Yeremías No A Stòp di Papia Tokante Yehova

Tin bes, hende ta hari nos òf rabia ku nos ora nos papia ku nan di Yehova. E kos ei por pone ku nos no ta haña gana di papia mas tokante Dios. Abo a yega di sinti asina?— Beibel ta konta nos di un mucha hòmber ku a stima Yehova, pero ku a hera di stòp di papia tokante dje. Su nòmber ta Yeremías. Ban haña sa mas di dje.

Tempu ku Yeremías tabata un mucha hòmber yòn, Yehova a mand’é bisa e hendenan stòp di hasi malu. E kos ei tabata algu hopi difísil pa Yeremías, i e tabatin miedu. El a bisa Yehova: ‘Mi no sa kiko pa bisa. Ta mucha mi ta.’ Ma Yehova a bis’é: ‘No tene miedu. Ami ta bai yuda bo.’

Asina ta ku Yeremías a kuminsá bisa e hendenan ku si nan no kambia, Dios ta bai kastigá nan. Bo ta kere ku e hendenan a hasi loke Yeremías a bisa nan?— Nò. Nan a harié den su kara i a rabia masha tantu mes kuné. Tin di nan ku asta kier a mat’é! Kon bo ta kere ku Yeremías a sinti?— E tabatin miedu, i el a bisa: ‘Mi no ta bai papia mas tokante Yehova.’ Pero el a stòp bèrdat?— Nò, e no a stòp. E tabata stima Yehova asina tantu ku e no por a stòp di papia tokante dje. Anto ya ku Yeremías no a stòp, Yehova a sòru pa nada no pas’é.

Por ehèmpel, un biaha un par di mal hende a tira Yeremías den un buraku masha hundu mes, yen di lodo. E no tabatin kuminda ni awa. E mal hendenan ei kier a laga Yeremías ei den te ora e muri. Pero ku Yehova su yudansa, el a skapa sí!

Kiko Yeremías su ehèmpel ta siña bo?— Maske tin biaha el a sinti miedu, e no a stòp di papia tokante Yehova sí. Ora bo ta papia tokante Yehova, podisé hende lo hari bo òf rabia ku bo. I por ta lo bo sinti bèrgwensa i asta miedu. Pero nunka no stòp di papia tokante Yehova. E ta bai yuda bo semper, meskos ku el a yuda Yeremías.