Edukashon di Reino​—Sirbidónan di e Rei Ta Haña Entrenamentu

BO TA smail ku e oradó riba plataforma pa anim’é. E ta un ruman hòmber yòn di bo kongregashon i ta su promé parti na un asamblea. Segun ku bo ta disfrutá di su diskurso, bo ta pensa ku apresio riba e entrenamentu ku e pueblo di Dios ta haña. Bo ta kòrda e promé partinan ku e yònkuman akí a duna riba plataforma. Anto wak kon el a progresá! Gran parti di e progreso ei a tuma lugá despues ku el a asistí na e Skol di Sirbishi di Pionero. Resientemente, e ku su kasá a asistí na e Skol pa Predikadó di Reino. Segun ku bo ta bati man pa e bunita diskurso ku e ruman a duna, bo ta wak rònt i pensa riba e kantidat di instrukshon ku henter e pueblo di Dios ta haña.

Beibel a profetisá ku lo yega un tempu ku ‘Yehova lo siña’ henter su pueblo. (Isa. 54:13) Nos ta bibando den e tempu ei. Nos ta haña e edukashon akí no solamente via nos publikashonnan sino tambe via nos reunionnan, asambleanan, kongresonan i e vários skolnan ku ta prepará nos pa un òf mas asignashon den e organisashon di Yehova. Den e sekshon akí, nos lo konsiderá kon tur e edukashon akí ta duna prueba sólido ku e Reino di Dios ta gobernando awe.