Frakshon di Sanger i Prosedura Durante Operashon

Frakshon di sanger. Dòkternan ta saka esakinan for di e kuater komponentenan prinsipal di sanger: sèl kòrá (glóbulo kòrá), sèl blanku (glóbulo blanku), plaketa i plasma. Por ehèmpel, for di sèl kòrá nan ta saka un frakshon di proteina ku yama hemoglobina. Ku e hemoglobina ei, sea di hende òf di bestia, nan ta traha produkto pa trata pashènt ku tin anemia agudo òf ku a pèrdè hopi sanger.

Plasma ta konsistí pa 90% di awa i ta kontené kantidat di hormona, salu inorgániko, enzima i otro materia nutritivo manera mineral i suku. For di plasma nan ta saka frakshonnan ku ta pone sanger kuaha, antikurpa ku ta bringa kontra malesa i proteina manera albúmina. Ora un hende keda eksponé na un sierto malesa, dòkternan sa preskribí inyekshon di gama globulina, un frakshon ku nan ta ekstraé for di plasma di hende ku ta imün kaba. Anto for di sèl blanku nan ta saka frakshon di sanger manera interferon i interleukina, ku kua nan ta trata sierto tipo di kanser i infekshon di vírùs.

Kristiannan por aseptá tratamentu ku ta usa frakshon di sanger? Beibel no ta duna ningun instrukshon spesífiko. Pues, ta keda na kada ken pa tuma su propio desishon dilanti di Dios di akuerdo ku su konsenshi. Tin kristian ta nenga tur frakshon di sanger, ya ku nan ta rasoná ku segun e Lei ku Dios a duna Israel, hende mester a basha “riba suela” e sanger di bestia ku nan a mata. (Deuteronomio 12:22-24) Pero otro kristiannan ku tambe ta nenga transfushon di sanger kompleto òf di su komponentenan prinsipal kisas ta aseptá sí un tratamentu ku ta usa sierto frakshon di sanger. Nan ta rasoná ku dado momento bo no por bisa mas ku e frakshon ku nan a saka for di e sanger ta representá e bida di e kriatura for di kua a sak’é.

Promé ku bo tuma un desishon tokante frakshon di sanger, ta bon pa bo puntra bo mes: Mi ta realisá ku si mi rechasá tur frakshon di sanger, esei ke men ku mi ta nenga tambe sierto remedi ku ta kontené produkto derivá di sanger ku nan ta usa pa kombatí malesa òf pa para sangramentu? Lo mi por splika un dòkter dikon mi ta rechasá òf dikon mi ta aseptá e uso di un òf mas frakshon di sanger?

Prosedura durante operashon. Esakinan ta inkluí hemodilushon (hasimentu di sanger delegá) i rekuperashon di sèl. Hemodilushon ta e proseso di desviá e sanger for di e kurpa, remplas’é ku un supstansia ku ta oumentá e volúmen di sanger i despues hinka e sanger bèk den kurpa di e pashènt. E proseso di rekuperashon di sèl ta tuma lugá durante un operashon. Dòkternan ta rekohé e sanger ku e pashènt a pèrdè for di e herida òf sanger ku a plama den su kurpa i ta purifik’é òf filtr’é; kaba nan ta debolbé e sanger ei na e pashènt. Komo ku kada dòkter por usa un otro método pa apliká e téknikanan akí, un kristian mester puntra su dòkter kiko é tin pensá di hasi.

Na momento di tuma un desishon tokante e proseduranan akí, puntra bo mes: ‘Si nan desviá parti di mi sanger for di mi kurpa i e sirkulashon di sanger keda interumpí pa un ratu, mi konsenshi eduká pa Beibel lo laga mi mira e sanger akí ainda komo un parti di mi, i ku p’esei lo no ta nesesario pa “bash’é riba suela”? (Deuteronomio 12:23, 24) Mi konsenshi lo keda trankil si durante un prosedura médiko nan saka un parti di mi sanger, modifik’é i despues hink’é bèk den mi kurpa? Mi ta realisá ku si mi rechasá tur prosedura médiko ku ta usa mi propio sanger, esei ke men ku mi ta nenga di hasi tèst di sanger, di dialisá (spula nir) òf di usa e mashin (di kurason-pulmon) ku ta mantené e sirkulashon di sanger pafó di e kurpa?’

Kada kristian mes mester disidí kiko e ta permití dòkternan hasi ku su sanger durante un operashon. Esei ta konta tambe pa tèst médiko i tratamentu ku ta enserá saka un tiki di bo mes sanger, kisas modifik’é, i despues inyekt’é bèk den bo kurpa.