nan bida den un manera ku a demostrá ku di bèrdat nan a komprendé kiko ta e kosnan mas importante. Na armonia ku e siñansa di Hesus, esei tabata kier men buská promé e Reino di Dios i su hustisia.—Filipensenan 1:9-11.

Tene e Reino na Promé Lugá den Bo Bida

10. Kiko kier men buska promé e Reino?

¹⁰ Te na ki grado nos ta hasi esfuerso personalmente pa kompartí e bon notisia dje Reino ku otro hende? Pa un parti, esei ta dependé di nos sirkunstansia i dje profundidat di nos apresio. Kòrda ku Hesus no a bisa: ‘Buska e Reino ora bo no tin nada otro di hasi.’ Konosiendo e importansia dje Reino, el a ekspresá e boluntat di su Tata, bisando: “Buska su reino kontinuamente.” (Lukas 12:31, NW) Ounke mayoria di nos tin ku traha pa satisfasé nos nesesidatnan i di nos famia, si nos tin fe, e trabou di Reino ku Dios a duna nos pa hasi lo ta e kos mas importante den nos bida. Na mesun tempu, nos lo atendé nos responsabilidatnan di famia.—1 Timoteo 5:8.

11. (a) Kon Hesus a ilustrá ku no ta tur hende lo por hasi mes tantu pa plama e mensahe di Reino? (b) Kiko ta e kosnan ku ta determiná kuantu un hende por hasi?

¹¹ Algun di nos por dediká mas tempu ku otro na prediká e bon notisia dje Reino. Pero den su komparashon tokante vários tipo di tera, Hesus a mustra ku tur hende ku tin un kurason manera bon tera, lo produsí fruta. Te na ki grado nan ta produsí fruta? E sirkunstansianan individual ta varia. Edat, salú i responsabilidat di famia ta hunga un ròl. Pero ora hende di bèrdat ta apresiá e bon notisia di e Reino, nan por logra hopi.—Mateo 13:23.

12. Ki meta spiritual saludabel ta bon pa hóbennan pensa ariba?

¹² Ta bon pa nos tin meta ku lo yuda nos ekspandé nos partisipashon den e sirbishi di Reino. Hóbennan mester pensa seriamente riba e ekselente ehèmpel dje hóben kristian seloso Timoteo. (Filipensenan 2:19-22) Kiko lo por ta mas mihó pa nan ku drenta den e sirbishi di tempu kompleto ora nan kaba skol? Hende grandi tambe lo benefisiá si nan pone metanan spiritual saludabel.

13. (a) Ken ta disidí kiko nos kada un por hasi den sirbishi di Reino? (b) Si di bèrdat nos ta buska promé e Reino, esei ta prueba di kiko?

¹³ En bes di kritiká hende ku tal bes nos ta haña lo por hasi mas, nos fe mester impulsá nos pa traha pa mehorá nos propio sirbishi ya asina nos por sirbi Dios te kaminda nos sirkunstansia ta pèrmití. (Romanonan 14:10-12; Galationan 6:4, 5) Manera a keda demostrá den e kaso di Job, Satanas ta argumentá ku loke mas ta interesá nos ta nos poseshonnan material, nos propio komodidat i nos bienestar personal, i ku nos ta sirbi Dios pa motibu egoista. Pero si di bèrdat nos ta buskando promé e Reino, nos ta yuda komprobá ku realmente Diabel ta un gran mentiroso. Asina nos ta duna prueba ku loke ta bini na promé lugá den nos bida ta nos sirbishi na Dios. Ku echo i palabra, nos ta duna prueba di nos amor profundo pa Yehova, nos apoyo leal na su derecho di goberná i nos amor pa próhimo.—Job 1:9-11; 2:4, 5; Proverbionan 27:11.

14. (a) Dikon ta bon pa nos tin un programa pa sirbishi di fèlt? (b) Te na ki grado hopi Testigu ta partisipá den sirbishi di fèlt?

¹⁴ Un programa por yuda nos logra mas tantu. Yehova mes tin “un tempu fiho” pa kumpli ku su propósito. (Éksodo 9:5; Marko 1:15) Si ta posibel, ta bon pa tur siman nos tin un òf mas dia fiho pa sali den sirbishi di fèlt. Sientos di míles di Testigu di Yehova rònt mundu a yega di inskribí komo pionero ousiliar, dedikando alrededor di dos ora pa dia na prediká e bon nobo. Sientos di míles di otronan ta sirbi komo pionero regular, usando mas o ménos dos ora i mei pa dia pa proklamá e mensahe di Reino. Pionero spesial i misioneronan ta pasa asta mas ora den sirbishi di Reino. Tambe nos por buska oportunidat pa kompartí e speransa di Reino informalmente ku ken ku kier skucha. (Huan 4:7-15) Nos deseo mester ta pa partisipá plenamente den e trabou ei te kaminda nos sirkunstansia ta pèrmití, pasobra Hesus a profetisá: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:14; Efesionan 5:15-17.

15. En konekshon ku nos proklamashon dje palabra, dikon bo ta haña ku e konseho na 1 Korintionan 15:58 ta oportuno?

¹⁵ Unidamente, Testigunan di Yehova den tur parti di mundu, sin importá den kua nashon nan ta biba, ta partisipá den e privilegio di sirbishi aki. Nan ta apliká na nan mes e konseho bíbliko inspirá: “Sea firme, konstante, semper abundando den e trabou di Señor, sabiendo ku boso trabou no ta enbano den Señor.”—1 Korintionan 15:58.

Komo Repaso

• Ora Hesus a bisa pa sigui “buska promé e reino,” kiko e tabata indiká ku mester bai na di dos lugá?

• Ki punto di bista nos mester tin tokante perkurá pa nos nesesidatnan físiko i di nos famia? Kon Dios lo yuda nos?

• Den ki rasgonan di sirbishi di Reino nos por partisipá?

[Plachi na página 107]

Den tur pais, Testigunan di Yehova djawe ta prediká e bon nobo, promé ku e fin bini