Dor di Presta Atenshon Nan A Skapa Nan Bida

HESUKRISTU a duna spièrtamentu di antemano tokante fin di e sistema di kosnan hudiu ku tabatin su sentro na e tèmpel di Yerusalèm. E no a duna e fecha ku esei lo tuma lugá. Pero loke sí el a deskribí ta susesonan ku lo a hiba na e destrukshon ei. El a urgi su disipelnan pa keda vigilá i pa nan sali for di e zona di peliger.

Hesus a profetisá: “Ora boso mira Yerusalèm rondoná dor di ehérsitonan, rekonosé anto ku su desolashon ta serka.” Tambe Hesus a bisa: “Ora boso mira e abominashon di desolashon . . . ta para den e lugá santu . . . , e ora ei laga esnan ku ta na Judea hui bai na e serunan.” Hesus a urgi su disipelnan pa nan no bai bèk pa skapa nan poseshonnan material. Tabata urgente pa nan hui si nan kier a salba nan bida.—Lukas 21:20, 21; Mateo 24:15, 16.

Na aña 66 di nos era Sesto Galo a bini ku e ehérsito romano kontra Yerusalèm afin di dominá e rebelion ku ya a dura largu. El a drenta e stat i a sitia e tèmpel. A surgi un káos total den e stat. Hende ku a keda alerta por a mira ku desaster tabata den porta. Pero kon nan por a hui? Inesperadamente, Sesto Galo a retirá su tropanan. E rebeldenan hudiu a persiguí nan. Awor tabata e tempu pa hui for di Yerusalèm i for di henter e área di Judea!

E siguiente aña, e tropanan romano a regresá bou di Vespasiano i su yu Tito. Guera a asotá henter e pais. Na prinsipio di aña 70, e romanonan a konstruí rònt di Yerusalèm un baluarte òf fortifikashon trahá di staka ku punta skèrpi. No tabata posibel mas pa hui. (Lukas 19:43, 44) Partidonan den e stat a kuminsá mata otro. E restu di e pueblo sea a ser matá dor di e romanonan òf hibá prezu. Nan a destruí e stat i su tèmpel kompletamente. Segun Hosefo, un historiadó hudiu di promé siglo, mas ku un mion hudiu a sufri i muri. Nunka mas nan a rekonstruí e tèmpel ei.

Si e kristiannan lo tabata den Yerusalèm ainda na aña 70, nan tambe lo a ser matá òf hibá komo katibu huntu ku tur otro hende. Sin embargo, historiadónan di antigwedat ta informá ku e kristiannan a hasi kaso di spièrtamentu divino i a hui tantu for di Yerusalèm komo for di henter e área di Judea i a bai na e serunan ost di Riu Hordan. Algun di nan a establesé nan mes na Pela, den e provinsia di Perea. Nan a bandoná Judea i no a bolbe bèk. Nan a salba nan bida dor di presta atenshon na e spièrtamentu di Hesus.

Abo Ta Tuma na Serio Spièrtamentunan for di Fuentenan Konfiabel?

Despues di a tende di vários spièrtamentu ku no a kristalisá, hopi hende ta trata tur spièrtamentu komo di ménos importansia. Sin embargo, bo por salba bo bida dor di hasi kaso di spièrtamentu.

Na 1975, ekspertonan na China a spièrta ku lo bin un temblor. Outoridatnan a tuma akshon. E hendenan a reakshoná faborabel. Esei a skapa míles di bida.

Na aprel 1991 na Filipina, hende ku tabata biba na barika di Seru Pinatubo a informá ku stom i shinishi tabata spùit sali for di e seru. Despues di a opservá e situashon pa dos luna, e Instituto Filipino di Volkan i Temblor a spièrta di e peliger ku tabata inminente. Mesora, rònt di 35.000 hende a keda evakuá for di e área. Mainta trempan dia 15 di yüni, ku un enorme eksploshon, mas ku ocho kilometer kúbiko di baranka garná a ser mandá laira i despues a baha riba e área. Míles di hende a skapa nan bida dor ku nan a presta atenshon.

Beibel ta spièrta tokante fin di e aktual sistema di kosnan. Nos ta biba awor den e último dianan. Abo ta keda vigilá segun ku e fin ta aserká? Bo ta tumando akshon pa asina bo keda pafó di e zona di peliger? Bo ta spièrtando otro hende ku urgensia pa nan tambe hasi meskos?

[Plachi na página 20]

Ora ku Seru Pinatubo a saka shinishi volkániko, hopi hende a skapa nan bida dor ku nan a presta atenshon na spièrtamentu

[Plachi na página 21]

E bida di e kristiannan ku a hasi kaso di e spièrtamentu di Hesus, a keda di spar ora ku Yerusalèm a ser destruí na aña 70