Kon pa Solushoná Problema

Den bida matrimonial, semper por surgi problema. Esakinan por surgi debí ku boso kada un su manera di pensa, di sinti òf di mira bida ta diferente. Tin faktor pafó di e matrimonio i kos imprevisto ku tambe por kousa problema.

Tin biaha nos ke sera wowo pa realidat, pero Beibel ta konsehá nos pa enfrentá nos problemanan. (Mateo 5:23, 24) I e mihó manera pa solushoná boso problemanan ta aplikando prinsipionan di Beibel.

1 PAPIA TOKANTE E PROBLEMA

LOKE BEIBEL TA BISA: “Tin . . . un tempu pa papia.” (Eklesiástes 3:1, 7) Pues, si boso tin un problema, hasi sigur ku boso ta tuma tempu pa papia tokante dje. Sea franko ku bo kasá i lag’é sa kon bo ta sinti i kon bo ta mira e asuntu. Semper “papia bèrdat” ku otro. (Efesionan 4:25) Asta si boso ta hopi rabiá, buska tur manera pa boso no kuminsá pleita. Un kontesta suave por evitá ku un simpel diferensia di opinion ta para bira un guera.—Proverbionan 15:4; 26:20.

Asta si boso no logra yega na un akuerdo, keda papia nèchi ku otro i nunka lubidá di mustra amor i rèspèt pa otro. (Kolosensenan 4:6) Trata di resolvé e problema mas lihé posibel i no stòp di komuniká ku otro.—Efesionan 4:26.

LOKE BO POR HASI:

• Palabrá un ora pa boso papia tokante e asuntu

• Ora bo kasá ta na palabra, no interumpié. Bo bùrt pa papia lo yega

2 SKUCHA I TRATA DI KOMPRONDÉ OTRO

LOKE BEIBEL TA BISA: “Tene tierno kariño pa otro. Pa loke ta mustra onor na otro, tuma e inisiativa.” (Romanonan 12:10) E manera ku boso ta skucha ta masha importante. Mustra “sintimentu pa otro,” sea humilde i trata di komprondé otro su punto di bista. (1 Pedro 3:8; Santiago 1:19) No djis gaña skucha. Si ta posibel, stòp ku loke boso ta hasiendo anto presta atenshon na otro, òf palabrá pa papia riba e asuntu mas lat. Si boso ta mira otro komo kompañero di tim i no komo kontrinkante, boso lo no “rabia” lihé.—Eklesiástes 7:9.

LOKE BO POR HASI:

• Keda skucha bo kasá ku un mente habrí maske bo no ta di akuerdo ku loke e ta bisa

• Purba di komprondé kiko tin tras di loke bo kasá ta bisa. Paga tinu riba su gestonan, ekspreshon di kara i tono di bos

3 KUMPLI KU BOSO DESISHON

LOKE BEIBEL TA BISA: “Den tur trabou tin ganashi, ma djis papia ku boka so ta kondusí na pobresa.” (Proverbionan 14:23) Pues, e echo ku boso ta yega na un bon manera pa solushoná un problema no ta sufisiente. Boso tin ku kumpli tambe ku loke boso dos a disidí. Kisas esei lo rekerí trabou duru i hopi esfuerso, pero e ta bale la pena. (Proverbionan 10:4) Si boso traha huntu komo tim, boso lo “tin un bon pago” pa boso esfuerso.—Eklesiástes 4:9.

LOKE BOSO POR HASI:

• Disidí ki medidanan práktiko boso ta bai tuma pa solushoná boso problema

• Tempu tempu, evaluá kon boso ta progresando