Kon Prinsipionan di Beibel Ta Benefisiá Nos?

1. Dikon nos tin mester di guia?

Nos Kreador ta hopi mas sabí ku nos. Komo un Tata amoroso, e ta interesá den nos. No tabata su intenshon pa nos biba sin su guia. (Yeremías 10:23) Pues, meskos ku un mucha chikitu tin mester di e guia di su mayornan, nos tur mester di e guia di Dios. (Isaías 48:17, 18) El a duna nos esaki den forma di prinsipionan ku nos por haña den Su Palabra.—Lesa 2 Timoteo 3:16.

E lei- i prinsipionan di Yehova ta siña nos e mihó manera di biba awor i ta mustra nos kon nos por haña bendishon eterno den futuro. Ya ku ta Dios a krea nos, ta na su lugá pa nos obedes’é di kurason.—Lesa Salmo 19:7, 11; Revelashon 4:11.

2. Kiko ta un prinsipio di Beibel?

Un prinsipio di Beibel ta un bèrdat fundamental. Di otro banda, un lei ta diseñá pa un situashon spesífiko. (Deuteronomio 22:8) Nos tin ku usa nos kapasidat di pensa pa komprondé kon un prinsipio ta yuda nos den sierto situashon. (Proverbionan 2:10-12) Por ehèmpel, Beibel ta siña nos ku bida ta un regalo di Dios. E prinsipio fundamental akí por sirbi komo guia pa nos ora nos ta na trabou, na kas i ora nos ta move di un lugá pa otro. Tambe e ta yuda nos tuma medida di prekoushon pa evitá di pone nos bida i bida di otro hende na peliger.—Lesa Echonan 17:28.

3. Kua ta e dos prinsipionan di mas importante?

Hesus a papia di dos prinsipio ku ta masha importante. E promé tin di haber ku Dios su propósito pa hende; e ke pa nos siña konos’é, stim’é i sirbié fielmente. Nos mester tene kuenta ku e prinsipio akí den tur desishon ku nos ta tuma. (Proverbionan 3:6) Hende ku ta biba na armonia ku e prinsipio akí lo tin un bon relashon ku Dios, lo haña berdadero felisidat i bida eterno.—Lesa Mateo 22:36-38.

E di dos prinsipio por guia nos pa biba na pas ku otro hende. (1 Korintionan 13:4-7) Ora nos apliká e prinsipio akí, nos ta imitando Dios su manera di trata hende.—Lesa Mateo 7:12; 22:39, 40.

4. Kon prinsipionan di Beibel ta benefisiá nos?

Prinsipionan di Beibel ta siña miembronan di famia stima otro i biba uní ku otro. (Kolosensenan 3:12-14) Ademas, e Palabra di Dios ta mustra ku matrimonio mester ta un union permanente, loke ta un protekshon pa e famia.—Lesa Génesis 2:24.

Siñansanan di Beibel por benefisiá nos den sentido material i yuda nos hiba un bida mas trankil. Por ehèmpel, hopi biaha un doño di trabou ta preferá trahadó ku ta biba na armonia ku prinsipionan di Beibel. Por lo general, e personanan akí ta onesto i diligente. (Proverbionan 10:4, 26; Hebreonan 13:18) E Palabra di Dios ta siña nos tambe ku nos tin ku keda satisfecho ku loke nos tin i ku nos amistat ku Dios ta bal muchu mas ku kos material.—Lesa Mateo 6:24, 25, 33; 1 Timoteo 6:8-10.

Hende ku ta pega na prinsipionan di Beibel ta hiba un bida mas saludabel. (Proverbionan 14:30; 22:24, 25) Por ehèmpel, Beibel ta prohibí buracheria, i hende ku ta evitá esei ta protehá nan mes kontra malesa mortal i lo no kousa aksidente fatal fásilmente. (Proverbionan 23:20) Yehova ta permití nos bebe bibida alkohóliko, pero ku moderashon. (Salmo 104:15; 1 Korintionan 6:10) Ademas, prinsipionan divino ta benefisiá nos pasobra nan ta siña nos kontrolá no solamente nos akshonnan sino tambe nos manera di pensa. (Salmo 119:97-100) Pero kristiannan berdadero ta respetá Dios su normanan, no djis pa nan propio benefisio, sino pa onra Yehova.—Lesa Mateo 5:14-16.