Pronto Tur Sufrimentu Lo Kaba!

Na dado momentu den bo bida probablemente bo a puntra: ‘Dikon tin asina tantu sufrimentu?’ Pa míles di aña humanidat a sufri masha hopi mes dor di guera, pobresa, desaster, krímen, inhustisia, malesa i morto. E último shen añanan hende a sufri mas ku nunka promé. Tur e sufrimentu aki lo kaba un dia?

E kontesta konsoladó ta ku sí, anto pronto! E Palabra di Dios, e Beibel, ta proklamá: “E malbado lo no t’ei mas . . . Ma e humildenan lo heredá e tera, i lo deleitá nan mes den pas abundante.” Pa kuantu tempu? “E hustunan lo heredá e tera, i lo biba den dje pa semper.”—Salmo 37:10, 11, 29.

Despues ku Dios eliminá maldat i sufrimentu, e tera lo keda transformá den un paradeis. E ora ei hende lo por biba pa semper den salú perfekto i felisidat. E Palabra di Dios ta predisí: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.”—Revelashon 21:4.

Den e mundu nobo ei, asta e mortonan lo ser resusitá pa nan por disfrutá di e bendishonnan aki: “Lo tin un resurekshon di tantu e hustunan komo e malbadonan.” (Echonan 24:15) Ta p’esei Hesukristu por a bisa un malechor arepentí ku a ekspresá fe den dje: “Lo bo ta serka mi den Paraiso.”—Lukas 23:43.

Dikon Tin Sufrimentu?

Siendo ku Dios su propósito tabata pa hende tin un futuro asina maravioso, dikon el a permití pa tin sufrimentu? Dikon el a lag’é dura pa asina tantu tempu?

Ora Dios a krea Adam ku Eva, El a traha nan ku kurpa i mente perfekto. El a pone nan den un hòfi manera un paradeis i a duna nan trabou masha agradabel pa hasi. Beibel ta deklará: “Dios a mira tur loke el a traha, i ata, tur kos tabata masha bon.” (Génesis 1:31) Si nan lo a obedesé Dios, nan lo a haña yunan perfekto, i tera lo a bira un paradeis mundial, kaminda hende lo a biba pa semper den pas i felisidat.

Dios a duna Adam ku Eva e maravioso don di boluntat liber komo parti di e naturalesa humano. Nan lo no mester tabata manera robòt ku no por pensa. Sin embargo, nan futuro felisidat a dependé di si nan a usa nan boluntat liber den e manera korekto: pa obedesé e leinan di Dios. Manera Dios ta bisa: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana.” (Isaias 48:17) Mal uso di boluntat liber lo a resultá den desaster, ya ku hende no a ser kreá pa nan tin éksito independiente di Dios. Beibel ta bisa: “E kaminda di hende no ta di dje mes; tampoko no ta keda na hende pa dirigí su pasonan.”—Jeremias 10:23.

Lamentablemente, nos promé mayornan a sinti ku nan lo por ta independiente di Dios i tòg tin éksito. Pero ora ku nan a rechasá Dios su gobernashon, nan a pèrdè Dios su sosten i pues, nan kondishon perfekto. Di manera ku nan a kuminsá degenerá, te ora ku finalmente nan a bira bieu i a muri. Komo ku nos ta nan yunan, nos a heredá e imperfekshon i morto ei.—Romanonan 5:12.

E Kuestion Prinsipal: Ken Tin e Derecho di Goberná?

Pakiko Dios no a destruí Adam ku Eva i kuminsá di nobo ku un otro pareha humano? Pasobra Dios su soberania universal, es desir, su derecho di goberná, a ser kuestioná. E pregunta tabata: Ken tin e derecho di goberná, i ken su gobernashon ta korekto? I en bista di esei un otro pregunta ku a lanta tabata: Lo a bai mas mihó ku hende si Dios no a goberná nan? Dor di permití hende sufisiente tempu pa eksperimentá ku libertat total, Dios lo a establesé unabes pa semper si lo a bai mas mihó ku hende bou di su gobernashon òf ora nan ta goberná nan mes. E tempu ku el a permití lo mester tabata sufisiente largu pa hende purba tur tipo di sistema polítiko, sosial, ekonómiko i religioso separá for di Dios su guia.

Kiko tabata e resultado? Míles di aña di historia humano a duna prueba ku sufrimentu a oumentá mas i mas. Den e último shen añanan ku a pasa, humanidat a eksperensiá e pió sufrimentu ku nunka. Miónes di hende a ser asesiná durante Segundo Guera Mundial. Mas ku 100 mion hende a ser masakrá den guera. Krímen i violensia ta tur kaminda. Uso di droga ta un epidemia mundial. Malesanan transmití seksualmente ta sigui afektá mas i mas persona. Miónes di hende ta muri tur aña di hamber i malesa. Bida di famia i normanan moral a bai atras tur kaminda. Ningun gobièrnu humano tin solushon pa e problemanan aki. Ni un di nan a eliminá behes, malesa i morto.

E situashon di humanidat ta presis manera Beibel a predisí pa nos tempu. E Palabra di Dios ta identifiká nos era komo “e último dianan” di e mundu malbado aki ora ku lo bin “tempunan trabahoso.” I manera Beibel a bisa, ‘hendenan malbado i gañadónan a bai di malu pa peor.’—2 Timoteo 3:1-5, 13.

Fin di Sufrimentu Ta Serka

Tur evidensia ta mustra ku nos ta aserkando e fin di hende su eksperimentu lamentabel di goberná nan mes independiente di Dios. A keda demostrá bon kla ku gobernashon humano independiente di Dios nunka por tin éksito. Ta Dios su gobernashon so por trese pas, felisidat, salú perfekto i bida eterno. Pues anto, djis akí lo yega e dia ku Yehova lo no tolerá maldat i sufrimentu mas. Pronto Dios lo intervení den asuntunan humano dor di destruí henter e sistema di kosnan insatisfaktorio aki.

Profesia bíbliko ta bisa: “Den e dianan di e reinan ei [e gobièrnunan humano ku ta eksistí awe] e Dios di shelu lo lanta un reino [den shelu] ku nunka lo no wòrdu destruí; . . . e lo garna i pone un fin na tur e reinonan aki [e gobièrnunan aktual], ma e mes lo dura pa semper.” (Daniel 2:44) Vindikashon di Yehova su soberania, esta di su derecho di goberná, mediante su Reino selestial ta e siñansa prinsipal di Beibel. Hesus a profetisá un aspekto importante di e señal di “e último dianan” ora el a bisa: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:14.

Ora e fin yega, ken lo sobrebibí? Beibel ta kontestá: “E rektonan lo biba den e tera, i e perfektonan [òf, esnan sin kulpa] lo keda den dje; ma e malbadonan lo wòrdu kòrtá kitá for di tera.” (Proverbionan 2:21, 22) E rektonan ta hende ku ta siña Yehova su boluntat i ta kumpli kuné. Hesukristu a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, “mundu ta pasa bai . . . ma esun ku hasi e boluntat di Dios ta permanesé pa semper.”—1 Juan 2:17.

A ménos ku tin otro indikashon, teksto di Beibel sitá den e tratado aki ta for di Beibel Santu.