Yosías Tabatin Bon Amigu

Abo ta haña ku ta difísil pa hasi loke Dios ta bisa?— Mayoria di hende ta haña ku sí. Beibel ta konta nos di un mucha hòmber ku yama Yosías. Tabata hopi difísil mes pa Yosías hasi loke Dios ta bisa. Pero e tabatin bon amigu, anto nan a yud’é. Ban lesa mas di Yosías i su amigunan.

Yosías tabata yu di Amon, un rei na Huda. Amon tabata masha mal hende. E tabata adorá dios falsu tambe. Ora Amon a muri, Yosías a bira rei. Pero ta ocho aña so e tabatin! Bo ta kere ku el a bira mal hende meskos ku su tata?— Nò!

For di tempu ku Yosías tabata mucha chikitu, e kier a hasi loke Yehova ta bisa. P’esei, ta hende ku stima Yehova so el a skohe komo amigu. Anto nan a yuda Yosías hasi loke Dios ta bisa. Ken tabata algun di Yosías su amigunan?

Un di nan ta Sofonías. Sofonías ta un profeta ku a bisa e hendenan di Huda ku si nan adorá dios falsu kos malu lo pasa ku nan. Yosías a skucha di Sofonías i a adorá Yehova so i no dios falsu.

Un otro amigu ku Yosías tabatin ta Yeremías. Nan tabatin kasi e mesun edat. Anto tempu ku nan tabata mucha, nan tabata biba basta serka di otro. Nan tabata asina bon amigu ku, ora Yosías a muri, Yeremías a traha un kantika spesial pa bisa kuantu el a sinti Yosías su falta. Yeremías i Yosías a yuda otro hasi loke Yehova ta bisa.

Kiko e ehèmpel di Yosías ta siña bo?— For di dia ku Yosías tabata chikitu, e kier a hasi loke Yehova ta bisa. E tabata sa ku su amigunan mester ta hende ku ta stima Yehova. Ta hopi importante pa abo tambe skohe amigu ku ta stima Yehova i ku por yuda bo hasi loke e ta bisa!