Lázaro A Ser Resusitá

Despues ku Marta i Maria a kontra ku Hesus den bisindario di Betania, nan a bai huntu kuné na e graf di Lázaro. E graf tabata un kueba ku un piedra ta tapa e entrada. Hesus a bisa pa “kita e piedra.” Marta, kende no tabata sa kiko tabata Hesus su intenshon, a ekspresá su preokupashon, bisando: “Señor, e mester ta hole kaba, pasobra e tin kuater dia morto.” Hesus a bis’é: “Mi no a bisa bo ku si bo kere lo bo mira e gloria di Dios?”—Huan 11:39, 40.

Di manera ku nan a kita e piedra. Anto Hesus a hisa su kara na shelu i a bisa: “Tata, mi ta gradisí bo ku bo a tende mi. Mi sa ku semper bo ta tende mi; ma mi a papia pa motibu di e multitut ku ta pará akinan, pa nan por kere ku ta abo a manda mi.” Sí, Hesus a hasi orashon públikamente pa e hendenan ku tabata presente por a komprondé ku loke e tabata a punto di bai hasi tabata ku poder di Dios. Anto ku un bos fuerte, Hesus a bisa: “Lázaro, bin pafó!” I Lázaro a bini pafó ku su mannan i su pianan mará ku paña i ku un paña lorá na su kara. E ora ei, Hesus a bisa e hendenan: “Lòs e pañanan for di dje i lag’é bai.”—Huan 11:41-44.

Despues di a presensiá e milager akí, hopi di e hudiunan ku a bini pa konsolá Maria i Marta a pone fe den Hesus. Ma otronan a bai serka e fariseonan pa konta nan loke Hesus a hasi. Anto e fariseonan i e saserdotenan prinsipal a yama e miembronan di Sanedrin, e korte supremo hudiu, pa un reunion. Sumo Saserdote Kaifas tambe tabata miembro di e korte akí. Awor bon, algun di e miembronan a lamentá i bisa: “Kiko nos tin ku hasi? Pasobra e hòmber akí ta hasi hopi milager. Si nos lag’é sigui asina, tur hende lo pone fe den dje, i e romanonan lo bini i kita tantu nos lugá di adorashon komo nos nashon for di nos.” (Huan 11:47, 48) E hòmbernan akí a tende testimonio di vários testigu ku a mira Hesus “hasi hopi milager,” pero nan no a keda kontentu ku loke Dios tabata hasi pa medio di Hesus. Nan preokupashon prinsipal tabata nan posishon i outoridat.

E echo ku Hesus a lanta Lázaro for di morto tabata un sla duru pa e saduseonan, kendenan no tabata kere den resurekshon. Anto Kaifas, kende tabata un saduseo, a bisa: “Boso no sa nada. Boso no ta realisá ku ta kumbiní boso pa laga ún hende muri na fabor di e pueblo, en bes di laga henter e nashon bai destruí?”—Huan 11:49, 50; Echonan 5:17; 23:8.

Komo ku Kaifas tabata sumo saserdote, Dios a pone e palabranan ei den su boka. Pues, no tabata “di su mes” el a papia e palabranan ei. Loke Kaifas mes tabata ke men ta ku mester a mata Hesus pa Hesus no sigui suak outoridat i influensia di e lidernan religioso hudiu. Pero bon mirá, Kaifas a profetisá ku Hesus lo a muri i asina perkurá un reskate, no solamente pa e hudiunan ma pa tur “e yunan di Dios ku ta plamá.”—Huan 11:51, 52.

Kaifas a logra konvensé Sanedrin pa trama un plan pa mata Hesus. Akaso Nikodemo, kende tambe tabata un miembro di Sanedrin i ku tabata bon ku Hesus, lo a pone Hesus na altura di e plan akí? Sea kual sea e kaso, mesora Hesus a bandoná e área di Herúsalèm i asina a evitá ku nan lo a mat’é promé ku e tempu ku Dios a stipulá.