LÈS 4
Un Yu Ku A Hasi Su Tata i Yehova Kontentu
Kiko Yefta ta primintí Yehova aki?
No tabata fásil, pero e yu di Yefta a hasi e kos ku su tata a primintí
Bo ta wak e mucha muhé riba e plachi?— Su tata yama Yefta. Beibel no ta bisa kon e mucha muhé mes yama, pero nos sa sí ku el a hasi su tata i Yehova kontentu. Ban siña di dje i di su tata, Yefta.
Yefta tabata un bon hende. Tur ora e tabata konta su yu muhé tokante Yehova. Yefta tabatin hopi forsa tambe, i e tabata un bon lider. P’esei e hendenan di Israel a pidié pa e ta nan lider ora di bringa kontra nan enemigunan.
Yefta a hasi orashon i pidi Dios yud’é gana e guera. Yefta a primintí Yehova ku si e gana, e ta duna Yehova e promé hende ku sali bini pafó ora e yega kas bèk. E ora ei, e hende ei mester a bai traha na e tabernakel di Dios i keda biba henter su bida ei. E tabernakel tabata e lugá kaminda hende tabata bai adorá Dios e tempu ei. Wèl, Yefta a gana e guera! Awor, ora el a yega kas, bo sa ken ta e promé hende ku a sali bini pafó?—
Sí, Yefta su yu muhé! E tabata su úniko yu, anto awor, Yefta mester a mand’é bai biba na e tabernakel. Yefta a bira hopi tristu. Pero el a primintí Dios kaba. Mesora, su yu muhé a bis’é: ‘Si Tata a primintí Yehova, Tata tin ku hasié.’
E amiganan di e yu di Yefta tabata bai bishit’é tur aña
E yu muhé di Yefta tambe a bira tristu. Si e bai biba na e tabernakel, lo e no por kasa ni haña yu. Pero e tabatin masha gana di hasi loke su tata a primintí. Anto e kier a hasi Yehova kontentu. Esei tabata mas importante p’e ku kasa i haña yu. P’esei, el a sali for di su kas i bai biba henter su bida na e tabernakel.
Abo ta kere ku esei a hasi su tata i Yehova kontentu?— Konpolaga! Si abo ta stima Yehova i ta obediente meskos ku e yu di Yefta, abo tambe lo hasi bo tata, bo mama i Yehova hopi kontentu.